تەرمی شێخ شامۆ بۆ هەرێمی کوردستان دەگەڕێنرێتەوە

10:59 - 20/01/2022

2541جار خوێندراوەتەوە

خەندان-

ئەمڕۆ پێنجشەممە تەرمی شێخ شامۆ شێخ نەعمۆ، راوێژکاری سەرۆکی حکومەتی هەرێم بۆ کاروباری ئێزدییەکان و سەرۆکی بنکەی لالش لەرێگەی فڕۆکەخانەی نێودەوڵەتی هەولێرەوە گەڕێنرایەوە هەرێمی کوردستان.

تەرمی شێخ شامۆ لەرێگەی فڕۆکەخانەی نێودەوڵەتی هەولێرەوە گەڕێنرایەوە هەرێم
لەمەراسیمی گەڕانەوەی تەرمی شێخ شامۆ شێخ نەعمۆ، بەشێک لەبەرپرسانی حکومی، وەزیر و بەرپرسانی حزبی ئامادەبون، هەروەها مەسرور بارزانی سەرۆکی حکومەتی هەرێمی کوردستان، لە رێوڕەسمی پێشوازیکردن لە تەرمی شێخ شامۆ لە فڕۆکەخانەی نێودەوڵەتی هەولێر ئامادەبو.
دوای نزیکەی سێ هەفتە لە توشبونی بە کۆرۆنا مرد
18ی ئەم مانگە شێخ شامۆ، راوێژکاری سەرۆکی حکومەتی هەرێمی کوردستان بۆ کاروباری ئێزدییەکان و سەرۆکی بنکەی لالش دوای نزیکەی سێ هەفتە لە توشبونی بە ڤایرۆسی کۆرۆنا و تێکچونی دۆخی تەندروستی، مردنی ناوبراو راگەیەنرا.
 ئەندامی خولی پێشوتری پەرلەمانی کوردستان بو

شێخ شامۆ جگە لەوەی راوێژکاری مەسرور بارزانی، سەرۆکی حکومەتی هەرێم بو، هاوکات سەرۆکی بنکەی لالش و ئەندامی خولی پێشوتری پەرلەمانی کوردستانیش بوە.