هەواڵی ئەمڕۆ

دەزگای لوتکە: لەدواین روداوی ژێرئاوکەوتنی یەختی کۆچبەراندا کوردی تێدانییە

03:55 - 17/08/2022

965جار خوێندراوەتەوە

خەندان-

دەزگای لوتکە، بۆ ئاوارە و پەنابەران رایگەیاند، لەروداوی ژێرئاوکەوتنی یەختی پەنابەران لە رێکەوتی 10ی ئەم مانگە،  تائێستا بەهیچ شێوەیەک نە لە کۆچبەرە بێسەروشوێنبوەکان و نە لەکۆچبەرە  ڕزگاربوەکان هیچ هاوڵاتیەکی عێراقی و کورد تۆمارنەکراوە.

هیچ بەڵگەیەک نیە بۆ پشت ڕاستکردنەوەی ئەو هەواڵانە کە بڵێت  کۆچبەرانی عێراقی و هەرێمی کوردستان لەو یەختەدا هەبوە

دەزگای لوتکە، بۆ ئاوارە و پەنابەران، ئەمڕۆ چوارشەممە لە راگەیەندراوێکدا بڵاویکردەوە،"ئەگەر چی لە  زۆرێک لە دەزگاکانی ڕاگەیاندن  هەواڵی ئەوە بڵاوکرایەوە کە گوایە هاوڵاتی عێراقی و هەرێمی کوردستان لە ڕوداوی ژێر ئاوکەوتنی ئەو یەختەی کە لە 10ی ئەم مانگە لە نزیک دورگەی کارپاتۆسی وڵاتی یونان نوقم بو بێسەر و شوێن بون و گیانیانلەدەستداوە، دوای بەدوا داچونێکی  وردی نوێنەرانی دەزگای لوتکە لە وڵاتی یونان و وڵاتی تورکیا و بەردەوام لەسەر هێڵ بون لەگەڵ باڵیۆزخانەی عێراقی لە وڵاتی یۆنان و تەواوی لایەنە پەیوەندیدارەکان لەحکومەتی یونان و تورکیا هیچ بەڵگەیەک نیە بۆ پشت ڕاستکردنەوەی ئەو هەواڵانە کە بڵێت  کۆچبەرانی عێراقی و هەرێمی کوردستان لەو یەختەدا هەبوە".

بەردەوام دەبین لە بەدواداچونەکانمان

ئاماژەی بەوەشکردوە،"تائێستا بەهیچ شێوەیەک نە لە کۆچبەرە بێسەروشوێنبوەکان و نە لەکۆچبەرە  ڕزگاربوەکان هیچ هاوڵاتیەکی عێراقی و کورد تۆمار نەکراوە ، وەک دەزگای لوتکە تەواوی ئەو هەواڵانە ڕەتدەکەینەوە و بەردەوام دەبین لە بەدواداچونەکانمان ".

هەر کۆچبەرێک کە بە ڕێگا نایاساییەکانی (دەریای و وشکانی)کە کۆچ دەکەن و لەلایەن پۆلیسی سەر سنوری کەناراوەکان کە دەستگیردەکرێن

لەکۆتایی راگەیەندراوەکەی لوتکەدا هاتوە،"هەر کۆچبەرێک کە بە ڕێگا نایاساییەکانی (دەریای و وشکانی)کە کۆچ دەکەن و لەلایەن پۆلیسی سەر سنوری کەناراوەکان کە دەستگیردەکرێن، بۆ ماوەی چەند ڕۆژێک کەرەنتینە دەکرێن و زۆر کات ڕێگەیان پێنادەن کە ئامێرکانی پەیوەندی بەکاربهێنن".

پێنجشەممەی رابردو 10ی(ئاب/8)ی 2022، یەختێکی کۆچبەران لە دەریای ئیجە نوقمبو و بەگوێرەی ئەو زانیاریانەی کە بڵاوکرابونەوە، یەختەکە 80-90 کۆچبەری هەڵگرتوە و لەو ژمارەیەش تەنها 29 کۆچبەریان رزگارکراون و ئەوانی دیکەیان بێسەروشوێنن، ئەمڕۆش هێزی دەریاوانی یۆنان کۆتایی بەگەڕان بەدوای بێسەروشوێنبوانی روداوەکە هێنا.