پۆلیسی كەركوك کەسێک بەتۆمەتی کوشتنی هاوڕێکەی دەستگیردەکات

12:57 - 23/06/2022

1064جار خوێندراوەتەوە


خەندان-
دوای ئەوەی شەوی رابردو تەرمی گەنجێک لە ناوچەی تسعین-ـی ناوەڕاستی شاری كەركوك دۆزرایەوە، ئەمڕۆ بەڕێوەبەرایەتی پۆلیسی کەرکوک دەستگیرکردنی تۆمەتباری روداوەکەی راگەیاند و لە لێکۆڵینەوەکاندا تۆمەتبار دانی بەوەداناوە کە بەهۆی ناکۆکییەوە هاوڕێكەی کوشتوە.

لەکاتی لێکۆڵینەوەکاندا دانی بە تاوانەكەیدا ناوە
بەڕێوەبەرایەتی پۆلیسی کەرکوک ئەمڕۆ پێنجشەممە لەراگەیەنراوێکدا باسی لەوەشکردوە،  دوای دەستپێكردنی لێكۆڵینەوەكان گەیشتون بە سەرەداوی روداوەكە و لەلایەن هێزەكانی نەهێشتنی تاوانەوە تۆمەتبارەکە دەستگیركراوە، لەکاتی لێکۆڵینەوەکانیشدا دانی بە تاوانەكەیدا ناوە.
ناکۆکی لەنێوانیاندا دروستبوە و لەو کاتەشدا سەرخۆش بوە
ئاماژە بەوەشکراوە، تۆمەتبار هۆکاری روداوەکەی بۆ ئەوە گەڕاندوەتەوە کە ناکۆکی لەنێوانیاندا دروستبوە و لەو کاتەشدا "سەرخۆش بوە".
لە كامێرای چاودێریدا دەركەوتوە، کە لەگەڵ هاوڕێكانیدا دەبێتە شەڕیان
شەوی رابردو 22ـی حوزەیران، تەرمی گەنجێك لە ناوچەی تسعین-ـی ناوەڕاستی شاری كەركوك دۆزرایەوە، كە چەكدارێكی سەر بە لیوای 16ـی میحوەری باكوری حەشدی شەعبی بوە و لە كامێرای چاودێریدا دەركەوتوە، کە لەگەڵ هاوڕێكانیدا دەبێتە شەڕیان.

نیشانەکردن

کەرکوک