هەواڵی ئەمڕۆ

من ترسم هەیە

د. صەباحی غالب

31-12-2021

7036جار خوێندراوەتەوە


ترسبوون لەو شتە ناشیرین و خراپانەى دەوروبەر و فەرمانڕەوایەتى، ترسنۆکى نییە، ترسبوون لە چەکدارانى تایبەتى ئەم و ئەو یا لە هێزى تفەنگ بەدەستانى حیزب لە هەر شوێنێکى جیهان، دیسان ترسنۆکى نییە، ترسبوون لە بێ قانوونى و بێ سەروبەرى، بۆ هۆشیارکردنەوە و بۆ بەخۆداهاتنەوەیە، بۆ خۆ و خەڵک پاراستنە. ترسبوون ئەوپەڕى ئازایەتییە، بۆ نەهێشتنى ئەو دیاردە دزێوانەیە کە خودا بیانبڕێ لە هەرێم و لە بەشە داگیرکراوەکانى دیکەى  کوردستان زۆرن، بۆ بەربەست و بنبەستى کایەى نەشارەزایان و نادڵسۆزانى کارگێڕى یا تێکدەرانى ئاساییشى نیشتمانى و نەتەوەییە.

لە بوارى کۆمەڵایەتییدا، من ترسم هەیە لەو خوشک و برایانەى خوشکایەتى و برایەتى نافامن، لەو خزمانەى گاڵتەیان بە کەسایەتى و خزمایەتى دێ، لە کاتێکدا کەسایەتى و خزمایەتى و دۆستایەتى، دوو کۆڵەکەى سەرەکى خۆشبوون و ئاسوودەیى و دڵنەوایى کۆمەڵایەتى و ژیانن، بوونى ڕەگى قووڵى مرۆڤەکانن، مەیدانى خۆبەشتزانینى بێ خۆهەڵکێشانن، مایەى بەستنەوە و بنەماڵەیى و ئاسوودەیى و دڵنیایى و شانازین، دەمارى سەرەتایى هاوکێشەى کۆمەڵایەتى و بناغەى بوونى نەتەوە و وڵاتن، کەست نەبێ، خزمت نەیێ، دۆستت نەبێ، نە میللەت دەبێ، نە وڵات دەردەکەوێ. 

ترسم هەیە، لەو گەنجانەى تاقیکردنەوە و زانیارییان نییە و خۆیان بە پسپۆڕ دەزانن، لەو نەزانانەى گەمەیان بە زانا دێ، ترسم هەیە، لەو سوپا زەبەلاحە ئەلەکترۆنى سۆشیال میدیایە کە لە دەوڵەتان و جوگرافییە جیاوازییەکانى جیهاندا، پەیامێکى پیرۆزیان نییە، تەنیا و تەنیا مەبەستییان ئاژاوەگێڕى و تێکدانە، لەناوبردنى جوانییەکان و ڕشتنى تۆوى ڕق و کینەیە، داهێنانى جنێوى بێ سنوور و لەناوبردنى زمانى پاک و مێشکى جوانە، مەبەستیان بڵاوکردنەوەى ژەهرى دڵ ڕەشى و بێ ئاواتى و لەناوبردنى بەرچاوڕوونییە. ئەوانە لافاون، هەموو جوانییەکان ڕادەماڵن، تەڕ و وشک پێکەوە دەسووتێنن، هەموو جوانییەکان لەبەین دەبەن. هەموو ئاوازە ناسکەکان و دەنگە سازەکان، کپ دەکەن و لەناویان دەبەن، ئەوانە هەر ڕووخانیان لە دەست دێ، تێکدەرى گرشەى کۆمەڵایەتى و  ئاسوودەیى و ئاساییشن.  

