هەواڵی ئەمڕۆ

جگە لە سیاسەت، سلێمانی لەچی بێزارە؟

سیامەند خەلیل

4-01-2022

3394جار خوێندراوەتەوە



جاران دەیانوت ( ئەم شارە کاغەزی سپی دەخوێنێتەوە) وەک ئاماژەیەک کە هەرکەس نیازێکی هەبێت و هەرچیەک ئیدیعا بکات خەڵکی شار بەروونی ئەزانن چی لەژێرسەرایە. 

 ئێستا لە دۆخی نەخوازراوی ئابوری، سیاسی، کۆمەڵایەتی و هەمەچەشنەی خراپدا، ترسێک لە ئایندە باڵی بەسەر ئەم جوگرافیایەدا کێشاوە.

ترسی ئەم شارە ترسێک نیە لە نەزانیەوە سەرچاوەی گرتبێت بەڵکو ترسێکە لە توانای بەرزی پێشبینیکردن و زانینەوە سەرچاوەی گرتووە.

خەڵک بەدەست زۆر گرفتەوە داد و بێ دادیانە و دەستلەسەر ئەژنۆ تەماشاکارن ئەمما هێشتا سلێمانی هێزە مەعنەویەکەی لەدەستنەداوە.

ئەم رۆژە سەختانەی ئێستا، شاری بەچەشنێ شەکەت کردووە بەدەگمەن روویداوە لە مێژوودا بەڵام هێشتا توانای خوێندنەوەی کا‌غەزە سپیەکانی هەرماوە.

دوورلە رووتان، شار پڕبووە لە مرۆڤی هەلپەرست و ترسنۆک بەڵام هێشتا ژیریی و ئاگایی دەستەجەمعی لەناونەچووە، بە بێ پەیامنێرەکانیش راستیەکان وەک شنەبایەکی بێدەنگ  بە کوچە و کۆڵانەکاندا دێن و دەچن، لەناخی خەڵکدا راستی و چەوتیەکان دەخرێنە دوو زەرفی جیاوە. 

ئێستا لە هەموو کات زیاتر شار لە سیاسەت بێزارە،  بە پێچەوانەی رابردوو سلێمانی ئارەزووی هەموو شتێک ئەکات سیاسەت نەبێت.

ئێستا ئیتر هەمووان دەزانن بە بێ مرۆڤسازیی مومکین نیە نیشتمانسازیی، دەوڵەتسازیی و هیچ جۆرە سازییەکی تر ئەنجامبدرێت. 

لەنێو ئەم نادڵنیایی و هەرکەس بۆخۆییەدا، سلێمانی لە دوو چاوەڕوانیدا دەژی، یەکەمیان دنیا ئاخربوون و دووەم کەسێکە بێ ئەوەی لێدوان بدات، بێ ئەوەی راگەیاندننامە بڵاوبکاتەوە، بێ پەیج و میدیا و هەر  بەنادیاری ئامادەبێت مرۆڤسازیی بکات، گەنجسازیی بکات و کەلتورسازیی بکات و رێگا سەخت و دوورەکە هەڵبژێرێت.

ئەگەرچی زۆرینە چاوەڕوانی یەکەم بە نزیکتر دەزانن بەڵام هەر چاوەڕێی ئەو محمدی مەهدیەشن کە  پێچەوانەی ئاراستەی (با)، بەهاسازیی بکات و خۆی بکاتە قوربانی بۆ بنیادنانەوەی ئینسان لێرە لەنێو ئەم ژاوەژاوی بێ بەهاییەدا. 

ئێستا سلێمانی لەهەر شتێک زیاتر لەو بێ بەهاییە بێزارە کە باڵی بەسەر هەموو کۆمەڵگەدا کێشاوە.


ئەم وتارە دەربڕی رای نووسەر خۆیەتی