ئیلۆن مه‌سك ئۆفه‌رێك بۆ كڕینه‌وه‌ی ته‌واوی پشكه‌كانی تویته‌ر پێشكه‌شده‌كات

02:25 - 15/04/2022

2578جار خوێندراوەتەوە

خەندان

ئیلۆن مه‌سك به‌ڕێوه‌به‌ری جێبه‌جێكاری كۆمپانیای تێسلا و یه‌كێك له‌ ده‌وڵه‌مه‌ندترینه‌كانی جیهان ئه‌مڕۆ هه‌ینی رایگه‌یاند، له‌پێناو دروستكردنی پلاتفۆرمێكی ئازادانه‌ و په‌روه‌رده‌كردنی نه‌وه‌ی داهاتو له‌سه‌ر ئازادی راده‌ربڕین، بێ بیركردنه‌وه‌ له‌ بازرگانیكردن ئاماده‌یه ته‌واوی پشكه‌كانی كۆمپانیای تویته‌ر بكڕێته‌وه‌.

به‌پێی تۆڕی هه‌واڵی Reuters، ئیلۆن مه‌سك رایگه‌یاندوه‌، بڕی 43.000.000.000 (چل و سێ ملیار) دۆلار پێشكه‌ش به‌ به‌رپرسان و خاوه‌ن پشكه‌كانی كۆمپانیای تویته‌ر ده‌كات له‌ پێناو ده‌ستبه‌رداربونیان له‌ ته‌واوی تویته‌ر.

ئامانجی سه‌ره‌كی من بریتیه‌ له‌ پلاتفۆرمێك تا هاوڵاتیان بتوانن به‌شێوه‌یه‌كی ئازادانه‌ راوبۆچونه‌كانیان بخه‌نه‌رو 
وتیشی، "ئه‌وه‌ی من ده‌مه‌وێت بریتی نییه‌ له‌ بازارگانیكردن و دروستكردنی پلاتفۆرمێك بۆ به‌ده‌ستهنانی پاره‌ و سه‌روه‌ت و سامان، به‌ڵكو ئامانجی سه‌ره‌كی من بریتیه‌ له‌ پێكهێنانی ده‌سته‌یه‌كی ته‌واو له‌ شاره‌زایان له‌ پێناو پێشكه‌شكردنی پلاتفۆرمێك تا هاوڵاتیان بتوانن به‌شێوه‌یه‌كی ئازادانه‌ راوبۆچونه‌كانیان بخه‌نه‌رو، من هیچ بیرم له‌لای ئابوری و سه‌رمایه‌ نییه‌".
زۆر گرنگه‌ ببینه‌ پێشه‌نگ بۆ ئه‌و وڵاتانه‌ی كه‌ ده‌یانه‌وێت ئازادی له‌ وڵاته‌كه‌یان به‌رقه‌رار بكه‌ن
ئاماژه‌ی به‌وه‌شكردوه‌، "زۆر گرنگه‌ ئازادی مافی تاك كه‌ له‌ ئه‌مریكا بانگه‌شه‌ی بۆده‌كه‌ین بیخه‌ینه‌ بوارێكی به‌رفراوانتره‌وه‌ و ببینه‌ پێشه‌نگ بۆ ئه‌و وڵاتانه‌ی كه‌ ده‌یانه‌وێت ئازادی له‌ وڵاته‌كه‌یان به‌رقه‌راربكه‌ن، زۆر بێزاركه‌ره‌ كاتێك رقت له‌ كه‌سێك ده‌بێته‌وه‌ و ئه‌و كه‌سه‌ش قسه‌یه‌ك ده‌كات كه‌ تۆ پێت هه‌زم ناكرێت، ئه‌وه‌ش یه‌كێكه‌ له‌ رێگاكان بۆئه‌وه‌ی كاریگه‌ری له‌سه‌ر ئازادی راده‌ربڕن جێبهێڵێت".
ئاماجی من بۆ كڕینه‌وه‌ی تویته‌ر بریتیه‌ له‌وه‌ی نه‌وه‌كانی داهاتو له‌سه‌ر ئازادی راده‌ربڕین په‌روه‌رده‌یان بكه‌ین
ئیلۆن مه‌سك باسی له‌وه‌شكردوه‌، "ئاماجی سه‌ره‌كیم له‌ هه‌وڵدان بۆ كڕینه‌وه‌ی تویته‌ر بریتیه‌ له‌وه‌ی نه‌وه‌كانی داهاتو له‌سه‌ر ئازادی راده‌ربڕین و فه‌راهه‌مكردنی ته‌واوی ئازادییه‌كان رابهێنین و په‌روه‌رده‌یان بكه‌ین".

نیشانەکردن

ئیلەن مەسک