هەواڵی ئەمڕۆ

سەدر: دەبێت لە یەک هەفتەدا پەرلەمان هەڵبوەشێتەوە

04:45 - 10/08/2022

2319جار خوێندراوەتەوە

خەندان-

موقتەدا سەدر، رێبەری رەوتی سەدر پەیامێکی نوێی لەبارەی دۆخی عێراق و بەردەوامی خۆپیشاندانەکان بڵاوکردەوە و رایگەیاند، بەهۆی ئەوەی پەرلەمان هەمو وادە دەستورییەکانی تێپەڕاند و نەیتوانی سەرۆک کۆمار و سەرۆک وەزیرانی راسپێردراو هەڵبژێرێت، بۆیە داوا لە ئەنجومەنی باڵای دادوەری و دادگای فیدڕاڵی دەکات کە لە یەک هەفتەدا پەرلەمان هەڵبوەشێننەوە.

پێویستە پەرلەمان هەڵبوەشێنرێتەوە بەبێ ئەوەی کۆبونەوەی پەرلەمان بکرێت

موقتەدا سەدر ئەمڕۆ لە پەیامێکدا ئاماژەی بەوەشکرد، رەنگە هەندێک لایەن باوەڕیان وابێت هەڵوەشاندنەوەی پەرلەمان پێویستی بە کۆبونەوەی پەرلەمان هەیە تا بە دەنگدان ئەو پرسە یەکلایی بکرێتەوە، ئەوان ئەو بوچونە رەتدەکەنەوە بە بۆچونی ئەوانەی دەزانن کە بەدوای پشک پشکێنە، بەردەوامی گەندەڵی و جێبەجێنەکردنی داخوازییەکانی هاوڵاتیان دەگەڕێن.

 گومانی چاک بە دەسەڵاتی دادوەری دەبەین هەرچەندە دەزانین فشاری سیاسی و ئەمنیش لەسەریان هەیە

ئەوەشی خستوەتەڕو، پەیامێک ئاڕاستەی سەرۆکی ئەنجومەنی باڵای دادوەری دەکات و داوای لێدەکات بڕیار بدات بۆ راستکردنەوەی رێڕەوی پرۆسەی سیاسی، بەتایبەت دوای ئەوەی پەرلەمان پابەندی وادە دەستورییەکان نەبو بۆ هەڵبژاردنی سەرۆک کۆمار، راسپاردنی سەرۆک وەزیران و پێکهێنانی حکومەتی پشک پشکێنە و سازان لەجێگەی حکومەتی زۆرینەی نیشتیمانی، بۆیە تائێستا گومانی چاک بە دەسەڵاتی دادوەری دەبەن هەرچەندە دەزانن فشاری سیاسی و ئەمنیش لەسەریان هەیە.

داوا دەکەین سەرۆک کۆمار رۆژی هەڵبژاردن دیاری بکات

موقتەدا سەدر مۆڵەتی یەک هەفتە دەدات بە دەسەڵاتی دادوەری بۆ ئەوەی لەسەر بنەمای "پشێلکارییە دەستورییەکان کە دامەزراوەی یاسادانان ئەنجامی داون"، پەرلەمان هەڵبوەشێنێتەوە، داواش دەکات لە هەنگاوی دواتردا سەرۆک کۆمار کات و رۆژی هەڵبژاردن دیاری بکات بەو مەرج و رێوشوێنانەی دواتر رەوتەکەیان بڵاویدەکاتەوە.

ئومێدم وایە دادگا لە بەرژوەندی گەل بڕیار بدات و گوێ بە فشارەکان نەدات

باسی لەوەشکردوە، داوا لە خۆپیشاندەران دەکات بەردەوام بن لە مانگرتن و سوپاسی خۆڕاگرییان دەکات، جەختیش دەکاتەوە ئەگەر وەڵامی داواکارییەکانیان نەدرێتەوە هەڵوێستی دیکەیان دەبێت، لە هەمان کاتیشدا داوا لە فراکسیۆنی دەستلەکارکێشاوەی سەدر، پەرلەمانتاران، چالاکوان و خۆپیشاندەران دەکات بە رێگەی یاسایی سکاڵا لەسەر پەرلەمان، لە دادگای فیدڕاڵی عێراق تۆمار بکەن و ئومێدیشی وایە دادگا لە بەرژوەندی گەل بڕیار بدات و گوێ بە فشارەکان نەدات کە لەم پرسەدا روبەروی دەکرێتەوە.