خه‌ندان- هه‌ڤاڵ محه‌مه‌د
ئه‌برو گونای، وته‌بێژی پارتی دیموكراتی گه‌لان (هه‌ده‌پە) رایگه‌یاند، ژمارەی دەنگی شه‌ش لایه‌نه ئۆپۆزسیۆنه‌كه له‌لایه‌ك و ئاكپارتی و مه‌هه‌په له‌لایه‌كی دیكه بەشی ئەوە ناکات به ته‌نها حكومه‌ت دروستبكه‌ن، سه‌ره‌ڕای ئه‌وه‌ی دەسەڵات، دەسەڵاتی لەدەستداوە، بەڵام هێشتا ئۆپۆزسیۆن هێزێکی یەکگرتوی پێکنەهێناوە، لە تورکیا هەم حکومەت و هەم ئۆپۆزسیۆن لە زۆر پرسدا هاوشێوەن، بە تایبەت لە روی چارەسەرکردنی کێشەی کوردەوە هەردولا لەیەک دەچن، هیچ بەرنامە و پلانێکیان نیە بۆ کێشەی کوردەوە، ده‌شڵێت، "به‌منزیكانه هاوپه‌یمانیمان له‌گه‌ڵ لایه‌نه كوردیه‌كان راده‌گه‌یه‌نین".
ئه‌برو گونای بۆ یه‌كه‌مجار له‌میانی چاوپێكه‌وتنێكی تایبه‌تدا له‌گه‌ڵ خه‌ندان له‌باره‌ی چه‌ندین ته‌وه‌ر ده‌دوێت و په‌یوه‌ست به هاوپه‌یمانی لایه‌نه كوردییه‌كانی توركیا بۆ هه‌ڵبژاردنی داهاتوی تورکیا، رایگه‌یاند، "پێشتر هاوپەیمانیمان لەگەڵ حزبەکانی کوردستاندا له توركیا هەبو، ئێمە هاوپەیمانیمان لەگەڵ ئەوان نوێ کردەوە و بەهێزمان کرد، لەگەڵ دامودەزگا و کەسانێک کۆدەبینەوە کە پارێزگاری لە دیموکراسی دەکەن، ناوی هاوپەیمانێتیه‌كه‌ی ئێمە هاوپەیمانی دیموکراسییە و لە 25ی (ئاب/8)دا بۆ ڕای گشتی ڕایدەگەیەنین، لەو به‌یاننامه‌یه‌ی كه بڵاویده‌كه‌ینه‌وه، خاڵی گرنگ بۆ چارەسەرکردنی زۆرێک لە کێشەکانی تورکیا ده‌خه‌ینه‌ڕو".
هیچ پەیوەندییەکمان بە هاوپه‌یمانی شه‌ش پارته‌كه‌ی ئۆپۆزسیۆنی توركیاوه نیه
ئاماژه‌ی به‌وه‌شكرد، "هیچ پەیوەندییەکمان بە هاوپه‌یمانی شه‌ش پارته‌كه‌ی ئۆپۆزسیۆنی توركیاوه نیه، مێزی شەش لایه‌نه‌كه لە دەوری سیاسەتی جەنگ کۆدەبێتەوە، سیاسەتی جەنگیش لەسەر بنەمای سیاسەتی گۆشەگیری دامەزراوە، لە داگیرکاری و قەیرانی ئابورییەوە تا گۆشەگیری توندی ئیمڕاڵیی و هەمو تورکیا، لە هەژاریی ژنانەوە تا کێشەی گەنجان، منداڵان، کرێکاران، ئه‌و كێشانه له هیچ سیاسەتێکی ئەو شەش لایەنەدا نین، هیچ چارەسەرێکیان لانیه".
ئێمه بەتەواوی دژی سیاسەتی شەڕخوازیین و ئەو خەڵکەی پشتگیریمان دەکەن شەڕیان ناوێت، هەژارییان ناوێت
وته‌بێژی هه‌ده‌په وتیشی، "ئێمه بەتەواوی دژی سیاسەتی شەڕخوازیین و ئەو خەڵکەی پشتگیریمان دەکەن شەڕیان ناوێت، هەژارییان ناوێت، نامانەوێت سەرچاوەکانمان بۆ شەڕ و ململانێ تەرخان بکرێت، ئێمە گۆشەگیری قبوڵ ناکەین، هەربۆیە لەگەڵ ئه‌و شه‌ش پارته لەسەر مێز دانانیشین".
