شمشیرەکەیان بە هەڵە گرت

سلێمان عەبدوڵا یونس

15-08-2021

6712جار خوێندراوەتەوە


بەڕاستی مایەی پرسیارە بۆچی دەسەڵاتدارانی ڕۆژهەڵات ئەزمون لە مێژو وەرناگرن، بۆچی هەمویان یەک بەدوای یەکدا هەمان چیرۆکی هاتن و ڕۆیشتنیان دوبارە دەکەنەوە؟ 

چیرۆکی ئاینە ئاسمانیەکان هەتا بەئیسلام دەگات، مێژوی سەرهەڵدانی فەلسەفە، لە یۆنانی دێرینەوە بۆ پۆست مۆدێرنێتە و نیولیبڕاڵیزم پڕیەتی لەبەسەرهاتە جیاوازەکانی ( المال والبنون) واتە سەربوردەی سامان و پارە و کوڕ و نەوەکان، ئەو سەربوردە خوێناوی و تراجیدیانەی هۆکاری ڕوخانی پاشا و دەسەڵاتداران و بنەماڵە و ئیمپڕاتۆریەتە زەبەلاح و جیاوازەکان بون لە ڕابردوی دورەوە بۆ ئێستای زۆر نزیک. 

فەرمانڕەواکانی ڕۆژهەڵات هەردەم شمشێرەکەیان بەهەڵە دەگرن و ناتوانن دەسکەوتەکانی کات و شوێن بچننەوە لەکاتێکدا ڕۆژهەڵات مەڵبەندی هاتنەخواەرەوەی دینەکانە. ئاخر ئەگەر هەر بەتەنها مێژوی ئیسلام و لەناو ئەو مێژوەشدا بەتەنها مانا و پەند و ئامۆژگاریەکانی چەند سوڕەتێک بەڕونی تێگەیشتبان هەمویان لەناو گەلە عاتفیەکانی بندەستیاندا دەبون جۆرج واشنتن و چێرچڵ و گاندی و ماندێلا.

تکایە لێرەدا کەس نیگەران نەبێت چونکە من باسی سیاسیەکانی کوردستان ناکەم کەلەدیندا فاتیحایان بەڕەوانی لەبەر نیە و لەسیاسەتدا هێشتا لەتخوبی ئەی ڕەقیبن و نۆرمە کۆمەڵایەتیەکانیشیان نوقمی زەلکاوی غەریزەکان بوە.


ئەم وتارە دەربڕی رای نووسەر خۆیەتی