خەندان-

میخائیل بۆگدانۆڤ جێگری وەزیری دەرەوەی ڕوسیا ئەمڕۆ هەینی رایگەیاند، وڵاتەکەی هەوڵی بێوچان دەدات بۆ هەڵوەشاندنەوەی ڤیزەی هاتنە ژورەوە بۆ ژمارەیەک وڵاتی جیهانی ئیسلامی و لەنێویشیاندا عێراق و سوریا.

میخائیل بۆگدانۆڤ لە پەراوێزی کۆڕبەندی جیهانی ڕوسیا-ئیسلامی (KazanForum) کە ئێستا لە شاری کازان لە ڕوسیا بەڕێوەدەچێت ڕایگەیاند، هەوڵەکان لەڕوی هەڵگرتنی ڤیزا بۆ ژمارەیەک وڵاتی ئیسلامی و چەند وڵاتێکی کیشوەری ئەفریقیا بەردەوامن، بە گشتی بەنیازی دەستبەرداری سیستمی پێدانی ڤیزەی چونە ژورەوەین، چونکە ئەم بابەتە بۆ گەشتیاری و بازرگانان زۆر گرنگە.

هەوڵی هاوشێوە  بەرامبەر وڵاتانی ئاسیا دەدەین

میخائیل بۆگدانۆڤ ئاماژەی بە بەهایەکی تایبەت کرد کە وڵاتانی جیهانی ئیسلامی و وڵاتانی عەرەبی و ئەفریقا بۆ ڕوسیا دایدەنێن و  وتیشی، "هەوڵی هاوشێوە  بەرامبەر وڵاتانی ئاسیا دەدەین، کە لە داهاتودا ڕەنگە ببێتە ڕێگایەکی نایاب بۆ گەشتیاری و کەرتی بازرگانی، لەنێویاندا مالیزیا و ئیندۆنیسیا".

 ئێمە ئۆفەرێک دەدەین بەو وڵاتانەی کە بە شێوەیەکی نەریتی هاوکاریمان دەکەن لە زۆر پرسدا

جێگری وەزیری دەرەوەی روسیا ئەوەشیخستەڕو، سەبارەت بە وڵاتانی کەنداو و عەرەبی، ئێمە ئۆفەرێک دەدەین بەو وڵاتانەی کە بە شێوەیەکی نەریتی هاوکاریمان دەکەن لە زۆر پرسدا، ئەوانیش بە پلەی یەکەم میسر و عێراق و سوریان.