شیرین عەبدولوەهاب گەڕایەوە لای حوسام حەبیب و هاوسەرگیری دەكەنەوە

09:15 - 12/11/2022

19820جار خوێندراوەتەوە

خەندان لایف

پاش تێپەڕینی 11 مانگ لە جیابونەوەیان، شیرین عەبدولوەهاب بە گەڕانەوەی بۆلای حوسام حەبیب و دوبارە هاوسەرگیری كردنەوەیان هەموانی شۆك كرد.

خانمە گۆرانیبێژی میسڕی، شیرین عەبدولوەهاب لە پرۆگرامێكی تەلەفزیۆنیدا رایگەیاند، هەواڵێكی خۆشی بۆ هەوادارەكانی پێیە، ئەویش ئەوەیە پێنجشەممەی رابردو  بۆ دوەمینجار ژیانی هاوسەرگیری ئەنجامداوەتەوە لەگەڵ حوسام حەبیب، بە ئامادەبونی هەندێك لە كەسە نزیكەكانی.

هەروەها شیرین داوای لێبوردنی لە حوسام حەبیب كرد و وتی، "ئەو خۆشەویستی ژیانمە، هێشتا خۆشمدەوێت، حوسام كەسێكی زۆر باشە، داوای هاوسەرگیری لێكردمەوە و منیش رازیبوم".

ئەو خانمە گۆرانیبێژە، باسكردنی ژیانی تایبەتی خۆی بۆ خەڵكی بە كارێكی هەڵە وەسفكرد و باسیلەوەكرد، "بەڵێن بە خەڵكی دەدەم كە چیتر باس لە بابەتە كەسییەكان نەكەم، بەڵێنیان پێدەدەم ئەو لاپەڕەیە دابخەم و باشترین گۆرانییەكانیان بۆ بڵێم".

بڵاوكردنەوەی ئەم هەواڵە بۆ هەوادارەكانی شیرین جێی شۆك بو و لەگەڵیدا رەخنەیەكی زۆری بەدوای خۆیدا هێنا و بۆیان نوسیوە، "بۆ دوەمینجار هەمان برین بۆ خۆی دروستدەكاتەوە".

ئەمە لە كاتێكدایە، شیرین و حوسام لە سەرەتای دیسەمبەری ساڵی رابردو پاش چوار ساڵ لە ژیانی هاوسەرگیری جیابونەوە، كێشە كەوتە نێوانیان و شیرین هاوسەرەكەی تۆمەتباركرد بەوەی توندوتیژی بەرامبەر نواندوە، خێزانەكەی شیرینیش حوسام-یان تۆمەتباركرد بەوەی شیرینی ئالودەی ماددەی هۆشبەركردوە و كاریگەری نەرێنی لەسەر دەرونی دروستكردوە.

شیرین عەبدولوەهاب لەدایکبوی 1980 خاوەنی دەنگێکی خۆش و سەرنجڕاکێشە، یەکێکە لە ناسراوترین خانمە گۆرانیبێژەکانی میسر و خەڵکی قاهیرەیە، لە 2007 هاوسەگیری کرد لەگەڵ محەمەد موستەفا پاش بونی دو منداڵی کچ لە 2012 جیادەبنەوە، لە ساڵی 2018 ژیانی هاوسەرگیری لەگەڵ گۆرانبێژ و ئاوازدانەری میسری حوسام حەبیب پێکهێنا.