هەشت گرەوە سەختەکەی حکومەتی نوێی عێراقی

عادل باخەوان

17-10-2022

4234جار خوێندراوەتەوە


یەکەم : گرەوی پێکهێنانی حکومەت، چونکە لە ڕابوردودا تێبینی ئەوەمان کردوە کە هەموو کەس سەرکەوتوو نەبوە لە پێکهێنانی حکومەتدا و هەیە پاشەکشەشی کردوە.

دووهەم :  گرەوی ئیدارەکردنی سەماحەتی سەید موقتەدا سەدرە، چ ئیدارەکردنی ڕازیکردنی چ ئیدارەکردنی توڕەکردنی. بەهەردوو دیوەکەدا گرەوەکە سەختە.

سێهەم: گرەوی ئیدارەکردنی بزووتنەوەی ناڕەزایی لە عێراقدا. تا چەند خۆی دوردەگرێت لە دوبارەکردنەوەی ستراتیژیەتی داپڵۆسینی زەمەنی عادل عەبدولمەهدی و تا چەند و چۆن ئیدارەی تەوژمی ناڕەزایی لە عێراقدا دەکات، کە تەوژمێکی یەکجار فراوان و گەورەو گەنجانەیە.

چوارەم : گرەوی پارێزگاریکردن لە هاوپەیمانی بەڕێوەبردنی دەوڵەت کە لە ئیتار و کورد و سووننە پێکهاتوە، ئەوەش بە جێەجێکردنی ئەو ڕێکەوتنانەی کە لەنێوان هاوپەیمانەکاندا واژوکراون.

پێنجەم: گرەوی ڕاگرتنی هاوسەنگی لەنێوان گروپە میلیشیایەکان و دەزگاکانی دەوڵەتدا...تا چەند ئەتوانێ ئەو هەستە دروستبکات کە لەنێوان ئەم دوو ئەکتەرەدا هاوسەنگی ڕادەگرێت و ناچارناکرێت بەوەی یەکێکیان لەبری ئەوی دیکەیان هەڵبژێرێت.

شەشهەم: گرەوی ڕوبەڕوبونەوەی گەندەڵی و بەرتەسککردنەوەی ڕوبەرەکانی. چۆن و بە چ میتۆدێک دەتوانێت ڕێگا لە سەرەتانی گەندەڵی بگرێت کە کۆی دەوڵەت و کۆمەڵگای عێراقی بەرەو تراژیدیای گەورە دەبات.

حەوتەم : گرەوی ئەو بەڵێنەی کە ماوەی ساڵێکە هێزەکانی بلۆکی ئیتار بە عێراقیەکانی دەدەن کە بریتیە لە حکومەتی خزمەتگوزاری. تا چەند و چۆن دەتوانێت حکومەتەکەی بگوێزێتەوە لەوەی کە غەنیمەیەکی دابەشکراو بێت و بیکات بە حکومەتی خزمەتگوزاریی هاوڵاتیان.

هەشتەم : سودانی پشتیوانیەکی ڕێژەیی دەوردراو بە حەزەری نێودەوڵەتی هەیە. تا چەند سەرکەوتودەبێت لە گرەوی بێومێدنەکردنی وڵاتانی سیستمی هەرێمایەتی و وڵاتانی سیستمی جیهانیدا


ئەم وتارە دەربڕی رای نووسەر خۆیەتی