د. سه‌باح هه‌ورامی له‌ دیداری خه‌ندان: ده‌رمان كێشه‌یه‌كی گه‌وره‌یه‌، ئێستا ده‌رمانی قاچاغ و ته‌زویر له‌م شاره‌دا هه‌یه‌

09:43 - 05/01/2022

6576جار خوێندراوەتەوە

خه‌ندان-

به‌ڕێوه‌به‌ری گشتی ته‌ندروستی پارێزگای سلێمانی رایگه‌یاند، كێشه‌ی ده‌رمان كێشه‌یه‌كی گه‌وره‌یه‌ و ده‌بو چاره‌سه‌ربكرایه‌، ده‌بو حكومه‌تی هه‌رێمی كوردستان رێكخی بخات، ده‌شڵێت، "ئێستا ده‌رمانی قاچاغ و ته‌زویر له‌م شاره‌دا هه‌یه‌ و جیاوازی نرخی ده‌رمان هه‌یه‌، ئێمه‌ به‌ڕێوه‌به‌رایه‌تی كۆنتڕۆڵكردنی ده‌رمانمان هه‌یه‌ ده‌بوایه‌ ئه‌و كارانه‌ ئه‌و بیكردایه‌ به‌ڵام به‌داخه‌وه‌ نه‌كراوه‌ و ئه‌و خۆشی به‌شێكه‌ له‌ كێشه‌كه‌".

د. سه‌باح هه‌ورامی، به‌ڕێوه‌به‌ری گشتی ته‌ندروستی پارێزگای سلێمانی له‌میانی به‌رنامه‌ی دیداری خه‌ندان، كه‌ به‌رنامه‌یه‌كی هه‌فتانه‌یه‌ و رۆژنامه‌نوس هه‌ڤاڵ محه‌مه‌د ئاماده‌و پێشكه‌شی ده‌كات، له‌وه‌ڵامی ئه‌و پرسیاره‌ی كه‌ روبەرێکی فراوانی مەسئولیاتی رۆحی خەڵک لە ئەستۆی بەڕێوەبەرایەتیی گشتیی تەندروستی سلێمانییە، ئایا هەڵسەنگاندنی چیە بۆ خزمەتگوزاریە تەندروستیەکان، رایگه‌یاند، "كه‌رتی ته‌ندروستی راسته‌وخۆ په‌یوه‌ندی به‌ ژیانی خه‌ڵكه‌وه‌ هه‌یه‌ و له‌ هه‌مو جیهاندا ئه‌م كه‌رته‌ به‌چاوێكی جیاواز ته‌ماشا ده‌كرێت و بودجه‌یه‌كی زۆر جیاواز بۆ ئه‌م كه‌رته‌ دابینكراوه‌، ده‌وڵه‌ته‌ هه‌ره‌ گه‌وره‌كانی دونیا خۆیان به‌ ته‌نها ناتوانن سیستمێكی ته‌ندروستی باش به‌ڕێوه‌ببه‌ن، بۆیه‌ په‌نایان بردوه‌ته‌ به‌ر ئه‌وه‌ی كه‌ سیستمی دڵنیایی ته‌ندروستی، هه‌ر هاوڵاتییه‌ك به‌پێی داهاته‌كه‌ی و ئه‌و خزمه‌تگوزاریه‌ی پێشكه‌شی ده‌كرێت مانگانه‌ یان ساڵانه‌ پاره‌یه‌ك پێشكه‌ش به‌ كه‌رتی ته‌ندروستی ده‌كات بۆ ئه‌وه‌ی له‌ به‌رامبه‌ردا هه‌ركاتێك پێویستی به‌ كه‌رتی ته‌ندروستی بو خزمه‌تێكی شایسته‌ بكرێت، به‌داخه‌وه‌ له‌به‌رئه‌وه‌ی ئه‌م دڵنیاییه‌ ته‌ندروستیه‌ له‌ هه‌رێم و عێراقیشدا نیه‌".

