کەشناسی سلێمانی: ئەمشەو بارانبارین دەستپێدەکات

11:24 - 01/12/2021

9020جار خوێندراوەتەوە

خەندان-

بەڕێوەبەری کەشناسی و بومەلەرزەزانی سلێمانی رایگەیاند، پێشبینی دەکرێت لە ئەمڕۆوە شەپۆلێکی بارانبارین پارێزگای سلێمانی بگرێتەوە و ماوەی 48 کاتژمێر بەردەوام دەبێت، دەشڵێت "بەهۆی ئەوەی دو وەرزی بارانبارینمان لەبەردەم ماوە کە 80%ی کۆی بارانبارین پێکدەهێنن، هێشتا زوە باس لە وشکەساڵی بکەین".

ئاسۆ کەمال، بەڕێوەبەری کەشناسی و بومەلەرزەزانی سلێمانی بە خەندان-ی راگەیاند، پێشبینی دەکرێت لە ئەمڕۆوە دۆخی کەشوهەوا بەقۆناغێکی ناجێگیردا تێپەڕێت ئەویش بەهۆی کاریگەری ناوچەکە بە نزمە پاڵەپەستۆیەک کە لەکاتی نیوەڕۆدا ناوچەکانی پارێزگای دهۆک دەگرێتەوە و لەکاتی شەویشدا کاریگەرییەکەی لەسەر پارێزگای سلێمانی و باشوری هەرێم دروست دەکات، کاریگەرییەکەشی تا شەوی پێنجشەممە بەردەوام دەبێت.

 پلەکانی گەرما زیاتر ڕو لەدابەزین دەکەن و خێرایی باش چالاکتر دەبێت
ئاماژەی بەوەشکرد، هەروەها بەهۆی هاتنی بارستەهەوایەکی ساردی جەمسەری کە ساڵانە لەم کاتەدا کاریگەری ئەو بارستەهەوایە لەسەر ناوچەکە دەردەکەوێت، لەئەمشەوەوە پلەکانی گەرما زیاتر ڕو لەدابەزین دەکەن و خێرایی باش چالاکتر دەبێت.
تائێستا 35.7 ملیمەتر بارانباریوە، لەکاتێکدا ساڵانی ئاسایی لەوەرزی پایزدا 105 ملیمەتر باران باریوە
بەڕێوەبەری کەشناسی و بومەلەرزەزانی سلێمانی ئەوەشی خستەڕو، ئەمساڵیش ئاستی بارانبارین لە وەرزی پایزدا لاواز بوە و تائێستا 35.7 ملیمەتر بارانباریوە، لەکاتێکدا ساڵانی ئاسایی لەوەرزی پایزدا 105 ملیمەتر باران لەپارێزگای سلێمانی باریوە، بەڵام تائێستاش وەرزی زستان و بەهار ماوە کە زیاتر لە 80%ی کۆی بارانبارین لەم دو وەرزەدا دەبێت.
ئەگەر رێژەی بارانبارین لە 342 ملیمەتر کەمتربو، ئەوساڵە بە وشکەساڵی ناودەبرێت
لەبارەی ئەگەری وشکەساڵیش لەکوردستان باسی لەوەکرد، تێکڕای بارانبارینی ساڵانە لە پارێزگای سلێمانی 685 ملیمەترە و هەر کاتێک رێژەی بارانبارین لەنیوەی ئەم رێژەیە کەمتربێت کە (342 ملیمەترە) ئەوساڵە بە وشکەساڵی ناودەبرێت.

نیشانەکردن

کەش و هەوا باران