کەرکوک.. پۆستێکی قائیمقام لە کورد وەردەگیرێتەوە

08:46 - 24/01/2023

2239جار خوێندراوەتەوە

کەرکوک

خەندان-

ئەندامێکی پەرلەمانی عێراق رایدەگەیەنێت، داوا لە خەڵکی داقوق دەکات، سبەی لەبەردەم قائیمقامیەتی قەزاکە کۆببنەوە و ناڕەزایی دەرببڕن، چونکە راکان سەعید، پارێزگاری کەرکوک بە وەکالەت ھەستاوە بە دانانی قائیمقامی قەزای داقوق و پۆستەکەی داوە بە کەسێک لە پێکھاتەی عەرەبی.

پۆستەکەی داوە بە کەسێک لە پێکھاتەی عەرەبی

دیلان غەفور، ئەندامی فراکسیۆنی یەکێتی لە پەرلەمانی عێراق لە پەیامێکدا دەڵێت، " پارێزگاری سەپێندراوی کەرکوک، بە پێچەوانەی یاساو داوایەکی ئێمەو بە ڕەچاونەکردنی ھاوسەنگیی لە پۆستەکانی ئیدارەی کەرکوک و قەزاکانی ئەو پارێزگایە، ھەستاوە بە دانانی قائیمقامی قەزای داقوق و پۆستەکەی داوە بە کەسێک لە پێکھاتەی عەرەبی لەکاتێکدا ماف و پشکی پێکھاتەی کوردە."

داوای دەستێوەردانی بەپەلەی ئەنجومەنی وەزیران دەکەین 

ئاماژەی بەوەشکردوە، "ئێمە زۆر بە توندی دژی ئەم بڕیارە دەوەستینەوەو داوای دەستێوەردانی بەپەلەی ئەنجومەنی وەزیران و سەرۆک وەزیرانی عێراق دەکەین، بۆ ئەو مەبەستەش وەک بەشێک لە پەرلەمانتارانی کەرکوک سبەینێ لەناو بینای قائیمقامیەتی قەزای داقوق دەمێنینەوە تا ھاتنەسەرخەتی لایەنی پەیوەندیدارو ڕاگرتنی جێبەجێکردنی ئەو بڕیارە".

کورد یەک پۆستی بەڕێوەبەری ناحیەی هەیە 

لەگەڵ ئەو داواکارییە دیلان غەفور نوسراوێکی بڵاوکردۆتەوە و تیایدا دەردەکەوێت، لەکۆی 12 پۆستی بەڕێوەبەری ناحیە لەو پارێزگایە، هەریەکە لە عەرەب و تورکمان پێنج پۆستیان لایە و کورد یەک پۆستی لایە.

نیشانەکردن

کەرکوک