کرملین: هێزەکانی روسیا لەسنوری ئۆکرانیا دەمێننەوە

09:42 - 17/01/2022

1599جار خوێندراوەتەوە

خەندان-

وتەبێژی کۆشکی سەرۆکایەتی روسیا (کرملین) رایگەیاند، وڵاتەکەیان بەگرنگی دەزانێت بونی سەربازی لەسەر سنورەکانی ئۆکرانیا بەردەوامی هەبێت، بەتایبەت کە هاوپەیمانی ناتۆ چالاکییە "دوژمنکارییەکان"ـی لەنزیک سنورەکانیان چڕکردوەتەوە.

ناتۆ چالاکییە دوژمنکارییەکانـی لەنزیک سنورەکانمان زیادکردوە
دیمتری پیسکۆڤ، وتەبێژی کۆشکی سەرۆکایەتی روسیا (کرمیلن) بە کەناڵی CNNی راگەیاندوە، هێزەکانیان لەناو خاکی روسیا و لەنزیک سنوری ئۆکرانیا جێگیرکراون، بەپێویستیشی دەزانن هێزەکانیان لەشوێنی خۆیان بمێننەوە بەتایبەت کە هاوپەیمانی ناتۆ راهێنانی سەربازی، فڕۆکەی جەنگی و سیخوڕی و  چالاکییە "دوژمنکارییەکان"ـی لەنزیک سنورەکانیان زیادکردوە.
ناتۆ ئامرازێکی ڕوبەڕوبونەوەیە کە ڕۆژ لەدوای ڕۆژ بەرەو سنورەکانمان درێژ دەبێتەوە
ئاماژەی بەوەشکردوە، مۆسکۆ باوەڕی نیە کە ناتۆ تەنها هاوپەیمانییەکی سەربازی بێت بۆ پاراستنی ئاشتی، ئاسایش و گەشەسەندنی ئەوروپا وڵاتانی ئەندام لەو رێکخراوە، بەڵکو "ئامرازێکی ڕوبەڕوبونەوەیە کە ڕۆژ لەدوای ڕۆژ بەرەو سنورەکانمان درێژ دەبێتەوە"
 مۆسکۆ چیتر ناتوانێت بێدەنگی هەڵبژێرێت
وتەبێژی کۆشکی سەرۆکایەتی روسیا (کرمیلن) ئەوەشی خستوەتەڕو، بینراوە کە هاوپەیمانی باکوری ئەتڵەسی (ناتۆ) چەندین کەرەستەی سەربازی بەرەو ناو ئۆکرانیا جوڵەپێکردوە، هەروەها راهێنان بە هێزەکانی ئۆکرانیا دەکات و نزیکبونەوەی سەربازی ناتۆ لەسنورەکان، وایکردوە مۆسکۆ چیتر نەتوانێت بێدەنگی هەڵبژێرێت.

نیشانەکردن

روسیا ئۆکرانیا