کۆمەڵگەی جوەکان: هیچ ئەنجومەنێکمان لە کوردستان نییە

10:52 - 20/09/2022

5287جار خوێندراوەتەوە

مەڕاسیمێکی جوەکان لە کوردستان

خەندان-

کۆمەڵگەی جوەکانی کوردستان - KJC رایگەیاند، ئەوان نوێنەرایەتی فەرمی جوەکان دەکەن لەوەزارەتی ئەوقاف و کاروباری ئاینیی هەرێمی کوردستان و هیچ ئەنجومەنێکیان بەناوی "ئەنجومەنی باڵای جوەکانی کوردستان" نییە، لەبارەی ئەو کەسەشی ئەمڕۆ خۆی وەک جو ناساند و مسوڵمانبونی خۆی راگەیاند دەڵێت "ئەو هاوڵاتییە جو نیە و بەمەبەستی چونە هەندەران وا دەکات".

ئێمە وەک جوەکانی کوردستان هیچ ئەنجومەنێکمان نییە
کۆمەڵگەی جوەکانی کوردستان - KJC ئەمڕۆ سێشەممە لە راگەیەنراوێکدا باسی لەوەشكردوە، "وەکو کۆمەڵگەی جوەکانی کوردستان KJC کە نوێنەرایەتیمان هەیە لە وەزارەتی ئەوقاف و کاروباری ئاینی، رایدەگەیەنین کە ئێمە وەک جوەکانی کوردستان هیچ ئەنجومەنێکمان نییە".
بۆمان رون بوەتەوە کە پێشمەرگەیە و باری دارایی زۆر خراپە بۆ مەبەستی چونە هەندەران وا دەکات
ئەوەش هاتوە، "ئەو بەڕێزەی گوایە سەرۆکی ئەو ئەنجومەنەیە لای ئێمە نەناسراوە، چەندینجار هاتۆتە سەردانمان کە گوایە بنجوە و دەیەوێ بگەڕێتەوە سەر ئاینی خۆی، بەڵام لەبەر ئەوەی هیچ بەڵگەیەکی نەبوە کە بنجوە و هەمیشە سەردانی (ئیران)یش دەکات، بۆیە هەمیشە رەتمان کردوەتەوە و جموجۆڵەکانی جێگەی گومانی ئێمە بوە، دوای بەدواداچون بۆمان رون بوەتەوە کە پێشمەرگەیە و باری دارایی زۆر خراپە بۆ مەبەستی چونە هەندەران وا دەکات، بۆیە زیاتر دورمان خستۆتەوە لە کۆمیونیتیەکەمان".
ئەوکەسە نوێنەرایەتی خۆی دەکات نەک جو و بنجوەکان
کۆمەڵگەی جوەکانی کوردستان - KJC دەڵێت، "ئەو کەسە ئەمڕۆ موسڵمان بونی خۆی راگەیاندوە کە خۆی و خانەوادە بەڕێزەکەیشی هەر موسڵمان بونە پێشتر و ئێستاش، بۆیە ئەوکەسە نوێنەرایەتی خۆی دەکات نەک جو و بنجوەکان،  ئەم هەڵسوکەوتەیشی هەر جێگەی گومانی زیاترن لای ئێمە بۆ ناکۆکی و دوبەرەکی نانەوە لەنێوان ئاینە جیاوازەکان، ئێمە وەکو جوەکانی کوردستان رێز لە هەمو ئاین و ئاینزایەک دەگرین و بەردەوام دەبین لەم پێکەوە ژیانەی کوردستان. "