سەرۆکی به‌رهه‌م بانگهێشتی هێزە سیاسییەکان دەکات و جەخت لەسەر پەسەندکردنی بودجە دەکاتەوە

05:10 - 07/10/2022

1779جار خوێندراوەتەوە

خه‌ندان-

د. به‌رهه‌م ساڵح، سه‌رۆك كۆماری عێراق له‌ وتارێكدا له‌ یادی لە دایکبونی پێشەوای موسڵمانان و سەروەری مرۆڤایەتی، رایگه‌یاند، پێویسته‌ یادی له‌ یادی لە دایکبونی پێغه‌مبه‌ر بكه‌ینه‌ هۆكارێك بۆ راستكردنه‌وه‌ی رێڕه‌وی هه‌ڵه‌ كه‌ له‌ رابردودا عێراق پێیدا تێپه‌ڕیوه‌، ده‌شڵێت، "ده‌بێت لایه‌نه‌ سیاسیه‌كان گفتوگۆیه‌كی جددی و دیالۆگی نیشتیمانی ده‌ستپێبكه‌ن و حكومه‌تی داهاتوش روبه‌ڕوبونه‌وه‌ی گه‌نده‌ڵی بكاته‌ كاری له‌ پێشینه‌ی".

د. به‌رهه‌م ساڵح ئه‌مڕۆ هه‌ینی له‌ وتارێكدا له‌ یادی لە دایکبونی پێشەوای موسڵمانان و سەروەری مرۆڤایەتی، لە مزگەوتی ئیمامی گەورە ئەبو حەنیفە نوعمان لە شاری بەغدا، رایگه‌یاند، "لەم بۆنە گەورەیەدا كە یادی لەدایکبونی پێشەوای موسڵمانانە (د.خ)، پێویستە پەند و ئامۆژگاریی وەرگرین و ئەم یادە بکەینە بنەمایەك بۆ لێبوردەیی و پێكەوەژیان، پێغەمبەری مەزن (د.خ) دەوڵەتی دامەزراند، لەو دەوڵەتەدا توانی کۆتایی بە ستەم و گەندەڵی بھێنێت و دادپەروەریی بچەسپێنێت و بەھا مرۆڤایەتییەکان بەرز راگرێت، لە ئاکاری جوان و هێزی ئیرادە و دادپەروەری و بەزەیی و، ئاشتیخوازیی كردە دروشمی خۆی كە سەرچاوەكەی ئەم ئایەتەی قورئانی پیرۆزە كە دەفەرموێت (وَمَا أَرْسَلْنَاكَ إِلاّ رَحْمَةً لِلْعَالَمِينَ)".

رۆژی لەدایکبونی پێشەوای موسڵمانان (د.خ) بۆنەیەکی گەورە و گرنگ و پەیامبەخشە بۆ بەرجەستەکردنی ئاشتی
ئاماژەی بەوەشکردوە، "رۆژی لەدایکبونی پێشەوای موسڵمانان (د.خ) بۆنەیەکی گەورە و گرنگ و پەیامبەخشە بۆ بەرجەستەکردنی ئاشتی و خۆشەویستی و پێکەوەژیان لە نێوان سەرجەم مرۆڤایەتی، ھەربۆیە ئەمڕۆ لە ھەموکات زیاتر پێویستمان بە چەسپاندنی بەھا و رەفتارە جوان و بەرزەکانی پێشەوای موسڵمانانە، تاوەکو بەھا بەرزەکانی ئاینی پیرۆزی ئیسلام بەرز راگرین، با لە پێغەمبەری خودا (د.خ) فێری چاکەخوازیی بین".
گروپە توندڕەوەكان لەوەدا شكستیان هێنا كە خۆیان بكەنە دەمڕاستی ئاین 
سەرۆک به‌رهه‌م لە پەیامەکەیدا وتی، "گروپە توندڕەوەكان لەوەدا شكستیان هێنا كە خۆیان بكەنە دەمڕاستی ئاین و بە ناوی ئاینی پیرۆزی ئیسلامەوە پاساو بۆ كار و كردەوەكانیان بھێننەوە و ھەوڵە نەزۆکەکانیان لەبارچوون، كە ویستیان لەکەی تیرۆر و توندڕەوی بدەنە پاڵ موسڵمانان".
تاكە بژاردە و چارەسەریش ئەوەیە چاكسازیی بونیاتنەر لە سیستەمی حوكمڕانییدا بكەین
ئەوەشی خستەڕو، "تاكە بژاردە و چارەسەریش ئەوەیە چاكسازیی بونیاتنەر لە سیستەمی حوكمڕانییدا بكەین، پێكهێنانی حكومەت زۆر دوا کەوتووە، ماددە دەستورییەکان پەك خراون، بژێوی ژیانی هاوڵاتییان و خزمەتگوزارییەكان تا دێت خراپتر دەبن، ھەربۆیە ناكرێت چی دیكە گرەو لەسەر دانبەخۆداگرتنی هاوڵاتییان بكەین، عێراقییەكان لەم دۆخەی ئێستا رازیی نین و شایستەی ژیانێكی باشترن".
 حكومەتێك پێكبێنین كە دەسەڵاتی تەواوی هەبێت و بتوانێت بودجە پەسەند بكات
سەرۆک کۆمار رونیشیکردەوە، "داوایەكی دڵسۆزانە ئاڕاستەی سەرجەم لایەنە سیاسییەكان دەكەم كە گفتوگۆی جددیی دەست پێبكەن و ئامانجیشیان پاراستنی بەرژەوەندیی نیشتمان و هاووڵاتییان و دۆزینەوەی رێگەچارەی گونجاو بێت بۆ ئەو قەیرانەی بەرۆکی گرتووین، ئەمەش كارێكی مەحاڵ نییە و پێویستی بەوەیە لە چوارچێوەی ئەجێندایەكی نیشتمانیدا یەكڕیز و یەكدەنگ بین، حكومەتێك پێكبێنین كە دەسەڵاتی تەواوی هەبێت و بتوانێت بودجە پەسەند بكات و كاروباری هاوڵاتییان رایی بكات و ئیدارەی قۆناغی ئایندەش بكات".