حكومه‌ت بودجه‌یه‌كی شایسته‌ی بۆ كه‌رتی ته‌ندروستی دانه‌ناوه‌ بۆیه‌ ئه‌م خزمه‌تگوزاریه‌ له‌ئاستی داواكاری خه‌ڵكدا و بیركردنه‌وه‌ی ئێمه‌دا نیه‌
ئاماژه‌ی به‌وه‌شكرد، "هه‌رچه‌نده‌ ئه‌مساڵ ئه‌گه‌ری زۆره‌ له‌ خوارو و ناوه‌ڕاستی عێراق سیستمی دڵنیایی ته‌ندروستی جێبه‌جێ بكرێت، هاوكات حكومه‌تی هه‌رێم خۆی له‌ قه‌یراندایه‌ و بودجه‌یه‌كی شایسته‌ی بۆ كه‌رتی ته‌ندروستی دانه‌ناوه‌ بۆیه‌ ده‌توانم بڵێم ئه‌م خزمه‌تگوزاریه‌ له‌ئاستی داواكاری خه‌ڵكدا و بیركردنه‌وه‌ی ئێمه‌دا نیه‌".  
ته‌نانه‌ت كاتێك كه‌ قه‌یرانی داراییش نه‌بو كه‌رتی ته‌ندروستی له‌ ئاستی پێداویستدا نه‌بوه‌
له‌باره‌ی ئه‌وه‌ی ئایا ته‌نها قه‌یرانی داراییه‌ هۆكاره‌، یان نه‌بونی پلانیش هۆكاره‌، باسی له‌وه‌كرد، "قه‌یرانی دارایی هۆكاری سه‌ره‌كییه‌، ته‌نانه‌ت كاتێك كه‌ قه‌یرانی داراییش نه‌بو كه‌رتی ته‌ندروستی له‌ ئاستی پێداویستدا نه‌بوه‌، چونكه‌ له‌ هه‌مو دونیادا حكومه‌ت خۆی به‌ ته‌نها ناتوانێت خزمه‌تگوزاریه‌كی شایسته‌ی نمونه‌یی پێشكه‌ش به‌ هاوڵاتییه‌كانی بكات ئه‌گه‌ر بودجه‌یه‌كی زۆر زه‌به‌لاح له‌ پشتیه‌وه‌ نه‌بێت ئه‌و بودجه‌یه‌ش ده‌وڵه‌تان به‌وه‌ چاره‌سه‌ریان كردوه‌ كه‌ سیستمی دڵنیایی ته‌ندروستیان داناوه‌". 

له‌باره‌ی ئه‌وه‌ی ئایا ده‌توانرێت بوترێت دۆخی ته‌ندروستی له‌ هه‌رێمی كوردستان به‌ره‌و دواوه‌ هاتوه‌، به‌ڕێوه‌به‌ری گشتی ته‌ندروستی پارێزگای سلێمانی وتی، "به‌دڵنیاییه‌وه‌ به‌ره‌و دواوه‌ هاتوه‌ به‌هۆی قه‌یرانی داراییه‌وه‌، به‌ڵام به‌راوردی بكه‌ به‌ بودجه‌كه‌ی كه‌ هه‌یه‌ نه‌خێر له‌ ئاستی خۆیدا راگیراوه‌، به‌ڵام له‌به‌رئه‌وه‌ی بودجه‌كه‌ كه‌میكردوه‌ خۆی له‌ بنه‌ڕه‌تدا خزمه‌تگوزاریه‌كی باش نه‌بوه‌ له‌كاتی نه‌بونی  قه‌یرانی دارایشدا چونكه‌ پێویستی به‌ بودجه‌یه‌كی زۆر زه‌به‌لاح هه‌یه‌".
