خەندان-

ئەنجومەنی باڵای کۆمەڵی دادگەری کوردستان ئامادەیی خۆی بۆ یەکخستنی دەنگە ناڕازیەکانی دەرەوەی حزبەکانی دەسەڵات دەردەبڕێت و راشیدەگەیەنێت، ئەو کۆبونەوەیەی پەرلەمان و ئەو ‏دەرئەنجامانەی ‏لێی کەوتوەتەوە لەسەر کۆمسیۆن، جێگەی سەرنج و ‏ڕەخنەن و مەترسیمان ‏هەیە ئەمجۆرە کارانە هەرێم بەرەو هەڵوەشاندنەوە ‏ببەن.

بەگوێرەی راگەیەندراوێکی ئەنجومەنی باڵای کۆمەڵی دادگەری، ئەمڕۆ یەکشەممە بە سەرپەرشتی عەلی باپیر سەرۆکی کۆمەڵی دادگەری، ‏ئەنجومەنی ‏باڵای کۆمەڵ لە شاری چەمچەماڵ کۆبۆوە و چەند پرسێکی ‏گرنگی خستە بەر ‏باس و بڕیاری پێویستی لەبارەیانەوەدا.‏

پارتە دەسەڵاتدارەکان نەیانویست لە ماوەی ‏یاسایی تەمەنی ‏پەرلەمان کۆمیسیۆنی هەڵبژاردن کارا بکەنەوە

ئاماژەی بەوەشکردوە، "کۆمەڵی دادگەری کوردستان نیگەرانە لەو بارودۆخەی لە پەرلەمانی ‏کوردستان ‏هاتوەتە ئاراوە و پارتە دەسەڵاتدارەکان نەیانویست لە ماوەی ‏یاسایی تەمەنی ‏پەرلەمان کۆمیسیۆنی هەڵبژاردن کارا بکەنەوە و ‏هەمواری یاسای هەڵبژاردن ‏بکرێت، تا بەشێوەیەکی نایاسایی ماوەی ‏پەڕلەمان درێژ کرایەوە و بەو هۆیەوە ‏و وەک هەڵوێست و دەربڕینی ‏ناڕەزایەتیی فراکسیۆنی کۆمەڵ و چەند ‏فراکسیۆن و پەڕلەمانتارێکی دیکە ‏دەستیان لە کار کێشایەوە".

کاراکردنەوەی کۆمسیۆن بەمجۆرە، جێگەی سەرنج و ‏ڕەخنەیە و مەترسیمان ‏هەیە ئەمجۆرە کارانە هەرێم بەرەو هەڵوەشاندنەوە ‏ببەن‎

ئەوەشیخستۆتەڕو، "لەم قۆناغەدا و لە پرسی کۆمسیۆنی باڵای سەربەخۆی هەڵبژاردن و ‏ڕاپرسی ‏کۆمەڵی دادگەری پێیوایە ئەو کۆبونەوەیەی پەرلەمان و ئەو ‏دەرئەنجامانەی ‏لێی کەوتوەتەوە لەسەر کۆمسیۆن، جێگەی سەرنج و ‏ڕەخنەن و مەترسیمان ‏هەیە ئەمجۆرە کارانە هەرێم بەرەو هەڵوەشاندنەوە ‏ببەن‎ ".

کۆمەڵی دادگەری ئامادەیی بۆ یەکخستنی هێز و دەنگە ‏ناڕازییەکانی ‏دەرەوەی دەسەڵات هەیە و کاریشی بۆ دەکات

لەبارەی پرسی هەڵبژاردنەکانی پەرلەمانی کوردستان، ئەنجومەنی باڵای کۆمەڵی دادگەری ئاشکرایکردوە، "کۆمەڵی ‏دادگەری ‏لەپێناو گێڕانەوەی هیوا و متمانە بۆ هاوڵاتیان و ئامادەبونیان ‏لەبەردەم ‏سندوقەکانی هەڵبژاردن و کۆتاییهێنان بەو بارودۆخەی دەسەڵات ‏بەسەر ‏هاوڵاتیانیدا هێناوە، ئامادەیی بۆ یەکخستنی هێز و دەنگە ‏ناڕازییەکانی ‏دەرەوەی دەسەڵات هەیە و کاریشی بۆ دەکات".

سەبارەت بە پرسی بەشەبودجەی هەرێمی کوردستان لە ‏پڕۆژەیاسای ‏بودجەی عێراق و ئەو بڕیارانەی لیژنەی دارایی لەسەری ‏ڕێککەوتون و ئەو ‏ڕاجیایی و ناکۆکییەی لەنێوان لایەنەکان دروست ‏بوە، کۆمەڵی دادگەری رایگەیاندوە، "پێی‏وایە بودجە ڕەهەندێکی نیشتمانی هەیە و ‏پەیوەستە بە هەمو تاکێکی عێراق ‏و کوردستانەوە، دەبو نوێنەرانی ‏کورد لە فراکسیۆنە جیاوازەکان لەسەر ‏بەدەستهێنانی مافی هاوڵاتیانی ‏کوردستان لە بودجەدا دور لە موزایەدە و ‏بازرگانی لەسەر حسابی ‏هاوڵاتی، یەکدەنگ بونایە".