خەندان-

ئەمریکا و یەکێتیی ئەوروپا داوایان لە کۆسۆڤۆ کرد روبەڕوبونەوەی توڕەیی لەگەڵ سڕبەکان لە باکوری ئەو وڵاتە هێور بکاتەوە، ئەگەرنا ڕوبەڕوی دەرئەنجامەکان دەبێتەوە لەلایەن هاوپەیمانە کۆنەکانی رۆژئاواییەوە.

ئەو هۆشدارییانە لەکاتێکدایە کە نوێنەرەکانی ئەمریکا و یەکێتی ئەوروپا سەردانەکانیان بۆ کۆسۆڤۆ و سڕبیا کۆتایی پێهێنا بۆ هێورکردنەوەی ئەو گرژییانەی هەفتەی رابردو بە توندوتیژی سەریان هەڵدا و بەهۆیەوە دەیان ئاشتیپارێزی ناتۆ و خۆپیشاندەرانی سڕبی لە باکوری کۆسۆڤۆ برینداربون.

بەهۆی دیاریکردنی سەرۆک شارەوانییە ئەلبانیایان، توندوتیژی سەریهەڵدا

دوای ئەوەی دەسەڵاتدارانی کۆسۆڤۆ سەرۆک شارەوانییە نەتەوەییەکانی ئەلبانیایان بۆ نوسینگەکانی شارەوانییەکان دەستنیشان کرد، توندوتیژی سەریهەڵدا، سەرۆک شارەوانیەکان لە هەڵبژاردنێکدا هەڵبژێردران کە ڕێژەی بەشداریکردنیان تەنها 3.5% بو، دوای ئەوەی سڕبەکان کە زۆرینەی ناوچەکە پێکدەهێنن، بایکۆتی هەڵبژاردنە ناوخۆییەکانیان کرد.

کۆسۆڤۆ پێویستە ئۆتۆنۆمی زیاتر بەو شارەوانیانە بدات کە زۆرینەی سڕبیان هەیە

گابرێل ئیسکۆبار، نوێنەری ئەمریکا لە باڵکانەکانی رۆژئاوا رایگەیاند، کۆسۆڤۆ پێویستە ئۆتۆنۆمی زیاتر بەو شارەوانیانە بدات کە زۆرینەی سڕبیان هەیە ئەگەر بیەوێت بەرەو پێشەوە بچێتە ناو ناتۆ و یەکێتی ئەوروپا.

ئەو رێوشوێنانەی دەگیرێنەبەر رەنگە دەرئەنجامەکانی کاریگەرییان هەبێت

ئیسکۆبار لە بەیاننامەیەکدا بۆ میدیاکانی کۆسۆڤۆ، پێش ئەوەی بەرەو بەلگراد بڕوات، وتی، "ئەو رێوشوێنانەی دەگیرێنەبەر رەنگە دەرئەنجامەکانی کاریگەرییان هەبێت لەسەر بەشێک لە پەیوەندییەکان نێوان کۆسۆڤۆ و ئەمریکا".

ئەو و میرۆسلاڤ لاججاک، نێردەی تایبەتی یەکێتیی ئەوروپا وردەکارییەکانیان لەوە نەخستەڕو، کە حکومەتی ئەلبانی سەرۆک وەزیرانی کۆسۆڤۆ کە ئەلبین کورتی سەرۆک وەزیرانی باڵادەستی ئەلبانیایە، ئەگەر وەڵامی داواکارییەکانیان نەداتەوە، رەنگە روبەڕوی چ دەرئەنجامێکی دیکە ببێتەوە. 

پێموانییە ئەو بابەتانە بە فشار و قسەکردن لەسەر دەرئەنجامەکان و تەنانەت سزاکان چارەسەر بکرێن

کۆرتی دوێنێ چوارشەممە بە رۆژنامەنوسانی ڕاگەیاند، "پێموانییە ئەو بابەتانە بە فشار و قسەکردن لەسەر دەرئەنجامەکان و تەنانەت سزاکان چارەسەر بکرێن".

ئەمریکا و یەکێتیی ئەوروپا داوایان کرد کە کۆرتی سەرۆک شارەوانییەکان لە پۆستەکانیان دوربخاتەوە

ئەمریکا و یەکێتیی ئەوروپا داوایان کرد کە کۆرتی سەرۆک شارەوانییەکان لە پۆستەکانیان دوربخاتەوە و کارەکانی ئەو یەکە تایبەتانەی پۆلیس کە یارمەتیدەر بون لە داڕشتنی شارەوانییەکانی باکور سنوداربکات.

هەروەها داوایان کردوە هەڵبژاردنی ناوخۆیی نوێ لە باکور بە بەشداریی سڕبەکان ئەنجام بدرێت، هەروەها کۆسۆڤۆ رێککەوتنێکی ساڵی 2013 بۆ دروستکردنی فیدراسیۆنی شارەوانییەکانی سڕبیا جێبەجێ بکات بۆ ئەوەی ئۆتۆنۆمی زیاتر بە گروپەکە بدرێت.

ناتۆ نزیکەی چوار هەزار سەربازی لە کۆسۆڤۆ هەیە و فەرمانی ناردنی 700 سەربازی دیکەی داوە بەهۆی پەرەسەندنی توندوتیژییەکان لەو وڵاتەدا.