عێراق دەیەوێت لە رێگەی قەتەرەوە بگاتە قۆناغی داهاتوی مۆندیالی عەرەب

03:36 - 05/12/2021

2666جار خوێندراوەتەوە

خەندان سپۆرت

 

بڕیارە سبەینێ دوشەممە لە یاریگای بەیت هەڵبژاردەی قەتەر میوانداری هەڵبژاردەی عێراق بكات لە خولی سێیەمی قۆناغی گروپەكان لە چوارچێوەی یارییەكانی دەیەمین پاڵەوانێتی جامی وڵاتانی عەرەب، یارییەكەش لە كاتژمێر 10:00ی شەو بە كاتی باشوری كوردستان بەڕێوەدەچێت.

قەتەر لە ئێستادا بە كۆكردنەوەی 6 خاڵ سەرکردایەتی گروپی A دەکات و عێراق بە كۆكردنەوەی دو خاڵ لە پلەی دوەم و عومان و بەحرەینیش سەرو خاڵێكیان هەیە.

عەنابی پاش دوەم سەرکەوتنی یەک لەدوای یەکی لە سەر حسابی هەڵبژاردەی عومان كە 2-1 گۆڵ سەركەوتنی تۆماركرد، خۆی گەیاندە قۆناغی داهاتوی پاڵەوانێتەیە، لەگەڵ ئەوەشدا ئەو هەلبژاردەیە پلەی یەكەمی كۆمەڵەكەی مسۆگەر كردوە.

پێشبینی دەکرێت هەڵبژاردەی قەتەر لە یاریەکەی بەرانبەر عێراق، زیاتر بە یاریزانە یەدەگەكانییەوە بەشداری بكات، چونكە هەڵبژاردەكە هیچ پێویستیەكی بە ئەنجامی ئەو یارییە نییە.

ڕاهێنەری قەتەر فیلیکس سونچز هەوڵدەدات هەندێک لەو یاریزانانە بەشداری پێ بكات کە لەماوەی دو یاری پێشوتردا دەرنەکەوتون بۆ ئەوەی بتوانێت بەباشی ئەو یاریزانانەی لە كورسی یەدەگن ئامادەبكات بۆ یارییەكانی داهاتوی هەڵبژاردەكە، هەرچی هەڵبژاردەی عێراقیشەوە بە هەمو توانایەوە بەشداری ئەم یارییە دەكات لە پێناو ئەوەی لە قەتەر بباتەوەو سەركەوتن بۆ قۆناغی دوەمی پاڵەوانێتیەكە مسۆگەر بكات.