خەندان-

دوانیوەڕۆی ئەمڕۆ فڕۆکەیەکی بێ فڕۆکەوانی تورکیا سنوری چیای ئاسۆسی لە شارباژێر بۆردومانکرد و لە ئەنجامیشدا دو کەس شەهیدبون و شەش کەسی دیکەش برینداربون.

شەهیدبونی دو کەس و برینداربونی شەش کەسی دیکەشی لێکەوتوەتەوە

بەگوێرەی زانیارییەکانی خەندان کە لە تەندروستیی قەزای شارباژێر دەستیکەوتوە، دوایین ئاماری بۆردومانەکەی تورکیا لە شارباژێر شەهیدبونی دو کەس و برینداربونی شەش کەسی دیکەشی لێکەوتوەتەوە.

بەمەبەستی راوکردن و کۆکردنەوەی گۆیژ و قارچ چونەتە چیاکە

ئەو کەسانەی لەکاتی بۆردومانەکەی سەر چیای ئاسۆس و لە نزیک گوندی گەڵاڵە بون ژمارەیان نۆ کەس بوە و بەمەبەستی راوکردن و کۆکردنەوەی گۆیژ و قارچ چونەتە چیاکە، کە سەرجەمیان خەڵکی گوندی قامیشەن.

 رزگاکردن و بەهاناوەچونی بریندارەکان چەند کاتژمێرێکی دیکەی پێدەچێت

تەندروستیی قەزای شارباژێریش دەڵێت، بەهۆی ئەوەی شوێنی بۆردومانەکە هیچ رێگایەکی هاتوچۆی لەسەر نییە و شوێنێکی سەختە، بۆیە چاوەڕێ دەکرێت رزگاکردن و بەهاناوەچونی بریندارەکان چەند کاتژمێرێکی دیکەی پێبچێت و دوای چارەسەری سەرەتایی بریندارەکان رەوانەی نەخۆشخانەکانی سلێمانی دەکرێن.

ئه‌و ناوچه‌یه‌ی رویان تێكردوه‌ مه‌ترسیداربوه‌ 

لای خۆیەوە كامه‌ران حه‌سه‌ن، قائیمقامی ماوه‌ت به‌ خه‌ندان-ی راگه‌یاند، ده‌وترێت هاوڵاتییه‌كان بۆ گۆیژ و قارچ رویان له‌ شاخه‌كه‌ كردوه‌، ئه‌و ناوچه‌یه‌ی رویان تێكردوه‌ مه‌ترسیداربوه‌ به‌هۆی ئه‌وه‌ی به‌رده‌وام له‌لایه‌ن فڕۆكه‌ی بێفڕۆكه‌وانی توركیاوه‌ چاودێری ده‌كرێت.

ناوی بەشێک لە بریندارەکان:

1- محەمەد قادر ئاغا

2- کوێخا محەمەد عەلی

3- زانا محەمەد عەلی

4- سەعید محەمەد ڕەسوڵ

5- ساڵح قادر

ناوی یەکێک لە شەهیدەکان: عەزیز محەمەد ڕەسوڵ