له‌ نیوه‌ یان به‌شێك كه‌متری خه‌ڵك متمانه‌یان به‌ كه‌رتی گشتی نیه‌، هه‌ر له‌به‌رئه‌مه‌ش كه‌رتی تایبه‌ت به‌هێز بوه‌
له‌باره‌ی ئه‌وه‌ی ئایا چاره‌سه‌ری خه‌ڵكانی هه‌ژار و كه‌مده‌رامه‌ت چیه‌ كه‌ ناتوانن له‌ نه‌خۆشخانه‌ ئه‌هلی و تایبه‌ته‌كاندا چاره‌سه‌ر وه‌ربگرێت، د. سه‌باح هه‌ورامی وتی، "له‌ راستیدا خه‌ڵك مافی خۆیه‌تی كه‌ خزمه‌تگوزاری ته‌ندروستی هه‌بێت، به‌ڵام ئێستا ئه‌گه‌ر سه‌یری بكه‌یت ده‌توانم بڵێم له‌ نیوه‌ یان به‌شێك كه‌متری خه‌ڵك متمانه‌یان به‌ كه‌رتی گشتی نیه‌، هه‌ر له‌به‌رئه‌مه‌ش كه‌رتی تایبه‌ت به‌هێز بوه‌، ئه‌و كه‌سانه‌شی كه‌ به‌داخه‌وه‌ باری داراییان باش نیه‌ ئه‌و كه‌سانه‌ خه‌ڵك كه‌مده‌ناسن له‌وه‌ده‌چێت بچنه‌ نه‌خۆشخانه‌ و شوێنه‌ تایبه‌ته‌كان واهه‌ست ده‌كه‌ن كه‌ وه‌كو پێویست گرنیان پێنادرێت، به‌ڵام ئه‌و خه‌ڵكانه‌ی كه‌ توانای داراییان باشتره‌ و په‌یوه‌ندیان له‌گه‌ڵ به‌ڕێوه‌به‌ری نه‌خۆشخانه‌كان و ئێمه‌ومانان و خه‌ڵكی تردا ده‌توانن باشتر ده‌ستیان بگات به‌ خزمه‌تگوزاریه‌ ته‌ندروستیه‌كان، خۆی له‌ راستیدا ده‌بێت به‌ پێچه‌وانه‌وه‌ بێت و ئه‌و خه‌ڵكانه‌ی كه‌ كه‌مده‌رامه‌تن له‌ كه‌رتی گشتی چاره‌سه‌ربكرێن و ئه‌و خه‌ڵكانه‌ی كه‌ باری داراییان باشه‌ له‌ كه‌رتی تایبه‌ت چاره‌سه‌ر بكرێن".
رۆژ به‌ رۆژ داواكاری كه‌رتی ته‌ندروستی زیاد ده‌كات و ئێمه‌ش له‌ جێگه‌ی خۆمانداین و نه‌مانتوانیوه‌ شان به‌ شانی ئه‌م پێشكه‌وتنه‌ پێش بكه‌وین
ئه‌وه‌شی خسته‌ڕو، "رۆژ به‌ رۆژ داواكاری كه‌رتی ته‌ندروستی زیاد ده‌كات و ئێمه‌ش له‌ جێگه‌ی خۆمانداین و نه‌مانتوانیوه‌ شان به‌ شانی ئه‌م پێشكه‌وتنه‌ پێش بكه‌وین، ئه‌وه‌ كه‌رتی تایبه‌ته‌ له‌به‌رئه‌وه‌ی پاره‌ په‌یدا ده‌كات ده‌توانێت خزمه‌تگوزاری باشتر پێشكه‌ش بكات، خه‌ڵكیش ئه‌وه‌ په‌یوه‌ندی به‌ ژیانی خۆیه‌وه‌یه‌تی بۆ ئه‌وه‌ی خۆی له‌ دۆخێكی سه‌لامه‌تدا بێت یان توشی نه‌خۆشی درێژخایان و مردن نه‌بێت ئاماده‌یه‌ هه‌مو پاره‌یه‌ك خه‌رج بكات بۆ ئه‌وه‌ی كه‌ خزمه‌تی خۆی پێبكات و مافی خۆشیه‌تی، ته‌نانه‌ت ئه‌گه‌ر پاره‌شی پێنه‌بێت ده‌چێت قه‌رزی بۆ ده‌كات بۆ ئه‌وه‌ی خزمه‌تی خۆی پێبكات".
