هەواڵی ئەمڕۆ

یەکگرتو: دەسەڵاتی کوردی نەیتوانیوە لەئاست قەبارەی قوربانییەکانی ئەنفال بێت

04:53 - 13/04/2022

808جار خوێندراوەتەوە

خەندان-

ئەنجومەنی جێبەجێکردنی یەکگرتو رایگەیاند، دوای 34 ساڵ بەسەر مەرگەساتی ئەنفال واقعی حاڵی کەسوکاری جینۆساید کراوان بە زمانی پڕ حەسرەتەوە لە دەسەڵاتی کوردی دەپرسێت "وێڕای بەخشینی دەیان هەزار قوربانی و زیان لێکەوتنی ماددی بێ ئەژمار، کوا چیتان کردوە بۆ سرینەوەی ئاسەواری تاڵی ئەو مەرگەساتە، بۆیە جێگای داخە دوای سی ساڵ حوکمڕانی، دەسەڵات نەیتوانیوە لە ئاست قەبارەی قوربانییەکان بێت".

 هەردەم دیمەنی بە ئازاری 182 هەزار پەپولەی زیندە بەچاڵکراومان زاکیرەی نەتەوەیی و نیشتمانیمان دەهەژێنێ 
ئەنجومەنی جێبەجێکردنی یەکگرتوی ئیسلامی کوردستان بۆ یادی 34 ساڵه‌ی ئەنفال پەیامێکی بڵاوکردەوە و ئاماژەی بەوەشکردوە، "سی و چوار ساڵ یادی مەرگەساتی پرۆسەکانی بە ناو ئەنفال ، بۆ هەتایە کارەساتێکی نیشتمانی پڕاوپڕ گریان و ژانە ، کە هەردەم دیمەنی بە ئازاری 182 هەزار پەپولەی زیندە بەچاڵکراومان زاکیرەی نەتەوەیی و نیشتمانیمان دەهەژێنێ و ، خەم و برینەکانمان سوێ دەکاتەوە ، رژێمی روخاوی بەعس لە چەند پرۆسەیەکی دڕندانەی سەربازیدا ، سیاسەتی جینۆسایدی کوردانی بەرپا کرد و ، ژیان و ژینگە و ماڵ و مزگەوت و باخ و بێستانی زیاتر لە پێنج هەزار گوند و لادێی ئاوەدانی کردە وێرانە".
کوا چیتان کردوە بۆ سرینەوەی ئاسەواری تاڵی ئەو مەرگەساتە؟
ئەوەش هاتوە، "دوای 34 ساڵ لەو کارەساتە، واقعی حاڵی کەسوکاری جینۆساید کراوان بە زمانی پڕ ئاه و حەسرەتەوە لە دەسەڵاتی کوردی دەپرسێت: وێڕای بەخشینی دەیان هەزار قوربانی و زیان لێکەوتنی ماددی بێ ئەژمار، کوا چیتان کردوە بۆ سرینەوەی ئاسەواری تاڵی ئەو مەرگەساتە ؟".
کەسوکاری ئەنفال بەشێکی دیارن لە چینی هەژارانی کوردستان
ئەنجومەنی جێبەجێکردنی یەکگرتو ئەوەشی خستوەتەڕو، "جێگای داخە دوای سی ساڵ حوکمڕانی، دەسەڵات نەیتوانیوە لە ئاست قەبارەی قوربانییەکان بێت و قەرەبوی پێویستیان بکاتەوە . ئەمە لە کاتێکدا زۆرێک لەو ناوچانە لە ئێستادا چاوگەی کێڵگەی نەوت و غازی سروشتین و رۆژانە سەدان ملیۆن دۆلار بەرهەم دێنن. هەر نەکراوە لەو خێر و بێرە زۆرە ، ژیان و ژینگە و گوندەکانیان ئاوەدان بکرێتەوە . بەڵکو کەسوکاریان بەشێکی دیارن لە چینی هەژارانی کوردستان و زۆرێکیان بە هاوکاری خێرخوازان ژیانێکی سادە بەسەر دەبەن".
دەسەڵاتداران بەرپرسانە بچن بەدەم تەواوی داواکاری و پێویستی ئەو خەڵکە
لەبارەی گرنگیدانیش بە گەرمیان لەراگەیەنراوەکەدا هاتوە، لە ئەمساڵدا، کە بۆ ساڵی دوەم لەسەر یەک وشکە ساڵی رو لە ناوچەی گەرمیان دەکات، سەرباری کێشەکانی تریان لە بێ موچەیی و نەبونی خزمەتگوزاری و نەبونی هەلی کار و دامەزراندن، ژیانیان هێندەی تر سەخت و قورستر دەبێ. یەکگرتو داوکارە دەسەڵاتداران بەرپرسانە بچن بەدەم تەواوی داواکاری و پێویستی ئەو خەڵکە،"ناکرێت و نادادییە لەو هەمو خێرەی کوردستان ، ئەوان هەژارترینی چینەکانی کومەڵگا بن."

پەیوەست بە رۆڵی حکومەتی عێراقیش یەکگرتو دەڵێت، پێویستە حکومەتی فیدراڵی ، جینوساید کردنی دەیان هەزار بێ تاوان بخاتە ناو ستراتیژی نیشتیمانی قەرەبوی یاسایی و ئیداری فیدڕاڵییەوە، دەبێ لە داهاتی گشتی بودجەی پێویست بۆ بنیاتنانەوەی ژیانی و ژینگەیی ئەو خەڵک و ئەو ناوچانە دیاری بکرێت.