پەیامی مەسرور بارزانی بۆ ڕۆژی جیھانیی نەھێشتنی توندوتیژی دژ بە ژنان

10:39 - 25/11/2021

993جار خوێندراوەتەوە

خەندان-

مەسرور بارزانی، سەرۆکی حکومەتی هەرێمی کوردستان رایگەیاند، حکومەتی هەرێم پابەندە بەپشتیوانیکردنی مافەکانی ژنان، نەهێشتنی هەمو جۆرە جیاکارییەکی ڕەگەزی و نەهێشتنی توندوتیژی بە گشتی، بۆیە داوا لە دامەزراوە پەروەردەییەکان، ڕێکخراوەکانی کۆمەڵگەی مەدەنی و دامەزراوە ئایینیەکان دەکەن لەم بوارەدا رۆڵی خۆیان بگێڕن تا بەهەمولایەک کوردستان بکەن بە نمونەیەکی گەشی پاراستنی مافەکانی مرۆڤ.

مەسرور بارزانی، سەرۆکی حکومەتی هەرێمی کوردستان بۆ ڕۆژی جیھانیی نەھێشتنی توندوتیژی دژی ئافرەتان پەیامێکی بڵاوکردەوە و باسی لەوەشكردوە، لە ڕۆژی جیهانیی نەهێشتنی توندوتیژی دژی ئافرەتان و دەستپێکردنی ھەڵمەتێکی 16 ڕۆژە بۆ بەرەنگاربونەوەی توندوتیژی دژی ئافرەتان، پابەندبونی حکومەتی هەرێمی کوردستان، بە درێژەدان بە پشتیوانیکردنی مافەکانی ئافرەتان و نەهێشتنی هەمو جۆرە جیاکارییەکی ڕەگەزی و نەهێشتنی توندوتیژی بە گشتی و توندوتیژی دژی ئافرەتان بەتایبەتی، دوپات دەکەنەوە.

  کار دەکەین لەپێناو ڕەخساندنی زەمینەیەکی لەبار کە ئافرەتان تێیدا پارێزراو بن و گەشە بکەن
ئاماژەی بەوەشکردوە،  کار دەکەن لەپێناو ڕەخساندنی زەمینەیەکی لەبار کە ئافرەتان تێیدا پارێزراو بن و گەشە بکەن، بەشێوەیەک بتوانن بە لێهاتویی خۆیانەوە وەک بکەرێکی سەرەکی لە کۆی کایەکانی کۆمەڵگای کوردستاندا بەشدار بن. هەروەها حکومەتی هەرێم، پابەندە بە پاراستن و داکۆکیکردن لە مافەکانی ئافرەتان و بەهێزکردنی پێگەیان لەناو حکومەت و کۆمەڵگە و پەرەپێدانی کولتوری ڕێزگرتن لە بنەماکانی مافی مرۆڤ و یەکسانی و دادپەروەری کۆمەڵایەتی و نەهێشتنی توندوتیژی و هەمو جیاکارییەک لەسەر بنەمای ڕەگەز.
رۆڵی گرنگی خۆیان لە برەودان بە کولتوری لێبوردەیی و هۆشیاری کۆمەڵایەتی بگێڕن
سەرۆکی حکومەتی هەرێم داواش لە هەمو لایەنە پەیوەندیدارەکان و بە تایبەت دامەزراوە پەروەردەییەکانی ناو حکومەت و دەرەوەی حکومەت، ڕێکخراوەکانی کۆمەڵگەی مەدەنی و دامەزراوە ئایینیەکان و دەزگاکانی راگەیاندن دەکات کە هاوکار و یارمەتیدەری حکومەت بن و رۆڵی گرنگی خۆیان لە برەودان بە کولتوری لێبوردەیی و هۆشیاری کۆمەڵایەتی و نەهێشتنی توندوتیژی و دیاردە کۆمەڵایەتییە نەشیاوەکان بگێڕن، چونکە روبەڕوبونەوە و نەهێشتنی توندوتیژی، ئەرکی هەمو کۆمەڵگەیە و پێویستە هەموان کار بۆ نەهێشتنی ئەو دیاردە ناشارستانییە بکەین. 

ئەوەشی خستوەتەڕو، "ئومێدەوارم هەرێمی کوردستان بە هاوکاری هەمولایەک، نمونەیەکی گەشی پاراستنی مافەکانی مرۆڤ بەگشتی و نەهێشتنی هەمو جۆرە توندوتیژییەک بێت، بەتایبەت توندوتیژی لەسەربنەمای جێندەر."