خەندان-

بەیانی ئەمڕۆ بومەلەرزەیەکی بەهێز بە گوڕی 7.4 پلەی رێختەر، باشوری تورکیای هەژاند و کاریگەرییەکەی گەیشتە سوریا و هەرێمی کوردستان، بەگوێرەی ئامارە سەرەتاییەکان لە سوریا بەهۆی بومەلەرزەکەوە 111 کەس گیانیانلەدەستداوە، لە تورکیاش لانیکەم 76 کەس گیانیانلەدەستداوە و 440 کەسیش برینداربون، لە هەرێمی کوردستانیش بومەلەرزەکە هەستی پێکراوە و زیانی نەبوە.

لانیکەم  76 کەس گیانیانلەدەستداوە

سەرۆکایەتیی کارەساتی لەناکاو و فریاکەوتنی تورکیا (ئافاد) رایگەیاند، بومەلەرزەکەی بەیانی ئەمڕۆ بەگوڕی 7.4 پلە بوە بە پێوەری رێکختەر و 10 پارێزگای وڵاتەکەی گرتوەتەوە، لە ئەنجامیشدا لانیکەم  76 کەس گیانیانلەدەستداوە و 440 کەسی دیکەش بریندارن.

ناوەندی بومەلەرزەکە قەزای پازارجیکی پارێزگای کاهرمانماڕەش بوە 

ئاماژەی بەوەشکردوە، ناوەندی بومەلەرزەکە قەزای پازارجیکی پارێزگای کاهرمانماڕەش بوە، بومەلەرزەکە کاتژمێر 4:17 خولەکی بەیانی ئەمڕۆ بە قوڵایی حەوت کیلۆمەتر لەژێر زەوییەوە رویداوە.

لە ئەنجامدا 111 کەس گیانیانلەدەستداوە

هاوکات ناوەندی بومەلەرزەزانی سوریا بڵاویکردەوە، گوڕی بومەلەرزەکە لە سوریا 6.4 پلە بوە بە پێوەری رێکختەر و لە ئەنجامدا 111 کەس گیانیانلەدەستداوەو  زیاتر لە 330 کەسیش بریندار بون.

لە هەرێمی کوردستانیش هەستیپێکرا

بومەلەرزەکە لە هەرێمی کوردستانیش هەستیپێکراوە و بەیانی ئەمڕۆ بەشێک لە هاوڵاتیانی شاری هەولێر و دهۆک بۆ ماوەی چەند کاتژمێرێک لە ماڵەکانیان هاتنەدەرەوە و لەناو ئۆتۆمبێل و لەسەر شەقام مانەوە.