سەرۆکی تایوان پەیامێك بۆ چین دەنێرێت؛ روداوه‌كانی ساڵی 1958ی بیرده‌هێنێته‌وه‌

10:23 - 23/08/2022

4783جار خوێندراوەتەوە

خه‌ندان-

تسای ئینگ وێن، سەرۆکی تایوان ئه‌مڕۆ سێشەممە سه‌ردانی ئەکادیمیای ئەمریکای كرد و رایگەیاند، کە  دورگەکە شه‌ش دەیە پێش ئێستا سوپای چینی تێكشكاند، کاتێک هێزەکانی دو دورگەی تایوانیان بۆردومان کرد، به‌ڵام تا ئەمڕۆش سورن له‌سه‌ر به‌رگریكردن له‌ هه‌رێمه‌كه‌یان.

دوای سەردانەکەی نانسی پێلۆسی، سەرۆکی ئەنجومەنی نوێنەرانی ئەمریکا بۆ تایوان لە ماوەی مانگی رابردودا گرژییەکانی نێوان تایوان و چین زیاتربون، چین چه‌ندین مانۆڕی سه‌ربازی ئه‌نجامدا بۆ ده‌ربڕینی توڕەیی لەوەی کە دەیبینێت پشتگیریه‌كانی ویلایه‌ته‌ یه‌كگرتوه‌كانی ئەمریکا بۆ تایوان زیاد دەکات، کە پەکین بە خاکی چینی دەسەڵاتداری دەزانێت.

64 ساڵ لەمەوبەر سەربازان و هاوڵاتیانمان پێکەوە کاریان کردوە و تایوانیان پاراستوە بۆ ئەوەی ئەمڕۆ تایوانێکی دیموکراتمان هەبێت
لەکاتی چاوپێکەوتنی لەگەڵ شاندێکی پەیمانگای هۆڤەری زانکۆی ستانفۆرد لە ئۆفیسەکەی، تسای ئینگ وێن، سەرۆکی تایوان ئاماژەی بە هێرشەکانی چین کرد بۆ دورگەکانی کینمەن و ماتسو لە کەناری چین، کە لە مانگی ئابی 1958 دەستیپێکرد و وتی، "64 ساڵ لەمەوبەر له‌ 23ی ئابدا سەربازان و هاوڵاتیانمان پێکەوە کاریان کردوە و تایوانیان پاراستوە بۆ ئەوەی ئەمڕۆ تایوانێکی دیموکراتمان هەبێت".
شەڕی پاراستنی نیشتمانەکەمان نیشانی هەمو جیهان داو
ئاماژه‌ی به‌وه‌شكرد، "شەڕی پاراستنی نیشتمانەکەمان نیشانی هەمو جیهان داوە کە هیچ هەڕەشەیەک نییە کە بتوانێت سوربونی گەلی تایوانی بۆ بەرگری لە گەلەکەی خۆی كه‌مبكاته‌وه‌، نە لە ڕابردو و نە لە ئێستا و نە لە داهاتوشدا".
نیشانی جیهان دەدەین کە خەڵکی تایوان لە هەمان کاتدا خاوەنی ئیرادە و متمانەن
سه‌رۆكی تایوان ئه‌وه‌شی خسته‌ڕو، "نیشانی جیهان دەدەین کە خەڵکی تایوان لە هەمان کاتدا خاوەنی ئیرادە و متمانەن بۆ پاراستنی ئاشتی و ئاسایش و ئازادی و خۆشگوزەرانی بۆ خۆمان".
لە ساڵی 1958دا تایوان بە پشتیوانی ئەمریکا بەرەنگاری هێرشه‌كانی چین بوه‌وه‌ 
لە ساڵی 1958دا تایوان بە پشتیوانی ئەمریکا بەرەنگاری هێرشه‌كانی چین بوه‌وه‌ و له‌وكاته‌دا واشنتن سه‌دان كه‌لوپه‌لی سه‌ربازی وه‌ك موشەکی دژە فڕۆکەی پێشکەوتوی پێبه‌خشی.

حکومەتی تایوان دەڵێت، چین هەرگیز ده‌سه‌ڵاتی به‌سه‌ر دورگەکەدا نەکردوە و مافی ئەوەی نییە داوای بکات یان بڕیار لەسەر داهاتوی بدات، دورگه‌كه‌ تەنها لە لایەن 23 ملیۆن کەسەکەی تایوانەوە به‌ڕێوه‌ده‌برێت.

نیشانەکردن

چین تایوان ئەمریکا