وەزیری شارەوانی: 50%ـی کارەکانی پڕۆژەی شەقامی 100 مەتری سلێمانی تەواو بوە

02:54 - 23/06/2022

1448جار خوێندراوەتەوە

خەندان-

وەزیری شارەوانی و گەشتوگوزاری هەرێمی کوردستان پڕۆژەی شەقامی 100 مەتری سلێمانی بەسەر کردەوە و رایگەیاند، سوپاسی کۆمپانیای سەرپەرشتیاری پڕۆژەکە دەکات کە بە گوێرەی وادەی دیاریکراو کاریانکردوە، بەوهۆیەش تائێستا 50%ـی کارەکانی پڕۆژەی شەقامی 100 مەتری سلێمانی تەواو بوە.

50%ی پڕۆژەی شەقامی 100 مەتری سلێمانی تەواو کراوە
ساسان عەونی، وەزیری شارەوانی و گەشتوگوزاری هەرێمی کوردستان ئەمڕۆ پێنجشەممە سەردانی پڕۆژەی شەقامی 100 مەتری سلێمانی کرد و لە لێدوانێکدا بۆ رۆژنامەنوسان باسی لەوەشکرد، ئامانجی سەردانەکەی بەمەبەستی ئاگاداربون بوە لە چۆنیەتی جێبەجێکردنی پڕۆژەکە و ئاستی بەرەوپێشچونی کارەکان، بەتایبەت کە لەئێستادا 50%ی پڕۆژەی شەقامی 100 مەتری سلێمانی تەواو کراوە.
بۆ  زو تەواوکردنی پڕۆژەی شەقامی 100 مەتری، ئەوەی لەتواناماندا بێت کەمتەرخەمی ناکەین
ئاماژەی بەوەشکرد، ژێرخانی پڕۆژەی شەقامی 100 مەتری سلێمانی هەر لە قۆناغەکانی بڕین، پڕکردنەوە، یەکتربڕ و راگری کۆنکرێتی تەواو کراون، ئەوان چاوەڕێی ئەوە دەکەن کۆمپانیای سەرپەرشتیار قۆناغەکانی دیکەش لە وادەی دیاریکراوی خۆیدا جێبەجێ بکات و حکومەتی هەرێمیش ئەوەی لە توانایدا بێت بۆ لابردنی ئاستەنگی بەردەم زو تەواوکردنی پڕۆژەکە، کەمتەرخەمی ناکات.
83%ی داهاتی فەرمانگەکان بۆ پڕۆژەکە خەرج دەکرێت 
پەیوەست بە دابینکردنی بودجەش بۆ پڕۆژەی شەقامی 100 مەتری سلێمانی، وەزیری شارەوانی وتی، لەسەر بڕیاری حکومەت لەئێستادا لە 83%ی داهاتی فەرمانگەکان پارە بۆ پڕۆژەکە خەرج دەکرێت و لە قۆناغی داهاتوشدا لەهەر بودجەیەکی دیکەی پێویست بێت، بۆی تەرخان دەکەن.
پڕۆژە ستراتیژییەکان لەلایەن کۆمپانیای خۆماڵی دروستبکرێن
ئەوەشی خستەڕو، حکومەتی هەرێمی کوردستان خواستی ئەوەیە هەیە پڕۆژە ستراتیژییەکان لەلایەن کۆمپانیای خۆماڵییەوە دروستبکرێن و بۆ ئەو مەبەستەش ئاسانکاری زیاتریان بۆ دەکات.