خه‌ندان: ئێوە لە ماوەی رابردودا کۆنگرەتان بەست، کۆنگرە چی گۆڕی؟
ئه‌برو گونای: ئێمە لە 3ی حوزەیرانی ئه‌مساڵ بە بەشداری دەیان هەزار کەس لە سەرتاسەری تورکیاوە پێنجەمین کۆنگرەی گەورەی ئاساییمان سازکرد، پێنجه‌مین كۆنگره‌ی ئاسایی گه‌وره‌مان به خه‌باتی هاوبه‌ش، به پاڵپشتی ده‌زگا و كه‌ساسوقنی ئینته‌رناسیۆنالیست و به به‌شداری ده‌یان هه‌زار كه‌س تێپه‌ڕی، لە کۆنگره‌دا پەیامێکی ڕون دەرکەوت کە هەدەپە دەروازەی خەباتی هاوبەشی خەڵکە، کلیلی چارەسەر لە دەستی هەدەپەدایە، چونکە هەدەپە تاکە پارتە خەبات دەکات و کاردەکات بۆ چارەسەرکردنی هەمو کێشەکانی تورکیا.
تا ئێستا هێرش و گوشارەکان بۆ سەر هه‌ده‌په کەمنەبوەتەوە، له به‌رامبه‌ردا خەباتمان ڕۆژ لە دوای ڕۆژ بەهێزتر و بەهێزتر بوە، کۆنگرەی ئێمەش هێمای ئەم خەباتە بو، لە بەرامبەر هەڕەشەی داخستنی حزبەکەمان و لە دژی هەمو هێرش و ئاستەنگێک بۆ سەر حزبەکەمان، ئێستا ئێمە هێندەی تر ڕێکخراوتر و بەهێزترین، بۆ ئێمە گرنگترین ڕێگا جێبەجێکردنی دیموکراسی و ئاشتی شەرەفمەندانە هەمیشەییە، بۆ ئەوەی سیاسەتی شەڕ نەمێنێت و دیموکراسی حوکم بکات تا ئێستا بەردەوام بوین لە کارەکانمان، بەرەنگاری سیاسەتەکانی پاكتاوكردن بوینەته‌وە، لەمەودواش هەمو کێشەکان چارەسەر دەکەین، بە تایبەت بۆ شکاندنی گۆشەگیری كارده‌كه‌ین، بە شێوەیەکی یەکلاکەرەوە کار بۆ چارەسەری دەکەین.
خه‌ندان: تا کۆنگرەی داهاتو چۆن سیاسەت دەکەن و لەسەر چ بنه‌مایەک کاردەکەن؟
ئه‌برو گونای: هێڵی سێیەم، رێگای سێیەم، بنیاتنانەوە و فراوانکردنی یەکێتی دیموکراتیی، ئامانجی سەرەکی سیاسەتی نوێمانه، لە بەرامبەر داواکاری داخستنی هەدەپە، بەهێزکردنی هەدەپە هەنگاوی ستراتیژی ئێمەیە دژی هێرشەکان، هەمو کارەکان و ئامادەکارییەکان بۆ ئەمەیە، بە تایبەتی بەهێزکردنی خەبات بۆ ئاشتی دژی سیاسەتەکانی جەنگ، دژی سیاسەتەکانی زیندان و گۆشەگیری، بەهێزکردنی خەبات بۆ دادپەروەری و ئازادی، دژی تەسککردنەوە و سنوردارکردنی سیاسەتی دیموکراسی، بەهێزکردن و فراوانکردنی ئایدیۆلۆژیای هەدەپە، بنەماکانی کۆنگرەکەمان بو.
خه‌ندان: ئێستا دەزانین کە تورکیا بەرەو هەڵبژاردن دەڕوات، ئێوە چۆن خۆتان ئامادەکردوە؟
ئه‌برو گونای: وەک دەزانن حزب و هێزەکانی دیكه هاوپەیمانی خۆیان پێکهێناوه و خۆیان بۆ هەڵبژاردن ئامادە دەکەن، په‌یامی ئێمە ڕونە، ئامادەکارییەکانمان بەپێی هێڵەکەمان ئەنجام دەدرێت، ئێمە هاوپەیمانی دیموکراسی پێکدەهێنین، لەگەڵ شه‌ش حزبی کوردستانی کۆبوینەوە، هەروەها دیدار و دیالۆگەکانمان لەگه‌ڵ لایەنی تورکیا ئەنجام دەدرێن، نوێنەرانی ئایینی و ڕێکخراوەکانی کۆمەڵگەی مەدەنی و کۆمەڵە و دامەزراوەکان لە هاوپەیمانیەکەماندا بەشداری دەکەن.