دەرمان له‌ كه‌رتی تایبه‌ت و كۆمپانیاكان ده‌كڕین، پاره‌ وه‌كو ژماره‌ دێته‌ سه‌ر حسابه‌كه‌مان و خه‌رجی ده‌كه‌ین، به‌ڵام وه‌كو نه‌ختینه‌ كۆمپانیاكان پاره‌ وه‌رناگرن
له‌باره‌ی كه‌مبونه‌وه‌ی ده‌رمان له‌ نه‌خۆشخانه‌ حكومییه‌كاندا ئایا به‌راستی مه‌ترسی هه‌یه‌ كه‌ ده‌رمان نه‌مێنێت؟ به‌ڕێوه‌به‌ری گشتی ته‌ندروستی سلێمانی وتی، "ئێمه‌ دەرمان له‌ كه‌رتی تایبه‌ت و كۆمپانیاكان ده‌كڕین، پاره‌ وه‌كو ژماره‌ دێته‌ سه‌ر حسابه‌كه‌مان و خه‌رجی ده‌كه‌ین، به‌ڵام وه‌كو نه‌ختینه‌ كۆمپانیاكان پاره‌ وه‌رناگرن، واتا ئه‌گه‌ر كۆمپانیایه‌كی ده‌رمان بێت و ده‌رمان به‌ ئێمه‌ بفرۆشێت، من گرێبه‌ستێكم كۆمیانیاكان هه‌یه‌ بۆ ماوه‌ی ئه‌و كۆمپانیایه‌ به‌پێی پێداویستییه‌كانی من ده‌رمانم بۆ ده‌هێنم كه‌ وه‌سڵێكی هه‌یه‌ و ده‌بێت پاره‌یان بۆ خه‌رج بكرێت و ده‌كرێت، هه‌مو هه‌فته‌یه‌ك 2%ی بۆ خه‌رج ده‌كرێت، كۆمپانیایه‌ك ئه‌گه‌ر مانگی یه‌ك ده‌رمان بۆمن بهێنێت ئه‌وا به‌ 50 هه‌فته‌ پاره‌كه‌ی بۆ خه‌رج ده‌كرێته‌وه‌، ئه‌گه‌ر مانگی سێش بیهێنێت هه‌ر به‌ 50 هه‌فته‌ پاره‌كه‌ی بۆ خه‌رج ده‌كرێت و وای لێدێت هه‌مو پاره‌كه‌ی ده‌چێته‌ قه‌رزی حكومه‌ته‌وه‌ و ئه‌ویش له‌به‌رئه‌وه‌ی توانای دارایی كۆمپانیاكان دیاریكراوه‌ ناتوانن پێداویستیه‌كانمان بۆ دابین بكه‌ن، ئه‌سڵی بابه‌ته‌كه‌ ئاوایه‌ نه‌ك پاره‌ كه‌میكردبێت و ده‌رمان له‌شوێنێكه‌وه‌ هاتبێت و ئێستا نه‌مابێت".
ئێستا كه‌ نه‌ختینه‌ نیه‌ كۆمپانیاكانیش نرخی ده‌رمانه‌كانیان به‌رز ده‌كه‌نه‌وه، ئه‌وه‌ كێشه‌ی ساڵی 2021 بوه‌ 
له‌باره‌ی ئه‌وه‌ی ئایا ئێستا كۆمپانیاكان ده‌رمان ناهێنن، د. سه‌باح هه‌ورامی وتی، "نه‌خێر ده‌رمان ناهێنن، كۆمپانیاكان له‌ شوێنه‌كانی تر كێشه‌یان نه‌بوه‌، له‌به‌رئه‌وه‌ی به‌م شێوازه‌ پاره‌یان دراوه‌تێ، من حه‌ز ده‌كه‌م خه‌ندان بچێت به‌دواداچون بكات بزانێت ئه‌و ده‌رمانه‌ی له‌ سلێمانی هه‌یه‌ جیاوازی نرخی هه‌یه‌ یان نیه‌تی له‌به‌رئه‌وه‌ی كه‌ نه‌ختینه‌ هه‌بوه‌، ئێستا كه‌ نه‌ختینه‌ نیه‌ كۆمپانیاكانیش نرخی ده‌رمانه‌كانیان به‌رز ده‌كه‌نه‌وه، ئه‌وه‌ كێشه‌ی ساڵی 2021 بوه‌ و پێده‌چێت ئه‌مساڵ هۆكاری كه‌مبونه‌وه‌ی ده‌رمان بگۆڕێت، چونكه‌ ئێمه‌ نرخی ده‌رمان به‌ زیاتر ده‌كڕین و ئه‌و پاره‌یه‌ی بۆ كڕینی ده‌رمان دامانناوه‌ بڕێكی كه‌متری پێده‌كڕین و سه‌رئه‌نجام ده‌رمان كه‌مده‌بێته‌وه‌ و ئه‌مه‌ش زیاتر له‌ سلێمانیدا وایه‌".
كه‌رتی گشتی له‌ سلێمانی كه‌رتێكی به‌هێزه‌ و خزمه‌تگوزاریه‌كی باشتر پێكه‌ش ده‌كات به‌راورد به‌ پارێزگاكانی تردا
له‌وه‌ڵامی ئه‌و پرسیاره‌ی بۆچی ته‌نها له‌ سلێمانی ئه‌و كێشه‌یه‌ هه‌یه‌و له‌ شاره‌كانی دیكه‌ چۆن چاره‌سه‌ركراوه‌، رونیشیكرده‌وه‌، "پێشتر له‌ پارێزگاكانی تر به‌مشێوه‌یه‌ رۆیشتوه‌ ئێستا له‌ سلێمانی به‌سه‌ر كۆمپانیاكاندا جێبه‌جێیان كردوه‌ و ئه‌و كێشه‌یه‌ بۆ ئێمه‌ دروستكردوه‌، ئێستا ئه‌گه‌ر به‌راوردێك له‌نێوان كه‌رتی گشتی و تایبه‌ت له‌ پارێزگای سلێمانی و پارێزگاكانی تر بكه‌یت زۆر گرنگ نیه‌ به‌لایانه‌وه‌ كێشه‌كه‌یان هه‌بێت، ئێمه‌ به‌لامانه‌وه‌ گرنگه‌ له‌به‌رئه‌وه‌ی كه‌رتی گشتی له‌ سلێمانی كه‌رتێكی به‌هێزه‌ و خزمه‌تگوزاریه‌كی باشتر پێكه‌ش ده‌كات به‌راورد به‌ پارێزگاكانی تردا".
