ئۆکرانیا هۆشداری دەدات و ناتۆ ئامادەیە ... پوتن لەماوەی یەک ساڵدا ئەوروپا داگیردەکات

02:27 - 30/06/2022

9565جار خوێندراوەتەوە

خەندان-

لەگەڵ پێشوازیکردنی دەوڵەتانی ئەندام لە پەیمانی باکوری ئەتڵەسی(ناتۆ) لە بە ئەندامبونی هەریەکە لە سوید و فینلاند لە هاوپەیمانێتییەکەیان، مەترسی لەسەر داگیرکردنی زیاتری ئەوروپا لەلایەن ڤلادیمێر پوتن، سەرۆکی روسیاوە لە ئارادایە.

بەگوێرەی راپۆرتێکی ماڵپەڕی ئەلحوڕە پەیمانی باکوری ئەتڵەسی بەڵێن بە ئۆکرانیا دەدات کە لە هاوکاریەکانی بەردەوام بێت، تا ئەو کاتەی لەبەرەنگاربونەوەی"دڕندەیی"روسیا پێویست بکات، هاوکات لەندەن و واشنتنیش رایانگەیاند، هاوکارییە سەربازی و ئابورییەکانیان بۆ ئۆکرانیا زیاتردەکەن".

 رەزامەندیان لەسەر پلانی هاوکارییە نوێیەکان دەربڕیوە

ئاژانسی هەواڵی فرانس پرێس بڵاویکردوەتەوە،" لە راگەیەندراوێکی هاوبەشدا دەوڵەتانی ئەندام لە ناتۆ رایانگەیاندوە، رەزامەندیان لەسەر پلانی هاوکارییە نوێیەکان دەربڕیوە کە خۆی لە رادەستکردنی کەرەستەی سەربازی ئاسایی و بەهێزکردنی بەرگری ئۆکرانیا دژی هێرشە ئەلیکترۆنیەکان دەبینێتەوە".

 دڕندەییە ترسناکەکەی روسیا هۆکارە بۆ کۆمەڵێک لە گرفتی مرۆیی قورس

ئاماژەیان بەوەشکردوە، دڕندەییە ترسناکەکەی روسیا هۆکارە بۆ کۆمەڵێک لە گرفتی مرۆیی قورس و شەپۆلێکی بەهێزی کۆچی بەکۆمەڵ، دەبێت مۆسکۆ بەرپرسیارێتی تەواوی ئەم کارەساتانە هەڵبگرێت، بۆیە دەبێت هاوکارییەکان بۆ ماوەی چەند مانگێکی دیکەش بۆ ئۆکرانیا وڵاتە بەردەوام بێت.

ترس لە داگیرکردنێکی نوێ

جێنس ستۆڵتنبێرگ، ئەمینداری گشتی ناتۆ دوێنێ چوارشەممە رایگەیاندوە،" تائەو کاتەی پێویست دەکات، ئۆکرانیا دەتوانێت پشت بە ئێمە ببەستێت، ئەمە پابەندییەکی ئەخلاقی و سیاسی هاوپەیمانێتیەکەمانە".
هاوکات ڤۆلۆدیمێر زلێنسکی، رایگەیاندوە، لەماوەی نزیکەی ساڵێکدا، روسیا هێرش دەکاتە سەر دەوڵەتە ئەوروپیەکانی دیکەش جگە لە ئۆکرانیا، دەوڵەتە ئەوروپییەکان هاوکارییەکانیان بۆ کیێڤ چڕ نەکەنەوە، چونکە روسیا ئامانجی زیاتری دەوڵەتانی ئەوروپایە.

پرسیارەکە ئەمەیە، دوای کیێڤ نۆرەی کوێیە؟

وتیشی،" پرسیارەکە ئەمەیە، دوای کیێڤ نۆرەی کوێیە؟ مۆڵدۆزڤا؟ یان دەوڵەتانی بەڵتیق؟یان پۆڵەندا؟، لە راستیدا وەڵامەکە هەمویانە".

 روسیا دەیەوێت شەڕەکەی بباتە دەرەوەی سنورەکانی ئۆکرانیا

لەسەر هەمان پرس تۆڕی هەواڵی NBC NEWS لەسەر زاری، ئەندری یەرماک، بەڕێوەبەری نوسینگەی سەرۆکی ئۆکرانیا، ئاشکرایکرد،" روسیا دەیەوێت شەڕەکەی بباتە دەرەوەی سنورەکانی ئۆکرانیا و بیباتە ناو دەوڵەتانی ئەندام لە ناتۆ".

ئەگەر روسیا لە ئۆکرانیا نەوەستێت، بە دڵنیاییەوە ناتۆ راپێچی ناو جەنگ دەکات

هاوکات ناوبراو لە بڵاوکراوەیەکیدا لە تۆڕی کۆمەڵایەتی تێلیگرام، نوسیویەتی،" مرۆڤایەتی لەژێر هەڕەشەدایە، بەهۆی داگیرکارییەکانی روسیاوە، ئەمەش تەنها لە ئەوروپادا نییە،  ئەگەر روسیا لە ئۆکرانیا نەوەستێت، بە دڵنیاییەوە ناتۆ راپێچی ناو جەنگ دەکات".

لەلایەکی دیکەشەوە، لەدوای راگەیاندنی بە ئەندامبونی سوید و فینلاند لە ناتۆ، پوتن رایگەیاند،کێشەمان لەگەڵ سوید و فینلاند نیە، ئەوانەی دەیانەوێت پەیوەندی بە ناتۆوە بکەن با بیکەن ، بەڵام گەر پەیمانی باکوری ئەتڵەسی(ناتۆ) دەستبکات بە دروستکردنی ژێرخانی ئابوری لە سوید و فینلاند، روسیا هاوشێوەی ئەوە وەڵامدەداتەوە.