وەک دەزانن پارتەکەمان لە 6ی (ئاب/8) لە دیاربەکر و 7ی (ئاب/8) لە ئیستانبوڵ دو گردبونەوەی جەماوەری ئەنجامدا، هه‌روه‌ها له شوێنی گردبونه‌وه‌كان ئه‌وه ڕون بوه‌وه كه خه‌ڵك ئاماده‌یه بۆ هه‌ڵبژاردنه‌كه، چونکە کەس لێبوردەیی زیاتری بۆ ئەم دەسەڵاتە نیە، بۆ ئەم عەقڵیەتە نیه، بە پاڵپشتی گەلەکەمان ئامادەین بۆ هەڵبژاردن.
خه‌ندان: مەترسیتان نیە بەربەستی 10% تێنەپەڕێنن، پێشبینی دەکەن چەند کورسی بهێنن؟
ئه‌برو گونای: هەرگیز مەترسی ئەوە نەبوە کە هەدەپە به‌ربه‌ستی هه‌ڵبژاردن تێنه‌په‌ڕێنێت، لەم هەڵبژاردنەشدا به ڕێژەیەکی زۆر ده‌نگه‌كانمان زیادده‌كات، ئەمەش لە شەقام و گۆڕەپان و چالاکی و رێپێوانەکانەوە دیارە، لە دەرەوە قسە لەگەڵ هه‌رکێیه‌ك دەکەیت گلەیی لەم حکومەتە و ئۆپۆزسیۆن دەکات، چونکە كاره‌كانی ده‌سه‌ڵات نادیاره و ئیتر کەس هەست بە سەلامەتی و ئاسایش ناکات، ئۆپۆزسیۆن ئەرکی خۆی جێبەجێ ناکات و وەڵامی کاردانەوەکانی خەڵک ناداتەوە، بۆیە حزبەکەمان لە شوێنێکی گرنگدا وەستاوە و ئومێد بە خەڵک دەبەخشێت، هەربۆیە خەڵکی تورکیا ڕو لە هەدەپە دەکەن، هەروەها شەو و ڕۆژ کاردەکەین بۆ ئەوەی شایەنی ئەم هیوایە بین.
بەڕای ئێمە مەترسی تێنەپەڕاندنی به‌ربه‌ستی هەڵبژاردن نییە، ئەگەر ئاستەنگ و بێیاسایی و دەستێوەردان نه‌بێت حزبەکەمان ئەنجامێکی مێژویی بەدەستدەهێنێت، لە هەڵبژاردنی ڕابردودا سەرەڕای ئەو هەمو فشار و گوشار و ڕێگریانە، نزیکەی 12%ی دەنگەکانمان بەدەستهێنا، بەڵام دەزانین کە توانای ئێمە لەم هه‌ڵبژاردنه‌دا زیاترە، ئەگەر ستانداردەکانی یەکسانی و دیموکراسی زاڵ بن، ئەوا ڕێژەی دەنگدانمان لە 20% بۆ 25% ده‌بێت.
خه‌ندان: وتت كه هاوپەیمانی لەگەڵ پارتەکانی دیکەی تورکیا دەکەن بۆ هەڵبژاردن، ئەو بابەتە گەیشتوەتە کوێ، کەی رایدەگەیەنن؟
ئه‌برو گونای: ئێمە پێشتر هاوپەیمانیمان لەگەڵ حزبەکانی کوردستاندا هەبو، ئێمە هاوپەیمانیمان لەگەڵ ئەوان نوێ کردەوە و بەهێزمان کرد، وەک پێشتر وتم لەگەڵ دامودەزگا و کەسانێک کۆدەبینەوە کە پارێزگاری لە دیموکراسی دەکەن، هێشتا ئامادەکارییەکانمان بەردەوامە، خەڵک لە هەرپارچەیەکی کۆمەڵگاوە، لە هەمو بوارێکی خەباتەوە بەشداری لە هاوپه‌یمانێتیه‌كه‌ماندا دەکەن، ناوی هاوپەیمانی ئێمە هاوپەیمانی دیموکراسییە و لە 25ی (ئاب/8)دا هاوپەیمانی دیموکراسی بۆ ڕای گشتی ڕادەگەیەنین، لەو به‌یاننامه‌یه‌ی كه بڵاویده‌كه‌ینه‌وه، خاڵی گرنگ بۆ چارەسەرکردنی زۆرێک لە کێشەکانی تورکیا ده‌خه‌ینه‌ڕو.