 كێشه‌ی ده‌رمان كێشه‌یه‌كی گه‌وره‌یه‌ و ده‌بو چاره‌سه‌ربكرایه‌، ئێستا ده‌رمانی قاچاغ و ته‌زویر له‌م شاره‌دا هه‌یه‌ 
له‌باره‌ی ئه‌وه‌ی بۆچی وه‌زاره‌تی ته‌ندروستی و به‌ڕێوه‌به‌رایه‌تییه‌ گشتیه‌كان بابه‌تی هێنانی ده‌رمان به‌ مه‌ركه‌زی بكه‌ن هاوشێوه‌ی ساڵانی هه‌شتاكان، د. سه‌باح هه‌ورامی ده‌ڵێت، "باوه‌ڕناكه‌م هیچ كێشه‌یه‌ك هه‌بێت نه‌توانرێت چاره‌سه‌ر بكرێت، به‌ڵام ئه‌نجومه‌نی وه‌زیران و په‌رله‌مانی كوردستان ده‌توانن یاسایه‌ك دابنێن و ئه‌و كێشه‌یه‌ چاره‌سه‌ر بكات، ئه‌و بابه‌ته‌ په‌یوه‌ندی به‌وانه‌وه‌ هه‌یه‌، به‌ڕاستی ده‌بێت ئه‌وان وه‌ڵام بده‌نه‌وه‌، من پێموایه‌ كه‌ كێشه‌ی ده‌رمان كێشه‌یه‌كی گه‌وره‌یه‌ و ده‌بو چاره‌سه‌ربكرایه‌، نه‌ك هه‌ر حكومه‌ت بیهێنێت به‌ڵكو ده‌بوایه‌ رێكیان بخستایه‌ته‌وه‌، ئێستا ده‌رمانی قاچاغ و ته‌زویر له‌م شاره‌دا هه‌یه‌ و جیاوازی نرخی ده‌رمان هه‌یه‌، ته‌زویر چیه‌؟ ئه‌وه‌یه‌ كه‌ ده‌رمانێك زۆر فرۆشی هه‌یه‌ له‌ بازاڕدا و داواكاری زۆر له‌سه‌ره‌ و كه‌سێكی دیكه‌ ده‌چێت ده‌رمانێك دروست ده‌كات و ده‌یهێنێت بۆ ئه‌وه‌ی بیفرۆشێت به‌ نرخی ئه‌و ده‌رمانه‌ گرانبه‌هایه‌، قاچاغیش ئه‌وه‌یه‌ كه‌ هیچ كێشه‌یه‌كی نیه‌ به‌ڵام به‌ رێكاری ته‌ندروستیدا نایه‌ته‌ هه‌رێمی كوردستانه‌وه‌، به‌داخه‌وه‌ ئێمه‌ به‌ڕێوه‌به‌رایه‌تی كۆنتڕۆڵكردنی ده‌رمانمان هه‌یه‌ ده‌بوایه‌ ئه‌و كارانه‌ ئه‌و بیكردایه‌ به‌ڵام ئه‌و خۆشی به‌شێكه‌ له‌ كێشه‌كه‌".
