عەبدولستار مەجید: لابردنی وانەی پەروەردەی ئیسلامیی لای ئێمە هێڵی سورە

11:55 - 28/06/2022

1760جار خوێندراوەتەوە

خەندان-

سەرۆکی فراکسیۆنی كۆمەڵی دادگەریی کوردستان لە پەرلەمانی کوردستان رایگەیاند، فراکسیۆنەکەیان باوەڕی وایە لابردنی وانەی پەروەردەی ئیسلامیی و گۆڕینی بۆ بابەتی ئاینناسی "هێڵی سورە" و نابێت بیری لێبکرێتەوە، بۆیە ئەو نیگەرانیەیان گەیاندوە بە سەرۆکایەتی پەرلەمان.

لابردنی وانەی پەروەردەی ئیسلامیی بەلای ئێمەوە هێڵی سورە 
عەبدولستار مەجید، سەرۆکی فراکسیۆنی كۆمەڵی دادگەریی لە پەرلەمانی کوردستان لەراگەیەنراوێکدا باسی لەوەشكردوە، "لابردنی وانەی پەروەردەی ئیسلامیی و گۆڕینی بە بابەتی ئاینناسی بەلای ئێمە و خەڵکی مسوڵمانی کوردستانەوە هێڵی سورە و نابێ وەزارەتی پەروەردە و حکومەت بیر لە هەنگاوێکی لەو جۆرە بکاتەوە".
ئەم نیگەرانیەشمان بە فەرمیی گەیاندوەتە سەرۆکی پەرلەمانی کوردستان
ئاماژەی بەوەشکردوە، "ئەم نیگەرانیەشمان بە فەرمیی گەیاندوەتە بەڕێزان سەرۆکی پەرلەمانی کوردستان و جێگرەکەی و بەسوپاسەوە هەڵوێستی ئەوانیش جێگەی رێزە".
 وەزارەتی پەروەردە رونکردنەوەی لەسەر پرسی گۆڕانکاری لە وانەی پەروەردەی ئیسلامی نەداوە 
هەرچەندە تائێستا وەزارەتی پەروەردەی هەرێم رونکردنەوەی لەسەر پرسی گۆڕانکاری لە وانەی پەروەردەی ئیسلامی نەداوە، بەڵام بەشێک لە بەرپرسانی پارتە ئیسلامییەکانی کوردستان لە بڵاوکردنەوەی دەنگۆی گۆڕینی وانەی پەروەردەی ئیسلامی نیگەرانن و داوا دەکەن پڕۆژەکە رابگیرێت.