ماوەیەکی زۆرە لە هەوڵی ئەوەداین لەگەڵ ئۆپۆزسیۆنی تورکیا كه له دژی حکومەتی ئه‌نقه‌ره کاربکەین، ئاکەپە و مەهەپە پێكه‌وه بەرەیەک پێکدەهێنن، بۆ ئەوەش زۆر کۆبونەوە ئەنجامدراوه، ئێستا ئەنجامێکی باشمان بەدەستهێناوە.
خه‌ندان: ئێوە ئێستا پەیوەندیتان لەگەڵ پارتەکانی ئۆپۆزسیۆن لە تورکیا چۆنە؟
ئه‌برو گونای: لە تورکیا چەندین لایەنی جیاوازی ئۆپۆزسیۆن هەن، هەڵوێست و سیاسەتێکی یەکگرتویان نیە، بەشێک لە حزبە ئۆپۆزسیۆنەکان لە ڕوی هۆشیارییەوە هاوشێوەی حکومەتی ئەمڕۆن، بەڵام ئێمە هەوڵ دەدەین بەپێی پێوەرە دیموکراسیەکان لەگەڵیان دانوستان بکەین و بەرەی دژ بە ئاکەپە – مەهەپە فراوانتر بکەین، بۆ ئەوەش بەپێی پەیڕەوی ناوخۆی حزبەکەمان بەردەوامین لە دانوستانەکانمان لەگەڵیان، بۆ ئێمە پێوەری سەرەکی بریتییە لە بەرزڕاگرتنی ڕێساکانی دیموکراسی، لەو چوارچێوەیەدا هەوڵ دەدەین پەیوەندییەکانمان لەگەڵ هەمو لایەک بەهێزتر بکەین.
با جارێکی تریش بڵێین، هەدەپە لەسه‌ر ئه‌و مێزانە دانانیشێت، چونکە ئەو مێزانە بۆ چارەسەرنین بەڵکو بۆ ململانێ و بنبەستە، هیچ بیرۆکەیەکیان نییە بۆ چارەسەر، تەنانەت ئەگەر هەندێکجار هەندێک پەیوەندیمان لەگەڵیان هەبێت، ئەوە بەو مانایە نییە کە ئێمە لە هاوپه‌یمانێتیه‌كانیاندا بەشدارین، ئێمە ڕەخنەیان لێدەگرین، ئۆپۆزسیۆن پێویستی بە گۆڕانکارییەکی ڕیشەیی هەیە، بە هەمان دروشم هیچ لایەنێک ناتوانێت لێدوانێکی نوێ بدات، دەرگایەکی نوێ بۆ تورکیا بکاتەوە.
خه‌ندان: بۆچی لەگەڵیاندا کۆنابنەوە، لەکاتێکدا ئەوان چەند جارێک هەر شەش پارتە ئۆپۆزسیۆنەکە کۆبونەتەوە؟
ئه‌برو گونای: ئێمە هیچ پەیوەندییەکمان بە هاوپه‌یمانی شه‌ش پارته‌كه‌وه نیه، مێزی شەش لایه‌نه‌كه لە دەوری سیاسەتی جەنگ کۆدەبێتەوە، سیاسەتی جەنگیش لەسەر بنەمای سیاسەتی گۆشەگیری دامەزراوە، لە داگیرکاری و قەیرانی ئابورییەوە تا گۆشەگیری توندی ئیمڕاڵیی و هەمو تورکیا، لە هەژاریی ژنانەوە تا کێشەی گەنجان، منداڵان، کرێکاران، ئه‌و كێشانه له هیچ سیاسەتێکی ئەو شەش لایەنەدا نین، هیچ چارەسەرێکیان لانیه، ئێمە شوێنمان لەسەر ئەو مێزە نییە، چونکە ئێمه بەتەواوی دژی سیاسەتی شەڕخوازین، ئێمە و ئەو خەڵکەی پشتگیریمان دەکەن شەڕمان ناوێت، هەژاریمان ناوێت، نامانەوێت سەرچاوەکانمان بۆ شەڕ و ململانێ تەرخان بکرێت، ئێمە گۆشەگیری قبوڵ ناکەین، هەر بۆیە ئێمە لەگەڵ ئەوان لەسەر ئەو مێزە دانانیشین.
