بافڵ جه‌لال تاڵه‌بانی له‌گه‌ڵ سه‌ركرده‌كانی چوارچێوه‌ی هه‌ماهه‌نگی كۆده‌بێته‌وه‌

09:06 - 27/06/2022

1800جار خوێندراوەتەوە

خه‌ندان-

بڕیاره‌ ئه‌مشه‌و له‌ماڵی مامجه‌لا له‌ شاری به‌غدا، بافڵ جه‌لال تاڵه‌بانی سه‌رۆكی یه‌كێتیی نیشتمانیی كوردستان له‌گه‌ڵ سه‌ركرده‌كانی چوارچێوه‌ی هه‌ماهه‌نگی كۆببێته‌وه‌ و تاوتوێی دواین پێشهاته‌ سیاسییه‌كانی عێراق بكرێت.

به‌گوێره‌ی زانیاریه‌كانی خه‌ندان، ئه‌مشه‌و بافڵ جه‌لال تاڵه‌بانی پێشوازیده‌كات له‌سه‌ركرده‌كانی چوارچێوه‌ی هه‌ماهه‌نگی، موسه‌ننا سامه‌ڕائی سه‌رۆكی ھاوپه‌یمانی عه‌زم و ره‌یان كلدانی سه‌رۆكی بزوتنه‌وه‌ی بابلیون و بڕیاریشه‌ كۆبونه‌وه‌یه‌كی گرنگ به‌ڕێوه‌بچێت.

 باس له‌دواین پێشهاته‌ سیاسییه‌كانی عێراق و له‌نێویشیاندا پێكهێنانی حكومه‌تی نوێ ده‌كرێت

به‌گوێره‌ی زانیاریه‌كان، له‌كۆبونه‌وه‌كه‌ی نێوان سه‌رۆكی یه‌كێتیی نیشتمانیی كوردستان و سه‌ركرده‌كانی چوارچێوه‌ی هه‌ماهه‌نگی له‌گه‌ڵ موسه‌ننا سامه‌ڕائی و ره‌یان كلدانی باس له‌دواین پێشهاته‌ سیاسییه‌كانی عێراق و له‌نێویشیاندا پێكهێنانی حكومه‌تی نوێ ده‌كرێت.

دوێنێ یه‌كشه‌ممه‌ بافڵ جه‌لال تاڵه‌بانی سەرۆکی یەکێتیی نیشتمانیی کوردستان به‌سه‌ردانێك گەیشتە بەغدا و بڕیاره‌ له‌گه‌ڵ لایه‌نه‌ سیاسیه‌كانی عێراق كۆببێته‌وه‌ بۆ گفتوگۆكردن له‌باره‌ی دۆخی عێراق و پێكهێنانی كابینه‌ی نوێی حكومه‌تی عێراق.

له‌دوای به‌ڕێوه‌چونی هه‌ڵبژاردنی پێشوه‌ختی په‌رله‌مانی عێراق له‌ 10ی (تشرینی یەکەم/10)ی 2021، چه‌ندین جار بافڵ جەلال تاڵەبانی سه‌ردانی به‌غدای كردوه‌ و له‌گه‌ڵ لایه‌نه‌ سیاسیه‌كان كۆبوه‌ته‌وه‌ به‌تایبه‌تی لایه‌نه‌كانی ناو چوارچێوه‌ی هه‌ماهه‌نگی كه‌ یه‌كێتیی نیشتیمانیی كوردستان لێكتێگه‌یشتنی له‌گه‌ڵیدا هه‌یه‌ بۆ پێكهێنانی حكومه‌ت.

نیشانەکردن

بافل تاڵەبانى