دەبێت لەوە تێبگەن پێشتر هیچ هەڕەشەیەک لە ئارادا نەبو

باسی لەوەشکرد،" دەبێت لەوە تێبگەن پێشتر هیچ هەڕەشەیەک لە ئارادا نەبوە، بەڵام ئێستا گەر یەکە سەربازی و ژێرخانی ئابوری لەوێ بڵاوبکرێنەوە، ئامادەی وەڵامدانەوەی هاوشێوەین، هێندەی هەڕەشە لەسەر خاکەکەمان هەبێت".

هاوکات ئاژانسی هەواڵی روسیا هەر لەسەر زاری پوتنەوە بڵاویکردوەتەوە، بەدوری نازانن، بەهۆی بەئەندامبونیان لە ناتۆ پەیوەندییەکانیان لەگەڵ هلنسنکی و ستۆکۆڵم تێکبچن.

ناتۆ ئامادەیە


رۆژنامەی دەیلی بێست، لەسەر زاری پوتنەوە بڵاویکردوەتەوە، دەوڵەتە گەورەکانی ناتۆ خواستیانە جەخت لە دەسەڵات و خواستە ئیمپریالییەکانیان بکەنەوە ئەمەش مەترسی رودانی پێکدادانی نوێ لە ئەوروپا دروستکردوە، هاوکات سەرکردە ئەوروپییەکان ترسیان لە هێرشی روسیا بۆ دەرەوەی ئۆکرانیا لێنیشتوە.

هێرش بۆ سەر هەر یەکێک لەو دەوڵەتانە بە هێرشی سەر هەمویان هەژماردەکرێت

گەر ئەمەش روبدات و روسیا هێرشبکاتە سەر یەکێک لە دەوڵەتانی سەر بە ناتۆ، ئەگەری هەیە بەندی بەرگری بەکۆمەڵی بنیادی ناتۆ چالاک بکرێت، واتە هێرش بۆ سەر هەر یەکێک لەو دەوڵەتانە بە هێرشی سەر هەمویان هەژماردەکرێت.

 هەر یەکە لە دەوڵەتانی ئیستۆنیا و لاتیڤیا و لیتوانیاش دەگرێتەوە

بەگوێرەی زانیارییەکانی ئەو رۆژنامەیە، ئامانجی داهاتوی پوتن ئۆکرانیا تێدەپەڕێنێت، دەکرێت  پۆڵەندا بگرێتەوە دواتر هەر یەکە لە دەوڵەتانی ئیستۆنیا و لاتیڤیا و لیتوانیاش دەگرێتەوە.

لە نەخشەی رێگەی ستراتیژی نوێ کە لە لوتکەی مەدرید پشتگیری کرا، پۆلێنی هاوپەیمانی روسیا بە " هەڕەشەی گەورە و راستەوخۆ بۆ ئاسایشی هاوپەیمانەکان" کرا".

هاوکات دەوڵەتانی ناو هاوپەیمانێتییەکە  رێکەوتن لەسەر ئەوەی کە بونی هێزی سەربازیان لە بەری رۆژهەڵاتەوە بەرزبکەنەوە، هاوکات هێزی سەربازی ئامادەیان بۆ 300.000( سێ سەد هەزار) سەرباز بەرزبکەنەوە.

هاوکات بڕیارە بنکەی هەمیشەییە فەیلەقی پێنجی سەر بە سوپای ئەمریکا لە پۆڵەندا دابنرێت، کە ماوەیەکی زۆرە پوتن رێگری لێدەکات، هاوکات بڕیارە ژمارەیەک لە فڕۆکەی جەنگی لە جۆری(F-35)بگوازرێنەوە.

بڕیاریانداوە بڕی 1.6ملیار یۆرۆ هاوکاری ئۆکرانیا بکەن

لەلایەکی دیکەشەوە، لەندەن رایگەیاند، بڕیاریانداوە بڕی 1.6ملیار یۆرۆ هاوکاری ئۆکرانیا بکەن کە خۆی لە سیستەمی بەرگری و دژە فڕۆکە و فڕۆکەی بێ فڕۆکەوان دەبینێتەوە.

پوتن سەرکەوتو نابێت لە بەدەستهێنانی ئەو خواستانەی پلانی بۆ داناوەو هیوای پێیەتی

لای خۆشییەوە بۆریس جۆنسن، سەرۆک وەزیرانی بریتانیا وتی،" پوتن سەرکەوتو نابێت لە بەدەستهێنانی ئەو خواستانەی پلانی بۆ داناوەو هیوای پێیەتی، بێ مانایی ئەم جەنگە و دڕندەیی ئەو هێرشانەی دەیکاتە سەر هاوڵاتیانی ئۆکرانی بۆ هەموان رونە".
بەم بڕە نوێیە، بەهای هاوکارییە سەربازییەکانی لەندەن بۆ کیێڤ گەیشتوەتە 2.3ملیار پاوەنە.

لەهەمان کاتدا، ویلایەتە یەکگرتوەکانی ئەمریکا رایگەیاندوە، 1.3ملیار دۆلار هاوکاری دیکە دەگەیەنێتە ئۆکرانیا لە چوارچێوەی ئەو پلانەی کە بڕیاری لێداوە بڕی 7.5  ملیار دۆلار، هاوکاری ئەو وڵاتە بکات.