خەندان نوێترین زانیاری لەبارەی دابەشکردنی موچە لە سلێمانی بڵاودەکاتەوە

09:57 - 06/07/2022

21624جار خوێندراوەتەوە

خەندان-

لە ماوەی چەند رۆژی رابردودا بەهۆی کێشەی نەبونی سیولە لە بانکەکانی سلێمانی دابەشکردنی موچەی چەند وەزارەت و فەرمانگەیەک لە وادەی دیاریکراوی خۆیاندا خەرج نەکرا، بەرپرسێکی گەنجینەکانی سلێمانییش رایگەیاند، لەئێستادا سیولەی پێویست گەیشتوەتە بانکەکان و سبەی دابەشکردنی موچە کۆتایی دێت.

سبەی پێنجشەممە موچەی ئەو وەزارەتانەی کە ماون دابەشدەکرێت

سەرچاوەیەک لە گەنجینەکانی پارێزگای سلێمانی بە خەندان-ی راگەیاند، ئەمڕۆ و دوێنێش کاری لەپێشینە دراوە بە دابەشکردنی موچە خانەنشینانی مەدەنی و هەوڵ دراوە ئەو کەسانە پێش وەزارەتەکانی دیکە موچەکانیان خەرج بکرێت، بۆ سبەی پێنجشەممەش موچەی ئەو وەزارەتانەی کە ماون دابەشدەکرێت.

 بەهۆی نەبونی سیولە لە بانکەکانی سلێمانی دابەشکردنی موچە بۆ سبەی پێنجشەممە دواخرا
بەگوێرەی خشتەی دابەشکردنی موچەی وەزارەتی دارایی و ئابوری هەرێم، بڕیاربو ئەمڕۆ چوارشەممە موچەی هەردو وەزارەتی خوێندنی باڵا و توێژینەوەی زانستی و شارەوانی و گەشتوگوزار دابەشبکرێت، بەڵام بەهۆی نەبونی سیولە لە بانکەکانی سلێمانی دابەشکردنی موچە بۆ سبەی پێنجشەممە دواخرا.
پێیمان راگەیەنراوە کە دابەشکردنی موچەکانمان بۆ کاتێکی دیکە دواخراوە

بەگوێرەی زانیارییەکان کە خەندان لە بەشێک لە فەرمانبەرانی هەردو وەزارەتی خوێندنی باڵا  و شارەوانی و گەشتوگوزار دەستیکەوتوە، ئەمڕۆ کە وادەی دابەشکردنی موچەکانیان بوە، پێیان راگەیەنراوە بەهۆی نەبونی سیولە لە بانکەکانی سنوری پارێزگای سلێمانی، دابەشکردنی موچەکانیان بۆ کاتێکی دیکە دواخراوە.

ئەگەر رۆژی هەینیش پێویست بکات بانکەکان کراو دەبن بۆ دابەشکردنی موچە

پێشوتریش بەرپرسانی وەزارەتی دارایی و ئابوری هەرێمی کوردستان رایانگەیاندبو، دڵنیایی دەدەن بە سەرجەم فەرمانبەران کە دابەشکردنی موچەی سەرجەم وەزارەتەکان پێش جەژنی قوربان کۆتایی پێدەهێنرێت، تەنانەت ئەگەر رۆژی هەینیش پێویست بکات بانکەکان کراوە دەبن بۆ دابەشکردنی موچەی ئەو شوێن و وەزارەتانەی کە بەهەر هۆکارێک موچەکانیان دوادەکەوێت.

ئەوەی لە میدیادا باس دەکرێت ئەوە نیە کە لە واقیعدا هەیە

17ی ئایاری ئەمساڵیش هیوا قەرەنی، سەرپەرشتیاری ئیدارەی ڕاپەڕین بە خەندان-ی راگەیاند، لەکۆبونەوەیاندا لەگەڵ سەرۆکی حکومەتی هەرێم لەبارەی نەبونی سیولە لە بانکەکانی سنوری سلێمانی، رونیانکردوەتەوە کە پێشتر بەهاتنی 200 ملیارەکە لە بەغدا ئەو فشارە نەدەکەوتەسەر داهاتی ناوخۆ بۆ تەواوکاری موچە، بەڵام بەهۆی ئەوەی لەمساڵدا تەنها دوجار 200 ملیارەکە هاتوە  ئەوەش بەشێکی هۆکاری کورتهێنانی داهات بو بۆ دابەشنەکردنی موچە، بەشێکی دیکەش ئەوەیە داهاتی ناوخۆ ژمارەیەک داهاتی سنوردارن و بەئاسانی زیاد و کەم ناکرێن، بۆیە لە کۆبونەوەکەدا هەمو لایەنەکان گەیشتنە ئەو باوەڕەی ئەوەی لە میدیادا باس دەکرێت ئەوە نیە کە لە واقیعدا هەیە.

نیشانەکردن

موچە حکومەتی هەرێم