ئەنجومەنی ئاسایشی هەرێم راگه‌یه‌ندراوێكی له‌باره‌ی تیرۆكردنی عه‌قید هاوکار جاف بڵاوكرده‌وه‌

05:51 - 07/10/2022

7330جار خوێندراوەتەوە

خه‌ندان-

ئەنجومەنی ئاسایشی هەرێمی کوردستان له‌باره‌ی تیرۆكردنی هاوکار جاف، بەرپرسی پێشوی دەزگای زانیاری لە موسڵ رایگه‌یاند، زۆر بە توندی ئەم کردەوە تیرۆریستییە ترسنۆکانەیە سەرکۆنە دەکات و لێکۆڵینەوەکان لەو باره‌یه‌وه‌ دەستپێکردوە و بکەرانی ئەم کردەوە تیرۆریستییە بە سزای یاسایی خۆیان دەگەن.

ئەنجومەنی ئاسایشی هەرێمی کوردستان له‌ راگەیەندراوێکدا بڵاویكرده‌وه‌، "ئەمڕۆ هەینی 7ی تشرینی یەکەمی 2022، کاتژمێر 12:20ی پاشنیوەڕۆ، لە گەڕەکی سەربەستیی شاری هەولێر لە کردەوەیەکی تیرۆریستیدا ئەفسەرێکی ئاژانسی پاراستن و زانیاری/ زانیاریی سەر بە ئەنجومەنی ئاسایشی هەرێمی کوردستان بە ناوی هاوکار عەبدوڵڵا ڕەسوڵ، کە لە ماوەی ڕابردودا بەهۆی ناکۆکی و ململانێیەکانی ناو دەزگای زانیاری ئەرکەکەی خۆی گواستبویەوە بۆ شاری هەولێر، لە ڕێگەی دو بۆمبی لکێندراو بە ئۆتۆمبێلەکەیەوە کرایە ئامانج و بەداخەوە شەهید بو، هاوکات چوار سەرنشین کە لە هاوسەرەکەی و دو منداڵی و خوشکێکی پێک هاتبوون، بریندار بون".

ئەنجومەنی ئاسایشی هەرێمی کوردستان زۆر بە توندی ئەم کردەوە تیرۆریستییە ترسنۆکانەیە سەرکۆنە دەکات 
ئاماژه‌ی به‌وه‌شكردوه‌، "ئەنجومەنی ئاسایشی هەرێمی کوردستان زۆر بە توندی ئەم کردەوە تیرۆریستییە ترسنۆکانەیە سەرکۆنە دەکات و، لێکۆڵینەوەکانیان لەو بارەوە دەست پێ کردووە و بکەرانی ئەم کردەوە تیرۆریستییە بە سزای یاسایی خۆیان دەگەن".