هەواڵی ئەمڕۆ

رێكه‌وتنی سوننه‌كان بۆ دیاریكردنی سه‌رۆكی په‌رله‌مان راگه‌یه‌ندرا

10:01 - 08/01/2022

5545جار خوێندراوەتەوە

خه‌ندان-

هه‌ردو هاوپه‌یمانی ته‌قه‌دوم كه‌ محه‌مه‌د حه‌لبوسی سه‌رۆكایه‌تی ده‌كات له‌گه‌ڵ هاوپه‌یمانی عه‌زم كه‌ له‌لایه‌ن خه‌میس خه‌نجه‌ره‌وه‌ سه‌رۆكایه‌تی ده‌كرێت، رێكه‌وتنی كۆتاییان بۆ دیاریكردنی محه‌مه‌د حه‌لبوسی بۆ پۆستی سه‌رۆكی په‌رله‌مان و خه‌میس خه‌نجه‌ر بۆ پۆستی سه‌رۆكی هاوپه‌یمانێتیه‌كه‌یان راگه‌یاند.

له‌راگه‌یه‌ندراوێكی هاوبه‌شدا هه‌ردو هاوپه‌یمانی عه‌زم و ته‌قه‌دوم بڵاویانكرده‌وه‌، هاوپه‌یمانێتی نێوانیان به‌شێوه‌یه‌كی فه‌رمی راده‌گه‌یه‌نن و له‌پرۆسه‌یه‌كی ده‌نگدانیشدا كه‌ 67 ئه‌ندام ئاماده‌ی بون بڕیاریانداوه‌ به‌دیاریكردنی محه‌مه‌د حه‌لبوسی بۆ پۆستی سه‌رۆكایه‌تی په‌رله‌مانی عێراق.

بڕیاردراوه‌ به‌دیاریكردنی خه‌میس خه‌نجه‌ر بۆ سه‌رۆكایه‌تیكردنی هاوپه‌یمانێتی نێوان عه‌زم و ته‌قه‌دوم

هه‌ر به‌گوێره‌ی راگه‌یه‌ندراوه‌كه‌، به‌كۆی ده‌نگی ئه‌ندامانی ئاماده‌بوی كۆبونه‌وه‌كه‌، بڕیاردراوه‌ به‌دیاریكردنی خه‌میس خه‌نجه‌ر بۆ سه‌رۆكایه‌تیكردنی هاوپه‌یمانێتی نێوان عه‌زم و ته‌قه‌دوم.

به‌گوێره‌ی ئه‌نجامی كۆتایی هه‌ڵبژاردنه‌ په‌رله‌مانییه‌كه‌ی 10ی (تشرینی یه‌كه‌م/10)ی 2021؛ هاوپه‌یمانی ته‌قه‌دومی محه‌مه‌د حه‌لبوسی 37 كورسی و هاوپه‌یمانی ته‌قه‌دوم هاوپه‌یمانی عه‌زمی خه‌میس خه‌نجه‌ریش كه‌ 14 كورسیان به‌ده‌ستهێناوه‌، هه‌روه‌ها ژماره‌یه‌ك له‌ كاندیده‌ سه‌ربه‌خۆكانیش چونه‌ته‌ پاڵ هه‌ریه‌ك له‌ ته‌قه‌دوم و عه‌زم، كۆی گشتی ئه‌ندامه‌كانیان گه‌یشتوه‌ته‌ 67 ئه‌ندام.

نیشانەکردن

محەمەد حەلبوسی