ئێمە هەوڵ دەدەین بەرەی دژی شەڕ، بەرەی دژ بە ئاکەپە – مەهەپە فراوان بکەین، بەڵام ئەمە بەومانایە نییە کە ئێمە پشتگیری لە ستانداردەکانی دیموکراسی و یاساکانمان نه‌کەین، بێگومان ئێمە یاسامان هەیە بۆ دانوستان، بۆ هاوپەیمانی و هەر لایەنێک دان بەو پەیڕەوەدا نەنێت، ئێمەش دانیان پێدا نانێین، بەڵام بەپێی ئەم پەیڕەوە بەپێی حوكمی دیموكراسی و دادپەروەری و یەكسانی دەتوانین لەگەڵ هەموان دانوستان بكەین.
خه‌ندان: ئەو بایکۆتکردنەی ئەوان بۆ هەدەپە، پێتان وانیە بۆ پەراوێزخستن و هەوڵدانە بۆ کەمکردنەوەی پێگەی جەماوەری پارتەکە؟
ئه‌برو گونای: نەخێر، بە پێچەوانەوە بەهێزمان دەکات، وەک وتم ئێمە لە دەوری دیموکراسی کۆبوینەوە، لە دەوری ئاشتی و ئازادی، ئێمە هەرگیز لە دەوری شەڕ و توندوتیژی کۆنەبوینەتەوە و سیاسەتی خۆمان لەسەر بنەماکانی ئازادیی خەڵک و ئاشتی شەرەفمەندانە و هەمیشەیی بنیاتناوە، هاوپەیمانی ئه‌و شه‌ش لایه‌نه ناتوانێت ئێمە لە سیاسەت دوربخاتەوە، بە پێچەوانەوە ئێمە لە ناوەندی سیاسەتداین و لە شوێنێکی ڕەخنەگرانەداین، بۆیە ئێمە لەگەڵ جەماوەر و گەلەکەمان ڕێگای سێهەم دەپارێزین و کار لەسەر ئەم هێڵە دەکەین، ڕێگای سێیەم لە جاران بەهێزترمان دەکات.
ڕاستییەکە ئەوەیە کە دەبێ ئەوە ڕون بکەینەوە کە ئەمڕۆ نەک هەر ئاکەپە-مەهەپە، بەڵکو هەندێک لایەنی ئۆپۆزسیۆنیش کە لەو مێزەدان، هیچ جیاوازییەک لە نێوان عەقڵیەتی ئەوان و عەقڵیەتی ئاکەپە-مەهەپەدا نیە، ده‌یانه‌وێت به هه‌مو توانایه‌وه كاریگه‌ری ئێمه لاواز بكه‌ن، به‌ڵام گه‌له‌كه‌مان، لایه‌نگرانی ئێمه باش ئه‌و زیهنیه‌ته ده‌زانن، ئێمە هێزی خۆمان لە گەلەکەمان وەردەگرین و ئەو هێزە سەرمایەی دەیان ساڵە.
خه‌ندان: پێتانوایە ئەو شەش پارتە بتوانن هێندە دەنگ بهێنن کە حکومەت پێکبهێنن؟
ئه‌برو گونای: هاوسەنگی سیاسەت لە تورکیا زۆر گۆڕانی بەسەردا دێت، ئیدارەی ئاکەپە – مەهەپە بە سیاسەتە هەڵەکانی تورکیای بەرەو شکستێکی گەورە برد، بە تایبەت لە بواری ئابوریدا لە تورکیا قەیرانێکی گەورە هەیە، خەڵکی تورکیا زۆر ناڕەحەتن لەم دۆخەی ئێستا و بەدوای بەدیلدا دەگەڕێن، لە راستیدا ئەگەر درۆ نەمێنێت، حکومەتی ئێستا ناتوانێت جارێکی تر سەربکەوێتەوە، بەڵام ئۆپۆزسیۆن تا ئێستا بەدیلێکی باشی دروست نەکردوە، بەپێی ڕای ئێمە و داتاکان، حزبەکەمان ئەنجامی هەڵبژاردن دیاری دەکات و ڕۆڵی ئێمە لەم قۆناغەدا زۆر گرنگە.
