هەوڵێکی گەورەی هەڵاتن لە کەمپی هۆڵ پوچەڵکرایەوە

09:21 - 06/08/2022

3656جار خوێندراوەتەوە

خەندان-

لەلایەن هێزە ئەمنییەکانی سەر بە ئیدارەی باکور و رۆژهەڵاتی سوریا، هەوڵێکی گەورەی هەڵاتن  لەناو کەمپی هۆڵ پوچەڵکرایەوە و چەندین چاڵ و تونێلیش دۆزرانەوە کە شانە نوستوەکانی داعش لەناو کەمپەکەدا بەمەبەستی ئەنجامدانی تاوانی کوشتن هەڵیانکەندبون.

سایتی ئەلعەرەبیە، ئەمڕۆ شەممە بڵاویکردوەتەوە،"هێزە ئەمنییەکانی ئیدارەی باکور و رۆژهەڵاتی سوریا، توانیان هەوڵێكی هەڵاتنی بەکۆمەڵ لە رێگەی بارهەڵگرەوە هەڵبوەشێننەوە کە نزیکەی 39 منداڵ و 17 ژنیان تێدابو، کە سەرجەمیان خێزانی سەر بە داعش بو، دواتریش لە هەڵمەتێکی گەڕان و پشکنیندا توانیان ژمارەیەک چاڵ و تونێل ناو کەمپەکەدا بدۆزنەوە".

 ئەو چاڵ و تونێلانە لەلایەن شانە نوستوەکانی داعش کە عێراقی و سوری بون بە ئامێری سەرەتایی هەڵکەندراون

بە وتەی دەزگا ئەمنییەکان، ئەو چاڵ و تونێلانە لەلایەن شانە نوستوەکانی داعش کە عێراقی و سوری بون بە ئامێری سەرەتایی هەڵکەندراون  و مەبەستی ئەنجامدانی کردەوەی، رفاندن و کوشتن بەکارهێندراون.

شانە نوستوەکانی داعش لەناو کەمپەکە و لەدەرەوەشی پەیوەندییان بە باندەکانی قاچاخچێتی بە مرۆڤەوە هەیە

لای خۆشیەوە، هەمرین حەسەن، بەڕێوەبەری کەمپی هۆڵ رایگەیاندوە،"شانە نوستوەکانی داعش لەناو کەمپەکە و لەدەرەوەشی پەیوەندییان بە باندەکانی قاچاخچێتی بە مرۆڤەوە هەیە، ئەویش لەرێگەی ئامێرەکانی پەیوەندیکردن و تۆڕە کۆمەڵایەتییەکانەوە، بە تایبەت لە پارێزگای ئیدلب و ناوچەکانی باکوری سوریا کە یەکەمین وێستگەی دانیشتوانی کەمپەکەیە لەدوای سەرگرتنی هەوڵی هەڵاتنیان لەناو"کەمپەکەدا".

کە لەنێوانیاندا ئەو ژنە داعشانە هەن کە تۆمەتبارن بە دروستکردنی شانەی تیرۆرستی  دەربازکردنی خێزانە داعشییەکان

ئاشکراشیکرد،"هێزەکانی سوریای دیموکرات بە هاوکاری هاوپەیمانی نێودەوڵەتی و سوپای ئەمریکا ماوەی چەند ساڵێكە چەندین تۆڕی قاچاخچێتی بە مرۆڤیان دەستگیرکردوە، کە لەنێوانیاندا ئەو ژنە داعشانە هەن کە تۆمەتبارن بە دروستکردنی شانەی تیرۆرستی  دەربازکردنی خێزانە داعشییەکان".

بەردەوام، لەناو بەشەکانی کەمپەکەدا ئەم جۆرە هەوڵانە لەلایەن هاوسەری چەکدارانی داعشەوە دەدرێن

وتیشی،"بەشێوەیەکی بەردەوام، لەناو بەشەکانی کەمپەکەدا ئەم جۆرە هەوڵانە لەلایەن هاوسەری چەکدارانی داعشەوە دەدرێن، کە رۆڵی نێوەنگیردەبینن لەنێوان دانیشتوانی کەمپەکە و شانە نوستوەکانی داعش لە دەرەوەی کەمپەکە و گەیاندنی هاوکاری ماددی پێیان".