ترسم هەیە، لەو نیوە مەلایانەى بوونەتە بەڵا بەسەر موسڵمانان و شێواندنى تێگەیشتنە عەقڵانى و زگماکى و ڕسکاوە سروشتییەکانى ئیسلام. ترسم هەیە، لە زۆرى مزگەوت و کەمى ئیماندار. ترسم هەیە، لە بیناى بەرزى شارەکان و لە نزمى مرۆڤى کورد لە کوردستان و لە دەروە. ترسم هەیە، لەو دەسەڵاتەى کە شکۆ بۆ مرۆڤـ و بۆ خەڵک ناهێڵێتەوە، بۆ ئەو ئەنجامەى کە داگیرکەران نەیانتوانى عیززەتى مرۆڤى کورد لەناوبەرن و تێکیبشکێنن، ئەمان زات بکەن بیکەن، پێیان وا بێ بە سووکایەتى جەماوەر، بە برسیکردنى خەڵک، بە بێ ئاوى و بێ کارەبایى، یا بێ مووچەیى و بە کەڵەگایى لە هەموو بوارەکانى ژیاندا، خۆیان گەورە دەبن، ئەوا تا ئەو پەڕى خەیاڵ، بە هەڵەداچوون.
ترسم لە بێ هیوایى جەماوەرى نەتەوەکەم بەرامبەر بە دەسەڵاتدارانى هەیە کە خودانەخواستە، ڕۆژێک وەک داگیرکەر، وەک ستەمکار ڕایانماڵێ. ترسم لە بەفیڕۆدانى کات و ڕۆژ و هەفتە و مانگ هەیە کە حکومەتى هەرێم بێ هیچ بیانوویەکى قانوونى، بێ بوونى هیچ هۆکارێکى قانوونیى، کۆمەڵایەتى و سیاسى، تەنیا و تەنیا بە ئارەزووى چەند کەسێک بە ناوى ئەنجوومەنى وەزیران، لە جیاتى هەفتەیەک پشووى ئەم سەرى ساڵەى ئەم ساڵ، لە کۆتایى ساڵێکى دیکەدا، مانگێک بکاتە پشووى کریسمس و سەرى ساڵ و لە جانتاکانى سەفەریاندا لەگەڵ خۆیان بیبەن و بیخەنە بەردەم پاپاى فاتیکان و دەسەڵاتدارانى ئەوروپا و ئەمێریکا، تا بزانن ئەمان لە مەلیک مەلیکیترن، کوچکى خۆیان لە ئاگرى ئەوان گەرمترە. 

ترسم لە دەستدانى کات و دەرفەت هەیە، چونکە کات لە هەرێم نە ئیشکردن و  پارەیە، نە ڕەنج و نە بەرهەم و مانەوەیە. کات لاى ئێمە، بێ سەردەمە، هەر ڕابردووى بێ لەسەر ڕاوەستان و بێ بەهرەیە، هەر ڕابووردووى بێ فێربوونە یا هەر ئێستاى کەیلى خۆپەرستى و بەرژەوەندییە، تەنیا و تەنیا، بێ خەمى بۆ خۆیان و ئازاربەخشینەوەى کۆمەڵایەتییە.

ترسم هەیە لەوەى حیزب لاى حیزبییەکان، نە کوردییە، نە کوردستانییە، هەر بۆ ڕێکخستنى حیزبى عێراقى، ئێرانى، سوریایى و تورکى، بەردەباز و پردەبازى یەکڕیزییە. ترسم هەیە کە (کورد!) بۆ بێگانە پاشادروستکەرە، بۆ خۆشمان خۆڵ بەسەرداکردن و چاوکوێرییە.

