لە 24 کاتژمێردا ناوچەی سەوز و چەند بارەگایەکی حزبی لەبەغدا کرانە ئامانج

10:31 - 14/01/2022

2711جار خوێندراوەتەوە

خەندان-

لە 24 کاتژمێری رابردودا باڵیۆزخانەی ئەمریکا لە ناوچەی سەوز و بارەگای دو حزب لەبەغدا کراونەتە ئامانج و بەشێک لەکەسایەتی و سەرکردەکانیش هێرشەکانیان ئیدانە کرد.

بەرەبەیانی دوێنێ پێنجشەممە لقی پارتی دیموکراتی کوردستان لەبەغدا لەرێگەی بۆمبێکی چێنراو بەئامانج گیرا، هێرشەکەش زیانی مادی لێکەتەوە و لەم کاتەدا هێزە ئەمنییەکان لێکۆڵینەوە لە روداوەکە دەکەن.

لەرێگەی دو موشەکەوە ناوچەی سەوزی بەغدا کرایە ئامانج 

هاوکات شەوی رابردو لەرێگەی دو موشەکەوە ناوچەی سەوزی بەغدا کرایە ئامانج و هەردو موشەکەکەش لەلایەن سیستەمی دژەموشەکی جۆری سیرام خرانەخوارەوە.

 لەرێگەی بۆمبێكی چێنراوەوە بەئامانج گیرا و زیانی مادی لێکەوتەوە

درەنگانێکی شەوی رابردوش بارەگایەکی هاوپەیمانی تەقەدومی سونەکان کە لەلایەن محەمەد حەلبوسی، سەرۆکی پەرلەمانی عێراقەوە سەرۆکایەتی دەکرێت، لەرێگەی بۆمبێكی چێنراوەوە بەئامانج گیرا و زیانی مادی لێکەوتەوە.

هۆکار دەدەن بەدەستەوە بۆ ئەوەی کشانەوەی هێزەکانی ئەمریکا لە عێراق دوابخەن

لای خۆیەوە موقتەدا سەدر، رێبەری ڕەوتی سەدر، لەبارەی هێرشی موشەکی سەر باڵیۆزخانەی ئەمریکا لە بەغدا، ڕایگەیاند، ئه‌و هێرشانه‌ی دەکرێنە سەر باڵێۆزخانەی ئەمریکا لە بەغدا كشانه‌وه‌ی هێزەکانی ئەمریکا لە عێراق دواده‌خات. هەروەها ''ئەو گروپانە بە ئەنجامدانی ئەم کارانەیان هۆکار دەدەن بەدەستەوە بۆ ئەوەی کشانەوەی هێزەکانی ئەمریکا لە عێراق دوابخەن.''

هەرچەندە تاوەکو ئێستا هیچ لایەنێک بەرپرسیاریەتی خۆی لە هێرشەکان رانەگەیاندوە، بەڵام لە چەند مانگی رابردودا چەندین هێرشی موشەکی کراونەتە سەر ناوچەی سەوز بە تایبەتی باڵیۆزخانەی ئەمریکا، بەرپرسانی ئەو وڵاتەش گروپە چەکدارەکانی نزیک لە ئێرانیان بە ئەنجامدانی ئەو هێرشانە تۆمەتبار کردوە.

 

نیشانەکردن

عێراق