ده‌بێت پێش هه‌مو شتێك حکومەت یاسای دڵنیایی ته‌ندروستی جێبه‌جێ بكات و زۆر بابه‌تیانه‌تر و پیشه‌ییانه‌ تر له‌ كه‌رتی ته‌ندروستی بڕوانێت
له‌وه‌ڵامی ئه‌و پرسیاره‌ی ئایا وه‌زاره‌تی ته‌ندروستی كه‌مته‌رخه‌م بوه‌ له‌ ئاست چاره‌سه‌ركردنی كێشه‌كان یان به‌راستی هه‌وڵیداوه‌ نه‌یتوانیوه‌ چاره‌سه‌ری بكات، د. سه‌باح هه‌ورامی وتی، "له‌راستیدا ئێمه‌ بۆ ئه‌وه‌ی هه‌مو تاوانه‌كه‌ نه‌خه‌ینه‌ ئه‌ستۆی وه‌زاره‌تی ته‌ندروستی، هۆكاری سه‌ره‌كی ئه‌م كێشانه‌ نه‌بونی بودجه‌یه‌ پێویست ده‌كات هه‌رچی زوه‌ په‌رله‌مان و حكومه‌ت كه‌ مه‌به‌ستیانی وه‌زاره‌تی ته‌ندروستی خزمه‌تگوزاری باش پێشكه‌ش به‌ هاوڵاتیان بكات ده‌بێت پێش هه‌مو شتێك یاسای دڵنیایی ته‌ندروستی جێبه‌جێ بكات، دواتر ئه‌نجومه‌نی وه‌زیران پێویستی به‌وه‌ هه‌یه‌ زۆر بابه‌تیانه‌تر و پیشه‌ییانه‌ تر له‌ كه‌رتی ته‌ندروستی بڕوانێت و خه‌ڵكی پسپۆڕ هه‌بێت له‌و بواره‌دا چاودێری بكات و بڕیاره‌كانی كه‌رتی ته‌ندروستی هه‌ڵبسه‌نگێنێت، من پێموایه‌ ئه‌مه‌ غیابی هه‌یه‌ له‌ناو ئه‌نجومه‌نی وه‌زیراندا و پڕۆژه‌ و بیرۆكه‌ی زۆر باش هه‌یه‌ یان ناگات یان كه‌ گه‌یشت وه‌كو پێویست وه‌ڵامی نیه‌، كه‌ ئه‌مانه‌ خزمه‌ت به‌ حكومه‌ت خۆی ده‌كه‌ن، حكومه‌ت هیچ به‌رژه‌وه‌ندیه‌كی له‌وه‌دا نیه‌ كه‌ ئه‌و خزمه‌تگوزاریانه‌ نه‌كرێن به‌ پێچه‌وانه‌ تێچوی دارایی له‌سه‌ر حكومه‌ت كه‌مده‌كاته‌وه‌ و هه‌م خزمه‌ت پێشكه‌ش به‌ خه‌ڵك ده‌كات".
وه‌زاره‌ته‌كان به‌شێوه‌یه‌كی گشتی پێیانوایه‌ دابه‌زاندنی ده‌سه‌ڵات یان سیستمی لامه‌ركه‌زی دابه‌شكردنی ده‌سه‌ڵاته‌ له‌نێوان وه‌زاره‌ته‌كان و به‌ڕێوه‌به‌رایه‌تیه‌ گشتیه‌كان
وتیشی، "وه‌زاره‌تی ته‌ندروستی به‌پێی پسپۆڕی خۆی تێگه‌یشتنی زیاتره‌ بۆ كێشه‌كان، به‌ڵام وه‌زاره‌تی ته‌ندروستی و هه‌مو وه‌زاره‌ته‌كانی تر كێشه‌یان هه‌یه‌ كه‌ كێشه‌ی مه‌ركه‌زی بونی ده‌سه‌ڵاته‌، ئه‌و عه‌قڵیه‌ته‌ی ئێستا هه‌یه‌، وه‌زاره‌ته‌كان به‌شێوه‌یه‌كی گشتی پێیانوایه‌ به‌دیاریكراوی باسی وه‌زاره‌تی ته‌ندروستی ناكه‌م، پێیانوایه‌ دابه‌زاندنی ده‌سه‌ڵات یان سیستمی لامه‌ركه‌زی دابه‌شكردنی ده‌سه‌ڵاته‌ له‌نێوان وه‌زاره‌ته‌كان و به‌ڕێوه‌به‌رایه‌تیه‌ گشتیه‌كان، ئه‌مه‌ بیرۆكه‌یه‌كی غه‌ڵه‌ته‌، له‌راستیدا نابێت وابێت و ئه‌وه‌ی پێویسته‌ ده‌سه‌ڵات دابه‌زێنێته‌ خواره‌وه‌ و ئه‌و كه‌سه‌ی كه‌ وه‌كو خۆی جێبه‌جێی ناكات ئه‌وكاته‌ پێویست ده‌كات كه‌ لێپچینه‌وه‌ی له‌گه‌ڵدا بكرێت".