ترسم لە جیهانگیرى "عەولەمە"یە، کە بۆ نەتەوەى دواکەوتووى کورد کە هەموو شتێکى لە گرێژەنەچووە، بێ دەسەڵات و دەستوپێ سپى لەبەرامبەر هێرشى بێ بەزەیى تەنکنۆلۆژیاى بێ سنوورى عەولەمەدا دۆشداماوە، یا لەگەڵ لافاوەکەیدا دەڕوا، یا وەک کوردستان سنوورى نییە، واى لێهاتووە کوردیش بێ سنوورى گیانى کوردبوون بێ، بێ چراى ئیسلامەتى و بێ پیرۆزى کولتوور، بێ زمان و بێ مێژوو، بێ هەستى پێبەندبوون، بێ جوگرافیا بمێنێتەوە. ترسم هەیە، لە سەقەتکردنى زمانى ئاخاوتن و نووسین، لە نەهێشتنى گیانى برایەتى، لە لێنەبوردن، لە توند و تیژى، لە نەمانى داواى لێبوردن، لە قەرزدارى گێچەڵکەرى خۆپەرست و قەرزکوێر، لە نەمانى ڕاستگۆیى و لە بارکردنى ئازایەتیى مرۆڤدۆستى، لە بەسەرنەکردنەوەى پیاوى جوامێر و پیر و دارا و گەورەى دوێنێ، لە بەخشینەوەى منەتى نوێژکردنى فاسق و لە عاشقى درۆزن، لە خۆهەڵکێشانى ناکەس بەچە و بێ ڕەگى کۆمەڵایەتى دوێنێ. ترسم هەیە، لەگەڵ هەموو هەڵبژاردنێکى نوێى پەرلەمانى عێراق و لە دواى هەموو هەڵبژاردنێکى تازەى پەرلەمانى کوردستان، حیزبەکان لە کوردستان، بێ ڕەچاوکردنى دۆزى کورد و بێ چوارچێوەگرتنى بەرژەوەندى کوردستان، لەسەر پلە و پایە درزیان تێکەوێ و نەزانن و نەتوانن کەسێکى شیاو بۆ قەرمانگاکان بدۆزنەوە، نەتوانن کێچەڵ بە یەک نەکەن.

خۆزیا، کاربەدەستانى هەرێم و کاربەدەستانى حیزبەکان نیو هێندەى من ترسیان لێبنیشێ، بەڵکو بیرێک بکەنەوە، هەڵوێستەیەک بکەن، چاوچنۆکى خۆیان نەهێڵن، ڕقبوونەوەیان لە یەکدى کۆتایى بێنن، وەک کاربەدەستانى حکومەتان و سیاسەتمەدارانى دەوڵەتدار و حکومەتدار، دوور لە تاپۆکردنى دەسەڵاتى کەسێتى، بەماڵەیى و ناوچەیى، تۆزێک بۆ چارەنووسى نەتەوە و خاکێکى دابەشکراو ڕاچڵەکێن و بەخۆدابێنەوە، تێبگەن نە دەسەڵات، نە سامان و نە هێزى چەکدار، نە ساڵانى دەسەڵاتدارى نایانکا بە دڵسۆز و بە شارەزا، بە سیاسەتمەدرا و بەناودار، حەقە لە تاقیکردنەوەى خۆیان فێرى ئەوە بن کە هەر دەسەڵاتدارێکى کورد ئەگەر بۆ کورد نەبێ، دواى نەمانى پلە و کارەکانیان وەک بڵقى سەر ئاو بێ ناونیشان و بێ سەنگ و دەنگ، لە هەموو شتێک دەکەون.    

ترسم هەیە لە زۆر شت و گەلێک دیمەن و لە بڵاوبوونەوەى فرە دیاردەى دزێو. ترسم هەیە، لەو ترسانەى ناتوانم لێیان ڕاکەم، لەو ترسانەى ناتوانم ناویانبێنم، لەو دەستدرێژانەى ناتوانم کورتیان کەمەوە، لەو تاڵانچییانەى هیچیان نەهێشت، لەو سیاسیانەى لە سیاسەت نازانن، لەو حیزبیانەى بۆ خۆیان حیزبایەتى دەکەن و بارێک منەت و شانازییش دەبەشنەوە، دەترسم لەو کۆسانەیە بە ڕیشى باو و باپیریانەوە خۆهەڵدەکێشن، ترسم هەیە و ناتوانم ترسەکانم بژمێرم و دەریانبڕم و ناویانبێنم.

هەولێر ـ هەیینى ـ 31ى کانوونى یەکەمى 2021


ئەم وتارە دەربڕی رای نووسەر خۆیەتی