گرنگ ئەوەیە ئێمە باسی ئەم ڕاستییە بکەین؛ پارتەکانی ئۆپۆزسیۆن سیاسەتێکی بەهێزیان بۆ گەلی تورکیا نیە، تا ئێستا چەندین جار ئه‌وه‌مان بۆ رونبوه‌ته‌وه، بۆ نمونە لە پرۆسەی لابردنی پارێزبەندی پەرلەمانتاران لایه‌نه‌كانی ئۆپۆزسیۆن له تاقیکردنەوەی دیموکراسی دەرنەچون، بەهەمان شێوە لە كۆبونەوەی گشتیی مەجلیسدا پێشنیازەكانی جەنگ تێپەڕێنران و هیچ كاردانەوەیەكیان لە دژی نیشان نەدا، لەم قەیرانە ئابورییەدا بەرنامە و چالاکییان نییە، بۆیە ئەو شەش لایەنە ناتوانن بەم شێوەیە ئەم وڵاتە بەڕێوەببەن، ناتوانن چاره‌سه‌ری کێشەکانی تورکیا بكه‌ن.
خه‌ندان: جه‌نابیشت باستكرد، راپرسیه‌كان ئاماژه به‌وه‌ده‌كه‌ن، كه شه‌ش لایه‌نه ئۆپۆزسیۆنه‌كه و ئاکپارتی و مەهەپەش لەلایەکی دیکەوه ناتوانن دەنگی پێویست بۆ دروستکردنی حکومەت بهێنن، ئێوە لەکاتەدا لە کام بەرەیە دەبن؟
ئه‌برو گونای: بەڵێ راستە. بەپێی داتاکان هەردو لایەن ناتوانن حكومه‌ت پێكبهێنن، ژمارەی دەنگی هەردولا بەشی ئەوە ناکات، دەسەڵات، دەسەڵاتی لەدەستداوە، بەڵام هێشتا ئۆپۆزسیۆن هێزێکی یەکگرتوی پێکنەهێناوە، لێرەدا دەبێت شتێک ڕون بکەینەوە، لە تورکیا هەم حکومەت و هەم ئۆپۆزسیۆن لە زۆر پرسدا هاوشێوەن، بە تایبەت لە روی چارەسەرکردنی کێشەی کوردەوە هەردولا لەیەک دەچن، هیچ بەرنامە و پلانێکیان نیە لەڕوی کێشەی کوردەوە، بۆیە ئێمە پێی دەڵێین ڕێگای سێیەم، هەر بۆیە پێی دەڵێین هاوپەیمانی دیموکراسی، بەرنامەی ئێمە تاکە بەرنامەیە کە دەتوانێت وەڵامی چارەسەری کێشەی کورد و کێشەکانی تورکیا بێت.
پێشتریش چەندین جار وتومانە ئێستاش دەیڵێم، پێویست ناکات لە لایەک بوەستین، وێنه‌كه بۆ ئێمە زۆر ڕونە، هەرلایەنێک کێشەی کورد چارەسەر بکات و فشارنەخاتە سەر گەلەکەمان و بەپێی پێوەرەکانی دیموکراسی و دادپەروەری و یەکسانی هەڵسوکەوت بکات دەتوانین هاوکارییان بکەین، بەڵام جگە لەوە ئێمە بەشێک نین لە هیچ حزبێک، خۆمان حزبێكی بەهێزین، لایەنی ئێمە لایەنی دیموکراسییە، لایەنی چارەسەرە، ئێمە لەسەر ڕێبازی خۆمان دەڕۆین و بەم شێوەیە درێژە بە کارەکانمان دەدەین، هەر لایەنێک پابەندی ئەم پێوەرانە نەبێت، ئێمە دژی دژی ده‌وه‌ستینه‌وه، چ دەسەڵات بێت چ ئۆپۆزسیۆن.
خه‌ندان: ئێوه كاندیتان ده‌بێت بۆ سه‌رۆك كۆماری توركیا، كێ ده‌بێته كاندید، ژن ده‌بێت یان پیاو؟
ئه‌برو گونای: بۆ ئێمە مرۆڤەکان گرنگ نین، بێگومان کاتێک کاتی هات هاوپه‌یمانێتیه‌كه‌مان دەتوانێت ناوێک پێشنیار بکات، ژن بێت یان پیاو، دەتوانین کاندیدی خۆمان پێشكه‌ش بکەین و لەسەر بنەمای دیموکراسی پشتگیری کاندیدی دیکەش بکەین، ئەمە کارنامەی سەرەکی ئێمە نیە لە ئێستادا.
