هەواڵی ئەمڕۆ

وەزارەتی پێشمەرگە: نابێت چیتر رێگە بدەین تیرۆریستان مۆڵگەو شوێنی حەوانەوەیان هەبێت

09:34 - 03/12/2021

6118جار خوێندراوەتەوە

خەندان-

وەزارەتی پێشمەرگە رایگەیاند، دوای ئەوەی شەوی رابردو داعش هێرشیکردوەتەسەر  گوندی خدر جیجەی بناری چیای قەرەچوغ هێزەکانی پێشمەرگە بەمەبەستی کۆنتڕۆڵکردنی دۆخەکە گەیشتنەشوێنەکە، بەڵام لەکاتی ئۆپراسیۆنێکی کێوماڵکردنی ناوچەکەدا یەکێک لە ئۆتۆمبێلەکانی پێشمەرگە کەوتە بۆسەی داعشەوەو بەهۆیەوە حەوت پێشمەرگە شەهید بون، دەشڵێت "نابێت چیتر رێگە بدەین، تیرۆریستان مۆڵگەو شوێنی حەوانەوەیان هەبێت".

پێشمەرگە توانی لەماوەیەکی کەمدا بارودۆخەکە کۆنتڕۆڵ بکات و تیرۆریستان راو بنێت

وەزارەتی پێشمەرگە لەراگەیەنراوێکدا باسی لەوەشکردوە، "بەداخەوە، کاتژمێر 10:00ی شەوی 2ی کانونی یەکەمی 2021، تیرۆریستانی داعش، پەلاماری گوندی خدر جیجەی بناری چیای قەرەچوغیان دا، لەم پەلامارە دڕندانەیەدا، کوێرانە کەوتنە دەستڕێژیکردن لە خەڵکی سڤیلی گوندەکە، لە ئەنجامدا سێ هاوڵاتی شەهید بون و ژمارەیەکیش بریندار بون. هێزەکانی پێشمەرگەش بەزویی بەهانای خەڵکی گوندەکەوە چون و توانیان لەماوەیەکی کەمدا، بارودۆخەکە کۆنتڕۆڵ بکەن و تیرۆریستان راو بنێن."

یەکێک لە ئۆتۆمبێلەکانی پێشمەرگە کەوتە بۆسەی تیرۆریستانی داعشەوە، بەداخەوە حەوت پێشمەرگە شەهید بون

ئاماژە بەوەشکراوە، دواتر هێزی پێشمەرگە ئۆپراسیۆنێکی کێوماڵکردنی بۆ ناوچەکە ئەنجامدا، لەوکاتەدا یەکێک لە ئۆتۆمبێلەکانی پێشمەرگە کەوتە "بۆسەی تیرۆریستانی داعشەوە، بەداخەوە حەوت پێشمەرگە شەهید بون. وێڕای راگەیاندنی پرسە و سەرەخۆشیمان بۆ کەسوکاری شەهیدانی پێشمەرگە و شەهیدانی گوندی خدر جیجە، دوپاتی دەکەینەوە، کە خوێنی شەهیدانمان بەفیڕۆ ناچێت و تیرۆریستان و ئەوانەی پاڵپشتیشیان دەکەن، دەبێ باجێکی گەورە بدەن."

دەبێت ئۆپراسیۆنی هاوبەش دەست پێبکەین و نابێت چیتر رێگە بدەین، تیرۆریستان مۆڵگەو شوێنی حەوانەوەیان هەبێت

لەبارەی زیادبونی هێرشەکانی داعش و بەئامانجگرتنی پێشمەرگە و هاوڵاتیانی مەدەنی وەزارەتی پێشمەرگە ئەوەی خستوەتەڕو، "هەماهەنگی و هاوکاری نێوان وەزارەتی پێشمەرگە و وەزارەتی بەرگری عێراق و هاوپەیمانان پێویستە لە قۆناغی چەق بەستویی بێتە دەر، زۆر بەخێرایی و  بەبێ چاوەڕوانی کردن دەبێت ئۆپراسیۆنی هاوبەش دەست پێبکەین و نابێت چیتر رێگە بدەین، تیرۆریستان مۆڵگەو شوێنی حەوانەوەکانیان وەک خۆی بمێنن و ناوچەی پارێزراوی خۆیان هەبێت."

بەرەبەیانی ئەمڕۆش فەرماندەیی هەولێری هێزی پێشمەرگە رایگەیاند، شەوی رابردو لەکاتی روبەڕوبونەوەی چەکدارانی داعش لەگوندی نازی کەند لە سنوری قەرەچوغ، حەوت پێشمەرگە کەوتنەبۆسەی داعشەوە و سەرجەمیان شەهیدبون.

داعش لەچەند ناوچەیەکدا  جموجۆڵەکانی زیادکردوە و زیانی بە هێزە ئەمنییەکان گەیاندوە

لەعێراق ماوەی چەندین مانگە جموجۆڵی چەکدارانی داعش زیادیکردوە بەتایبەت لە سنوری ناوچە کێشەلەسەرەکان، بەرپرسانی پێشمەرگەش دەڵێن بەهۆی نەبونی هەماهەنگیی هێزە ئەمنییەکان و بونی بۆشایی ئەمنی، داعش لەچەند ناوچەیەکدا  جموجۆڵەکانی زیادکردوە و زیانی بە هێزە ئەمنییەکان گەیاندوە، ئەوە جگە لەوەی دانیشتوانی ئەو ناوچانە روبەڕوی مەترسی بونەتەوە.