هەواڵی ئەمڕۆ

پەلاماردانی بارزانی ئاساییە

فارس نەوڕۆڵی

8-06-2022

11177جار خوێندراوەتەوە


ئەگەر مێژوو بەدروستی و بەوردی بخوێنینەوە هەموو گەلانی چەوساوە بەر نەفرەتی داگیرکەران و چەوسێنەران کەوتون، بۆیە لەسەردەمی داگیرکاری و چەوساندنەوەدا هەمیشە سەرۆک و ڕابەرەکان دەردەکەون خوداش هەمیشە  لەسەردەمی چەوسانەوەدا  پێغەمبەرانی ناردووە، فەیلەسوفەکان لە سەردەمە تاریکەکاندا لەدایکبوون بۆ ڕۆشنکردنەوەی جیهانبینی خەڵک و نەخشەکێشان بۆ ژیانێکی شایستە و شەرەفمەندانە تر، بۆیە هەمیشە ئەو ڕابەر و ڕۆشنبیر و بیرمەند و پەیامبەرانە بەر پەلاماری تاریک پەرستان کەوتوون. لەکوردستان دا نموونەمان هەیە لەئاستی ئەدەب و شیعر و هونەردا چۆن پەلامار دراون یان شەهید کراون و دەربەدەر کراون (مەولانا خالید، نالی،  جەمال عیرفان، ئەحمەد موختار جاف ، گۆران)

لەئاستی پرسی نەتەوەیی و سیاسەتدا هەمیشە ڕابەرانی کورد بەر پەلاماری ئەوانی دیکە کەوتون بەتایبەتی کاتێک دوژمن زانیبێتی کێ ڕاستگۆیە لەتەک فەلسەفە و پرنسیپەکسنی کوردبون و مەسەلەی کورددا ،بەڕێز سەرۆک مەسعود بارزانی هەر لەسەرەتاوە دوژمنان لە بۆسەدا بوون بۆی، بەچەکی ئەو قۆناغە پەلاماریان داوە، یەکەم پەلامار هەوڵی تیرۆرکردنی بوو لەلایەن فاشیستەکانی بەعسەوە ئیتر بۆ هەر سەردەمێک بەچەکی ئەو سەردەمە لە مەسعود بارزانی دەدەن، چونکە لای ئەوان ترس لەهێزێکی نەبینراو لە زیهینی  ئەواندا بووە،  بۆ بەرهەمهێنانی حیکایەتێک کە هەمیشە بوونی خۆیان لەنەبوونی کورددا دەبیننەوە.

من بە دروستی لەم چیرۆکە تێدەگەم دەزانم ئەوان ڕقێکی شاراوەیان هەیە لە نائاگای و لەئاگایدا دژی مەسەلەی کورد، بۆیە لەناو کورددا کێ بەپرنسیپ و باوەڕ ڕابەرایەتی  مەسەلەی کورد بکات بۆ ڕزگاری، ئەوان بەچەکی جۆراوجۆر پەلاماری دەدەن دوێنێ بەتیرۆرکردن ئەمڕۆ لەڕێگای میدیا و سۆشیال میدیا و سینەمای سیاسیەوە، بۆیە پەلاماردانی بارزانی ئاساییە نائاسایی ئەوەیە پەلاماری نەدەن چونکە ئەمە شەڕی نێوان دوو ئاگاییە، ئاگای داگیرکەر و ئاگایی داگیرکراو بارزانی سەرکردەی شەڕی ئاگایی چەوساوەکانە بۆ ڕزگاری، پێویستە ئەوەش بڵێم ئەم شەڕە بە وتاری کرچ وکاڵ وهەڵچونی ناوفەیسبوک ناکرێ ئەم شەڕە شەڕی ئەقڵە دەبێت ئەقڵ ئەم شەڕە بکات.


ئەم وتارە دەربڕی رای نووسەر خۆیەتی