بۆ ئێمە لە پرۆسەیەکی وادا نە ناو، نە کەس گرنگ نین، بەڵکو پێوەر و ڕێساکان گرنگن، ئێمە لە دۆخی سیاسی تێدەگەین نەک بەپێی تایبەتمەندی تاکەکان، بەڵکو بەپێی پێوەرەکانی دیموکراسی و یەکسانی، لە ڕوانگە و رێبازی ئێمەوە سیاسەت نابێت لەسەر بنەمای تاکەکان بێت بەڵکو لەسەر بنەمای رێباز، لەسەر بەرنامە، لەسەر بنەمای پێوەر بێت، بۆ ئه‌وه‌ش هه‌مو رێكخراوه‌كه‌مان، پێكهاته‌كانمان، بۆرده حزبییه‌كانمان به‌پێی ئه‌م چوارچێوه‌یه كار و ئاماده‌كاری و مشتومڕ له‌سه‌ر ئه‌م بابه‌ته ده‌كه‌ن، ئێمە لە کۆتاییدا بە پشت بەستن بەم بابەتە پێوەرەکانمان دیاری دەکەین، بێگومان كاندیدمان دەبێت و بەدیلێکی بەهێزین، بەڵام ئێمە دەمانەوێت دۆخی سیاسی ئێستا نەک بە تاک بەڵکو بە بەرنامە و نەخشە و پلان بگۆڕین.
خه‌ندان: پێتانوایە ئاکپارتی داواتان لێبکات بۆ ئەوەی لەگەڵیاندا حکومەت دروستبکەن؟
ئه‌برو گونای: بەپێی بارودۆخی سیاسی ئێستا، ئامانجی سەرەکی حکومەتی ئاکەپە دەستبەسەرداگرتنی پارتەکەمان و له‌ناوبردن و شکاندنی دەسەڵاتمانە، بە تایبەت لە 6 بۆ 7 ساڵی ڕابردودا هەمو هێز و دەرفەتەکانیان بۆ له‌ناوبردنی حزبەکەمان کۆکردوه‌تەوە، ئێمە وەک حزب چاوەڕێی ئۆفەرەکەیان نین، ئه‌وان سیاسەتی خۆیان لەسەر لەناوبردنی کورد بەڕێوەدەبەن، ئۆپەراسیۆنی سەربازی لە باشوری كوردستان بەڕێوەدەچێت و ڕۆژئاڤا داگیر دەکات، دوژمنایەتی بەرامبەر بە کورد و دەستکەوتەکانی کورد بە هەمو شێوەیەک ئەنجام دەدرێت، ئێمە هیچ پەیوەندییەکمان بەم عەقڵیەتەی ئێستاوە نییە، چونکە بونی خۆیان، دەسەڵاتی خۆیان لەسەر وێرانکاری ئێمە بنیات دەنێن و بەوپێیە کاردەکەن.
بێگومان بەڕای ئێمە ئاکەپە نایەوێت دەسەڵاتی خۆی لەگەڵ کەسدا بەش بکات، هەر بەو هۆیەشەوە خۆیان لە هەمو دامەزرێنەرەکانیان دورخستەوە، زۆرێک لە دامەزرێنەرانی ئاکەپە ئەمڕۆ پارتەکانی دیکەیان دامەزراندوە، هەر بۆیە دەزانین ئاکەپە نایەوێت دەسەڵات هاوبەش بێت، چونکە ئاکەپە دەیەوێت لەناومان ببات و دەست بەسەر پارتەکەماندا بگرێت و ساڵانێکە هەمو دۆست و هاوسەرکردە و بەڕێوەبەر و ئەندامانی پارتەکەمانی فڕێداوەتە ناو زیندانەکانەوە.
