هەڵاوسان بەردەوام دەبێت و نرخی خۆراک و بەنزین بەبەرزی دەمێننەوە

رامیار جەمال

18-06-2022

2221جار خوێندراوەتەوە



دوێنێ ڤلادمیر پوتین (سەرۆکی رووسیا) رایگەیاند سزاکانی ئەوروپا کاریگەری ئابووریان لەسەر ڕووسیا نابێت وە باشتریشە دەستهەڵگرن لە پڕچەککردنی ئۆکڕانیا. ئاژانسی ووزەی ئابووری (IEA) چەند داتایەکی بڵاو کردۆتەوە لەسەر داهاتی نەوتی رۆژانەی رووسیا کە تیایدا دەردەکەوێت داهات زیاد بووە نەک کەم بکات:

مانگی ٤ی ٢٠٢٢ رووسیا رۆژانە ٧.٩ حەوت ملیۆن و نۆسەد هەزار بەرمیلی رۆژانە هەناردە کردووە وە داهاتیشی بۆ هەمان مانگ ١٨ هەژدە ملیار دۆلار بووە! 

مانگی ٥ ی ٢٠٢٢، رووسیا رۆژانە ٧.٧ حەوت میلۆن و حەوت سەد هەزار بەرمیلی هەناردە کردووە، داهاتیشی بۆ هەمان مانگ ٢٠ ملیار دۆلار بووە! واتە سەرەڕاری ئەوەی ٢٠٠ هەزار بەرمیلی کەمتر هەناردە کردووە بەڵام دوو ملیار دۆلار چووەتە سەر داهاتەکەی. 

ئەم داتایانە چیمان پیدەڵێن؟

ئەم ژمارانە دەری دەخەن سزا ئابووریەکانی ئەوروپاو ئەمریکا کە گەورەترین چەکی ‌‌‌هەڕەشەی ئەم ووڵاتانەن دژی رووسیا هیچ کاریگەریان نەبووە تا ئێستا وە پێش ناچێت کاریگەریان هەبێت! بە پێچەوانەوە تەنها ئاگری شەرەکە خۆش دەکەن و جیهان بە برسیەتی و پر لەهەڵاوساوی دەهێڵنەوە. ئەمە لە کاتیکدا جۆو بایدنی سەرۆکی ئەمریکا لەم دوایانە ووتی مانگانە ئەمریکا بڕی ملیار و نیوێک دۆلار تەرخان دەکات بۆ ئۆکڕانیا. 

بۆ زانیاری، گران بوونی بەنزین لە کوردستان و جیهانیش دیاردەیەکی جیهانییە،بەهۆی سزا ئابووریەکانی رووسیا و هاوپەیماناکانیەتی کە ئەمریکا و ئەوروپا سەپاندوویانە. گران بوونی خۆراکیش بەهەمان شێوە بەهۆی هەناردە نەکردنی گەنمە لەلایەن ئۆکرانیاو رووسیاوە. بۆیە بە پشت بەستن بەم داتایەنە گران بوونی خۆراک و سووتەمەنی وە هەڵاوسان  بەبەردەوامی دەمێنێتەوە وە ئەگەری زیاتربوونیشیان هەیە. 

پسپۆڕانی سیاسی پێان وایە جەنگی ڕووسیاو ئۆکرانیا تا کۆتایی ساڵی ٢٠٢٣ دەخایەنێت. 


ئەم وتارە دەربڕی رای نووسەر خۆیەتی