هەواڵی ئەمڕۆ

ئیدارەی خۆسەری داوای راگرتنی هێرشەکانی تورکیا لە روسیا و هاوپەیمانان دەکات

11:53 - 09/08/2022

4076جار خوێندراوەتەوە

خەندان-

ئیدارەی خۆسەری رۆژئاڤای کوردستان رایگەیاند، بێدەنگی روسیا و هاوپەیمانی نێودەوڵەتی بەرامبەر بۆردومانەکانی تورکیا، گومانی ئەوەیان لا دروست دەکات کە لێکتێگەیشتنێک هەیە بۆ رێگەپێدانی ئەنقەرە بۆ هێرشکردنەسەر ناوچەکانی دانیشتوان.

داوا دەکات لایەنەکان بەپەلە دەستوەردان بکەن بۆ راگرتنی هێرشەکانی تورکیا
ئەمڕۆ فڕۆکەیەکی بێ فڕۆکەوانی تورکیا لە قامیشلۆ هێرشیکردەسەر ئۆتۆمبێلێکی هێزەکانی سوریای دیموکرات و لە ئەنجامدا چوار شەرڤان شەهیدبون، پەیوەست بەم بابەتەش ئیدارەی خۆسەری رۆژئاڤای کوردستان لە پەیامێکدا داوا دەکات لایەنەکان بەپەلە دەستوەردان بکەن بۆ راگرتنی هێرشەکانی تورکیا و "مەترسییەکانی ئەنقەرە لەسەر داهاتوی سوریا لەبەرچاو بگرن."
بۆردومانەکان هەوڵێکن بۆ فراوانخوازی زیاتر لەلایەن تورکیاوە
 ئاماژەی بەوەش دەکات، "بەردەوامی بۆردومانکردنی هاوڵاتیان لە شار و گوندەکان هەوڵێکە بۆ فراوانخوازی زیاتر لەلایەن تورکیاوە، ئەوەش ناڕاستەوخۆ پشتیوانییەکی گەورەیە بۆ گروپەکانی وەک داعش و گروپە چەکدارییەکانی دیکە کە ئەنقەرە پشتیوانیان دەکات،  ئەوە جگە لە خاپورکردنی چەندین ناوچەی دانیشتوان."
 بەردەوامی هێرشەکانی تورکیا دەچێتە چوارچێوەی شەڕی راستەوخۆ لە دژی ئیدارەی باکوری سوریا 
ئیدارەی خۆسەری رۆژئاڤای کوردستان ئەوەشی خستوەتەڕو، داوا لە وڵاتانی گەرەنتیکار دەکات فراوانخوازییەکانی تورکیا رەتبکەنەوە و رێگری بکەن لەوەی ناوچەکانیان روبەڕوی هێرش و گرژی زیاتر ببنەوە، بەتایبەت بەردەوامی هێرشەکانی تورکیا دەچێتە چوارچێوەی شەڕی راستەوخۆ لە دژی ئیدارەی باکوری سوریا و سوریا بە گشتی، بێدەنگی ئەو وڵاتانەش بەرامبەر هێرشەکانی تورکیا گومانی ئەوەیان لا دروست دەکات کە لێکتێگەیشتن هەیە لەنێوانیاندا کە ئەوەش مەترسی هێرشی فراوانتر دروست دەکات.

نیشانەکردن

رۆژئاوای کوردستان