خه‌ندان: ئەگەر داوایەکی وابکات، مەرجی ئێوە بۆ پارتەکەی رەجەب تەیب ئەردۆگان، سەرۆک کۆماری ئێستای تورکیا چیە؟
ئه‌برو گونای: وەک وتم تا مەرجەکانی دیموکراسی جێبەجێ نەکرێت لەگەڵ کەس دانانیشین، تا هێرشەکان بۆ سەر کورد ڕانه‌گیرێت، بۆ ئەردۆگان و بۆ هەمو پارته‌كانی دیكه ڕای ئێمە وەک یەکە، گرنگ ئەوەیە کە پێگەی کورد قبوڵ بکرێت، بۆ ئێمە شتە سەرەکییەکە پێوانەکانە، نیەتێکی پاک بە پێی هاوسەنگی سیاسی، ئێمە پێمان وانییە ئەمڕۆ ئەردۆگان دەسەڵات لەگەڵ ئێمەدا هاوبەش بکات، ئەو دەیەوێت حزبەکەمان دابخات، دۆسیەی داخستنی حزبەکەمان لەسەر داوای ئەو کراوەتەوە، هەمو فشارەکان لەسەر حزبەکەمان لەسەر داوای ئەو ئەنجام دەدرێن، بۆ ئەوەش نەک تەنها بۆ ئەردۆگان، بەڵکو بۆ هەموان پێوەرەکانمان ڕونن، كه دیموکراسی و یەکسانی و پێوەرەکانی دادپەروەرییە.
خه‌ندان: بابه‌تی پرۆسەی چارەسەری کە لە ساڵی 2013 نزیک بو لەوەی بگاتە قۆناغی کۆتایی، ئێستا هیچ ئاسۆیەک هەیە بۆ ئەوەی جارێکی دیکە پرۆسەی چارەسەری بەرێگای ئاشتی دەستپێبکاتەوە؟
ئه‌برو گونای: بە دڵنیاییەوە، هیوای ئاشتی هەمیشە زیندوە لای ئێمە، هەمو کار و ماندوبونەکانمان بۆ ئاشتییەکی بەردەوام و شەرەفمەندانەیه، هیچ ده‌سه‌ڵاتێك بۆ هه‌میشه نامێنێته‌وه و به دڵنیاییه‌وه ئه‌م عه‌قڵییه فاشیستییه له‌ناوده‌چێت، لە جیهاندا چەندین پرۆسەی ئاشتی هەبوە، لە ئەنگۆلا، لە ئێرلەندا، لە باشوری ئەفریقا و چەندین شوێنی تر، ئەگەر شێوازی دانوستاندنی دیموکراسی لە تورکیا دابمەزرێت، هەنگاوی سەلامەت و دڵسۆزانە بنرێت، بێگومان ئاشتی مومکینە، موخاتەبی ئەم پرسە ئۆجەلانە، ئۆجەلان هەمیشە کاردەکات و ئامادەیە بۆ چارەسەر، زۆرجار داوای ئەو ئه‌وه‌ی کردوە کە دەتوانێت لە ماوەیەکی زۆر کەمدا دەرگایەک بۆ ئاشتی بکاتەوە.
هێزی یەکلاکەرەوە بۆ ئاشتی پێویستە، پێویستە هەمو لایەنەکانی به متمانە بەخۆبون و دڵسۆزییه‌وه لەگەڵ چارەسەرکردن بن، پێویستە هەمو لایەنەکان بە سەبرەوە کار لەسەر هەمو هەنگاوێکی ئاشتی بکەن، بەڵام بەداخەوە حکومەتێکی بەتاڵ هەیە کە کار بۆ بەرژەوەندی خۆی دەکات، تاکە مەبەستی درێژکردنەوەی ماوەی دەسەڵاتەکەیەتی، بەم عەقڵیەتە ئەو ئارامییەی کە هەمو گەلی تورکیا شایەنییەتی بەداخەوە مومکین نییە، بەڵام وەک وتم جیهان گۆڕاوە و بێگومان ڕۆژێک دێت ئاشتی لەسەر ئەم زەوییە بڵاودەبێتەوە، ئەمەیە کە ئێمە خەباتی بۆ دەکەین.
خه‌ندان: ئێستا ئێوە چەن ئەندام یان لایەنگرتان لە زیندانەکانی تورکیادان؟
ئه‌برو گونای: لە تەمموزی 2015ەوە کە یه‌كلایه‌نه کۆتایی بە پڕۆسەی ئاشتی و چاره‌سه‌ری هێنرا، هێرش و گوشارێکی گەورە بۆ سەر حزبەکەمان ده‌ستیپێكردوه، ئاکه‌پە بە هەمو دەسەڵاتی دەوڵەتەوە هێرشی کردە سەر پارتەکەمان، لەو ڕۆژەوە تا ئێستا زیاتر لە 20 هەزار ئەنداممان دەستگیرکراون، نزیکەی 10 هەزار کەسیان تا ئێستا له زینداندان، تا ئەمڕۆش هێرش و گوشار و گرتن و دەستبەسەرداگرتن بەردەوامە.