لاهور شێخ جه‌نگی په‌یوه‌ندی به‌ مه‌سرور بارزانییه‌وه‌ ده‌كات

06:13 - 07/10/2022

45254جار خوێندراوەتەوە

خه‌ندان-

لاهور شێخ جه‌نگی رایگه‌یاند، سه‌ركۆنه‌ی تیرۆكردنی عه‌قید هاوكار جاف ده‌كات و ئه‌مڕۆش په‌یوه‌ندی كردوه‌ به‌ سەرۆکی حکومەتی هەرێمی کوردستانەوە، داوای لێکردوه‌ کە بە زوترین کات بکەرانی ئەو کردەوە تیرۆریستییە بۆ ڕایگشتی ئاشکرا بکەن.

لاهور شێخ جه‌نگی ئه‌مڕۆ هه‌ینی له‌ راگه‌یه‌ندراوێكدا له‌باره‌ی تیرۆركردنی عه‌قید هاوكار جاف، رایگه‌یاند، "بە داخ و پەژارەیەکی زۆرەوە ئەمڕۆ لە پەلامارێکی تێرۆریستیدا لە شاری هەولێر ئەفسەرێکی دەزگای زانیاری کە ماوەی 20 ساڵ بو بەوپەڕی دڵسۆزییەوە خزمەتی ئاسایشی هەرێمی کوردستانی دەکرد، خۆی و ژن و منداڵەکانی کرانە ئامانج، ئەو ڕوداوە لە ناخەوە دڵگران و خەمباری کردم، سەرەڕای سەرکۆنەکردنی توندی ئەم کردەوە تیرۆریستییە، داوا لە دەزگا ئەمنییەکان دەکەم بە زوترین کات بکەرانی ئەو کردەوە تیرۆریستییە دەستگیر بکەن".

داوام لێکرد کە بە زوترین کات بکەرانی ئەو کردەوە تیرۆریستییە بۆ ڕایگشتی ئاشکرا بکەن
ئاماژه‌ی به‌وه‌شكردوه‌، "هەر ئەمڕۆش پەیوەندیم کرد بە بەڕێز سەرۆکی حکومەتی هەرێمی کوردستانەوە، داوام لێکرد کە بە زوترین کات بکەرانی ئەو کردەوە تیرۆریستییە بۆ ڕایگشتی ئاشکرا بکەن".

ئه‌مڕۆ هه‌ینی له‌ رێگه‌ی بۆمبی لێكنراوه‌وه‌ به‌ ئۆتۆمبێله‌كه‌یه‌وه‌، عه‌قید هاوکار جاف، بەرپرسی پێشوی دەزگای زانیاری لە موسڵ كرایه‌ ئامانج و به‌هۆیه‌وه‌ گیانی له‌ده‌ستدا و  دو ژن و دو منداڵیش کە سەرنشینی ئۆتۆمبێلەکە بون بریندار بون.