پوتن چوار ناوچەی ئۆکرانیای خستە سەر وڵاتەکەی

03:27 - 30/09/2022

23982جار خوێندراوەتەوە

خه‌ندان-

ڤلادیمێر پوتن، سه‌رۆكی روسیا ئه‌مڕۆ له‌ مه‌راسیمێكدا به‌ ئاماده‌بونی سه‌دان به‌رپرس و دیپلۆماتكاری وڵاته‌كه‌ی هه‌ر چوار هه‌رێمی لۆهانسك، دۆنێتسك، زاپۆرۆژیا و خێرسن-ی ئۆكرانیای خستە سەر وڵاتەکەی.

ئه‌مڕۆ هه‌ینی جیهان شاهێدی روداوێكی مێژویی بو، ئه‌ویش واژۆكردنی نوسراوی خسته‌ سه‌ر وڵاتی روسیایه‌ له‌لایه‌ن ڤلادیمێر پوتن، سه‌رۆكی روسیا و پارێزگاره‌كانی هه‌ریه‌كه‌ له‌ هه‌رێمه‌كانی  لۆهانسك، دۆنێتسك، زاپۆرۆژیا و خێرسن-ی ئۆكرانیا، پاش ئه‌وه‌ش هه‌فته‌ی رابردو ریفراندۆم له‌و ناوچانه‌دا به‌ڕێوه‌چو.

سه‌ره‌ڕای ئه‌وه‌ی له‌ ئاستی جیهاندا ره‌تكرایه‌وه‌ به‌ڵام مۆسكۆ سوربو له‌سه‌ر ئه‌وه‌ی ئه‌و چوار هه‌رێمه‌ی ئۆكرانیا بلكێنرێت به‌ وڵاته‌كه‌یه‌وه‌
ئه‌و ناوچانه‌ی كه‌ روسیا كردیه‌ سه‌ر وڵاته‌كه‌ی له‌ دوای هێرشه‌كانی 24ی (شوبات/2)ی ئه‌مساڵه‌وه‌ بۆ سه‌ر ئۆكرانیا كۆنتڕۆڵكرا، سه‌ره‌ڕای ئه‌وه‌ی له‌ ئاستی جیهاندا ره‌تكرایه‌وه‌ به‌ڵام مۆسكۆ سوربو له‌سه‌ر ئه‌وه‌ی ئه‌و چوار هه‌رێمه‌ی ئۆكرانیا بلكێنرێت به‌ وڵاته‌كه‌یه‌وه‌. 

به‌شێك له‌ وته‌كانی ڤلادیمێر پوتن، سه‌رۆكی روسیا له‌ مه‌راسیمه‌كه‌ی ئه‌مڕۆدا 
هاوڵاتیانی لوهانسك، دۆنێتسك، خێرسۆن و زاپۆرۆژیا هەڵبژاردەی خۆیان كرد بۆ ئەوەی بچنە ناو روسیا و ئەمە مافی خۆیانە.

مافی چارەی خۆنوسینی گەلان حەتمییە، باوباپیرانمان بەرگرییان لەو خاکانە کردوه‌.

لە دوای یەکاتێرینای گەورەوە، باوباپیرانمان ئەم ناوچانەیان پاراستوە و باوباپیرانمان لە جەنگی جیهانی دوەمدا بۆ ئەو ناوچانە خەباتیان کردوە.

پاڵەوانە ئازاکانمان، پاڵەوانەکانی ڕوسیا، کە بەشێکیان بە گیانی خۆیان باجیان دەدا، بەرگرییان لەو ناوچانە کرد.

دەمەوێت ڕژێمی کیێڤ و هاوپه‌یمانه‌كانی لە ڕۆژئاوا ببیستن کە دانیشتوانی ئەو ناوچانە بۆ هەمیشە بونەتە هاوڵاتی ڕوسیا.

هەمو زەوی و زارەکانمان وەردەگرینەوە و بە هەمو تواناکانمان گەلەکانمان دەپارێزین.

ئەم ناوچانە بنیات دەنێین و ژیانێکی شایستە و سەقامگیر و ئارام لە سەرتاسەری ڕوسیادا دابین دەکەین.

کیێڤ دەبێت ڕێز لە هەڵبژاردنی هاوڵاتیانی کۆمارەکانی هەرێمەکانی دۆنێتسک، لوهانسک، خێرسۆن و زاپۆرۆژی بگرێت.

ئێمە بانگهێشتی کیێڤ دەکەین بۆ دانوستان، بەڵام گفتوگۆ لەسەر هەڵبژاردنی خەڵک ناکەین، ئەمە کراوە، ڕوسیاش خەڵک بێهیوا ناکات.

وڵاتانی رۆژئاوا لە ساڵی 1991 هەوڵی داوە روسیا پارچە پارچە بکەن.

رۆژئاوا سیاسەتی نیوکۆلۆنیالیزم پەیڕەو دەکات بە مەبەستی زاڵبون بەسەر جیهاندا و روخاندنی رژێمەکان.

رۆژئاوا بە پێوەرەکانی خۆی هەمو رێککەوتن و پەیمانەکانی هەڵوەشاندوەتەوە.

رۆژئاوا هەمیشە دەڵێن، سیستم و یاساکان دەپارێزین و بەرگریان لێدەکەن، بەڵام ئەم یاسایانە لە کوێوە هاتون؟ دو ستاندارد کە بۆ گەمژەکان دانراوه‌.

شانازی دەکەین کە لە ماوەی سەدەی بیستەمدا بەشێک بوین لە بزوتنەوەی جیهانی بۆ رزگاری گەلان و دەوڵەتان.

شارستانیەتی ئێمە لەسەر بنەمای ئایینەکانی جولەکە و مەسیحییەت و ئیسلام و بودا دامەزراوە و لەسەر ئایدیا و وشەی ڕوسی دامەزراوە.

ئەمریکا هێشتا ئەڵمانیا، ژاپۆن و کۆریای باشور داگیر دەکات.