هەواڵی ئەمڕۆ

یاسین خضر: لەناو گۆڕان هەندێک کەس بەرگەی بەخۆداچونەوە ناگرن و نمایشکارانە دەکشێنەوە

09:01 - 15/01/2022

3159جار خوێندراوەتەوە

خه‌ندان-

یاسین خضر، ئه‌ندامی فراكسیۆنی گۆڕان له‌ په‌رله‌مانی كوردستان رایگه‌یاند، بزوتنه‌وه‌ی گۆڕان ئێستا  لە قۆناغی بنیادنانەوەدایه‌ لە هەمو ئاستەکاندا، ده‌شڵێت، "هەندێک بەناو نوێنەرو لادەر لەو پەیمانە ئەخلاقی و یاسایی و سیاسیەی بە خەڵکی کوردستان و گۆڕانیان دابو، نمایشکارانە خۆیان لە بەپرسیارەتی دەکێشنەوە و بە دوای بەرژەوەندییە کەسیەکانی خۆیان وێڵ دەبن".

یاسین خضر له‌ نوسینێكدا له‌ هه‌ژماری تایبه‌تی خۆی بڵاویكرده‌وه‌، "گۆڕان ئێستا لە قۆناغی بنیادنانەوەدایه‌ لە هەمو ئاستەکانی سیاسی رێکخراوی، هاوپەیمانی، حکومی و چاو بە هەمو هەڵوێستەکان ده‌خشێنێته‌وه‌ و هه‌ڵه‌كان راستده‌كاته‌وه‌".

هەندێک بەناو نوێنەرو لادەر بەرگەی بەخۆداچونەوە ناگرن و بە پاساوی پەرۆشی درۆزنانەو نمایشکارانە خۆیان لە بەپرسیارەتی دەکێشنەوە 
ئاماژه‌ی به‌وه‌شكردوه‌، "هەندێک بەناو نوێنەرو لادەر لەو پەیمانە ئەخلاقی و یاسایی و سیاسیەی بە خەڵکی کوردستان و گۆڕانیان دابو بەرگەی بەخۆداچونەوە ناگرن و بە پاساوی پەرۆشی درۆزنانەو نمایشکارانە خۆیان لە بەپرسیارەتی دەکێشنەوە و بە دوای بەرژەوەندییە کەسیەکانی خۆیان وێڵ دەبن".
کات بە بەریەوە ماوە، رۆژێک راستیەکانیان بۆ خەڵک دەردەکەوێ و دەکەونە بەر نەفرەتی مێژو وخەڵکی کوردستان
یاسین خضر باسی له‌وه‌كردوه‌، "کات بە بەریەوە ماوە، رۆژێک راستیەکانیان بۆ خەڵک دەردەکەوێ و دەکەونە بەر نەفرەتی مێژو وخەڵکی کوردستان، وەک بێ وەفاترین و خۆپەرسترین پیاوی بچوک دەناسرێن".

2ی ئه‌م مانگه‌، جڤاتى نیشتمانى بزوتنەوەى گۆڕان لەراگەیەنراوێکدا بڵاویكرده‌وه‌، "دواى زنجیرەیەک کۆبونەوە لە دو هەفتەى رابردودا، دەستەیەکى حەوت کەسى بە نوێنەرایەتى جڤاتەکانى نیشتمانى، گشتى، سێ لە هەڵسوڕاوانى دیارى دەرەوەى جڤاتەکان هەڵبژێردران کە بریتین لە (هۆشیار عومەر، نزار محەمەد، هاوڕێ کاوە، دڵشاد مەجید، گەیلان شێخ عومەر، د. تەها حەمە عەزیز و شوان قلیاسانى)".

ئاماژه‌ی به‌وه‌شكردوه‌، ئەو دەستەیە لەگەڵ لیژنەى باڵاى کۆنفڕانس، دەست بە ئامادەکارى دەکەن بۆ ئەوەى لە نزیکترین کاتدا کۆنفرانسى دوەمى نیشتمانى بۆ بەخۆداچونەوە و خۆ رێکخستنەوەى بزوتنەوەکە ببەستن.

نیشانەکردن

گۆڕان