ئێران و قەتەر لەسەر گەشەدان بە پەیوەندییە ئابورییەکانیان رێکەوتن

02:32 - 12/05/2022

554جار خوێندراوەتەوە

خەندان-
ئەمڕۆ لە میانەی سەردانەکەی وەفدی قەتەر بۆ ئێران، بەرێوەبەری گشتی کاروباری دەوڵەت لە وەزارەتی پیشەسازی و بازرگانی قەتەر لەگەڵ سەرۆکی رێکخراوی گەشەپێدانی بازرگانی ئێران کۆبوەوە و هەردولا جەختیان لە پەرەدان بە پەیوەندییە ئابوریەکانیان کردەوە.

هەردولا جەختیان لە پەرەدان بە پەیوەندییە ئابورییەکانی نێوانیان کردەوە

ئەمڕۆ پێنجشەممە، لە تارانی پایتەخت، شێخ ئەحمەد راهن، بەرێوەبەری گشتی کاروباری دەوڵەت لە وەزارەتی پیشەسازی و بازرگانی قەتەر  لەگەڵ عەلی رەزا بیمان پاک سەرۆکی رێکخراوی گەشەپێدانی بازرگانی لە ئێران کۆبوەوە و هەردولا جەختیان لە پەرەدان بە پەیوەندییە ئابورییەکانی نێوانیان کردەوە.

هاوکات لە کۆبونەوەکەدا جەخت لەو رێکەوتنانەی هەردولا کرایەوە کە پێش سێ مانگ لە کاتی سەردانی ئایەتوڵا ئیبراهیم رەئیسی بۆ ئەو وڵاتە واژۆ کرابون.

 پێداچونەوە بەو تەوەری هەماهەنگیانەی نێوان تاران و دەوحە کە بڕیارە لە هەشتەمین کۆبونەوەی هەماهەنگی ئابوری لە مانگی داهاتودا بخرێنە رو کرا

ئەمە جگە لە پێداچونەوە بەو تەوەری هەماهەنگیانەی نێوان تاران و دەوحە کە بڕیارە لە هەشتەمین کۆبونەوەی هەماهەنگی ئابوری لە مانگی داهاتودا بخرێنە رو.

میری قەتەر بەسەرۆکایەتی شاندێکی باڵای وڵاتەکەی سەردانی ئێرانی کرد 

ئەمڕۆ پێنجشەممە میری قەتەر بەمەبەستی چاودێریکردنی رێککەوتنە سیاسی و ئابورییەکانی نێوان تاران و دەوحە، بەسەرۆکایەتی شاندێکی باڵای وڵاتەکەی سەردانی ئێرانی کرد و لەلایەن ئیبراهیم رەئیسی، سەرۆک کۆماری ئێران پێشوازی لێکرا.

بڕیارە پرسی هەڵگرتنی قەدەغەی پارە بلۆککراوەکانی ئێران لەقەتەر گفتوگۆی لەسەر بکرێت

لە سەردانەکەدا بڕیارە پرسی هەڵگرتنی قەدەغەی پارە بلۆککراوەکانی ئێران لەقەتەر گفتوگۆی لەسەر بکرێت کە پێشتر شاندی دانوستانکاری هەردو وڵات لەبارەیەوە چەندجارێک کۆبونەتەوە.

لەئێستادا قەتەر و کۆماری ئیسلامی ئێران پەیوەندییەکی بەهێزی بازرگانی، ئابوری و سیاسیی لەنێوانیاندا هەیە، بەجۆرێک تاران و دەوحە بۆ میوانداریکردنی مۆنديالی قەتەر-2022 چەندین رێککەوتنی هاوکارییان واژۆ کردوە.