فەرید ئیلهامی مێژوی تەنبور دەگێڕێتەوە

02:02 - 09/08/2022

1383جار خوێندراوەتەوە

خەندان لایف

مەنسور جیهانی، لە بەڵگەفیلمەکانی "تەنبور" و "هۆنیاوانانی چیا پیرۆزەکان"دا، لەدەرهێنانی فەرید ئیلهامی، دوای 15 ساڵ وێنەگرتن، توێژینەوە و لێکۆڵینەوە، مێژوی ئامێری ڕەسەنی کوردی تەنبور دەخڕێتەڕو. 

فەرید ئیلهامی، بۆ سازکردنی بەڵگەفیلمی "هۆنیاوانانی چیا پیرۆزەکان" کە سەبارەت بە مێژوی ئامێری ڕەسەنی کوردی تەنبور لە ئایینی یارسان و کاکەییەکانە و هەروەها لە بەڵگەفیلمی "تەنبور" (تەمیرە) کە سەبارەت بە مێژوی هاوچەرخی تەنبورە؛ 15 ساڵ وێنەگرتن، توێژینەوە و لێکۆڵینەوەی مۆسیقایی و مەیدانی ئەنجامداوە و ئەم بەرهەمانەی لە 5 پارێزگای ئێران، هەرێمی کوردستان و هەروەها وڵاتانی تورکیا، ئەڵمانیا و سوید وێنەگرتوە. 

فەرید ئیلهامی گۆرانیبێژ، ئاوازدانەر، توێژەر و ژەنیاری ئامێری تەنبور، ئێستا لە شاری سلێمانی پێتەختی ڕۆشنبیری هەرێمی کوردستان نیشتەجێیە؛ ماڵی تەنبوری "ئەیاز"ی دامەزراندوە و ئەمجارە لە چوارچێوەی دەرهێنەر و توێژەری مۆسیقایی، بەڵگەفیلمەکانی "تەنبور" و "هۆنیاوانانی چیا پیرۆزەکان"ی سەبارەت بە مێژوی ئامێری ڕەسەنی کوردی تەنبوری سازکردوە. 

ئەم بەرهەمانە بە جۆرێک ئینسکلۆپیدیای ئامێری کوردی تەنبور دێتە ئەژمار و بەش گەلێک لە ژیانی مامۆستایان و کەڵام خوانانی ئەم ئامێرە باستانی و ڕەسەنە وێنەگیراوە كە ئێستا لە ژیاندا نەماون. چونکە بەوپەڕی داخ و کەسەرەوە، لە ماوەی ئەم ساڵانەی دواییدا، تەواوی مامۆستایانی بێوێنە و شایستەی مەقامەکانی تەنبور لەم دنیایە کۆچیان کردوە و فەرید ئیلهامی بۆ بە بەڵگەکردن و تۆمارکردن لە مێژوی مۆسیقا، لە هەمو کەڵام خوانانی بوارە جۆراوجۆرەکانی تەنبور، لە بەرهەمهێنانی ئەم دو بەڵگەفیلمە کەڵکی ئەوتۆ و پڕبایخی وەرگرتوە.