چیرۆكی ئەو كۆچبەرە كوردەی لەسنوری پۆڵندا له‌سه‌رمادا رەقبوەوە‌

08:41 - 25/11/2021

6808جار خوێندراوەتەوە

خەندان-

دوا ئەوەی به‌ختیار ئه‌نوه‌ری تەمەن 25 ساڵ کە رۆژی سێشەممەی رابردو به‌هۆی سه‌رماى زۆره‌وه‌ له‌ ناوچه‌یه‌كی سنوریی پۆڵندا رەقبوەوە‌، ڕێكخراوی مافی مرۆڤی هەنگاو رایدەگەیەنێت، به‌ختیار و خێزانەکەی لە بنەڕەتدا خەڵكی سەلاسی باوەجانە  لەرۆژهەڵاتی کوردستان و لەدوای شەڕی عێراق-ئێرانەوە ئاوارە بون.

پێشوتر له‌ كه‌مپى باریکە له‌ سلێمانى و لەماوەی رابردوشدا ڕویكردوەتە بیلاڕوسیا
به‌ختیار ئه‌نوه‌ر، رۆژی سێشەممەی رابردو (23ی تشرینی دوەم) به‌ هۆی سه‌رمای زۆره‌وه‌ له‌ ناوچه‌یه‌كی سنوریی نێوان پۆڵندا و ئه‌ڵمانیا له‌سه‌رمادا رەقبوەوە‌، به‌ختیار پێشوتر له‌ كه‌مپى باریکە له‌ سلێمانى ژیاوە و لەماوەی رابردوشدا ڕویكردوەتە بیلاڕوسیا.
لەکاتی شەڕی ئێران و عێراق لەگەڵ سەدان بنەماڵەی دیکە ئاوارەی عێراق بون
ڕێكخراوی مافی مرۆڤی هەنگاو لەبارەی چیرۆکی کۆچبەری به‌ختیار بڵاویکردوەتەوە، بەختیار تەمەنی 25 ساڵە و لە بنەڕەتدا خەڵکی سەلاسی باوەجانی سەر بە پارێزگای کرماشانە، هەروەها بنەماڵەكەی لەکاتی شەڕی ئێران و عێراق لەگەڵ سەدان بنەماڵەی دیکە ئاوارەی عێراق بون و لە کەمپی ئاڵتاش سەر بە پارێزگای ڕومادی نیشتەجێکراون.
بنەماڵەی بەختیار لە کەمپی باریکە نیشتەجێبون
ئاماژەی بەوەشکردوە، لەدوای ڕوخانی ڕژێمی سەدام ئەو بنەماڵانە گوازراونەتەوە بۆ کەمپەکانی تایبەت بە پەناخوازەکان لە سلێمانی، کەلار و هەولێر و بنەماڵەی بەختیار لە کەمپی باریکە نیشتەجێبون.
ئەمساڵ لانیکەم حەوت كۆچبەری کوردی خەڵکی کرماشان گیانیان لەدەستداوە
ڕێكخراوی مافی مرۆڤی هەنگاو دەڵێت، ئەمساڵ لانیکەم حەوت كۆچبەری کوردی خەڵکی کرماشان، سەلاسی باوەجانی، مەریوان (3 کەس) و سەردەشت (2 کەس) لەکاتی چون بۆ ئەوروپا گیانیان لەدەستداوە کە دو کەسیان ژن بون.