ئه‌بوبه‌كر كاروانی له‌ دیداری خه‌ندان: بەم دۆخەی ئێستامان ناتوانین به‌رگری له‌ هیچ شارێكی كوردستان بكه‌ین

09:07 - 25/08/2021

14347جار خوێندراوەتەوە

خه‌ندان-

ئه‌بوبه‌كر كاروانی، نوسه‌ر و سیاسه‌تمه‌دار لە بەرنامەی له‌ دیداری خه‌ندان رایگه‌یاند، هه‌رێمی كوردستان به‌مجۆره‌وه‌ ناتوانێت به‌رگری له‌ هیچ شارێكی كوردستان بكات، "به‌داخه‌وه‌ ئه‌گه‌ر كوردستان بكه‌وێته‌ به‌رده‌می په‌لامار به‌تایبه‌تی ئه‌گه‌ر فڕۆكه‌ی تیادا به‌كاربهێنرێت و پشتیوانی ده‌ره‌كیمان نه‌بێت زۆر قورسه‌ توانامان هه‌بێت به‌رگری له‌ هیچ شارێكی كوردستان بكه‌ین و ناچارین جارێكی تر بچینه‌وه‌ شاخه‌كان، ئه‌مه‌ مه‌ترسی گه‌وره‌یه‌، ئه‌وه‌ش به‌هۆی ئه‌و دۆخه‌وه‌یه‌ كه‌ له‌ هه‌رێم هه‌یه‌ به‌تایبه‌تی دۆخی یه‌كنه‌گرتن، دابه‌شبون و ناكۆكی و نائومێدی خه‌ڵك و مه‌ودای نێوان به‌رپرسان و خه‌ڵكی ئاسایی و لاوازی ئه‌و شوناسه‌ی كه‌ خه‌ڵك ده‌به‌ستێته‌وه‌ به‌ پڕۆژه‌ی كوردستانی و هه‌رێمی كوردستان".

ئه‌بوبه‌كر كاروانی، نوسه‌ر و سیاسه‌تمه‌دار لەمیانی بەرنامەی دیداری خەندان کە بەرنامەیەکی هەفتانەیە و لەلایەن رۆژنامەنوس هەڤاڵ محەمەدەوە ئامادەو پێشکەش دەکرێت، باسی له‌ روداوه‌كانی ئه‌فغانستان كرد و له‌باره‌ی ئه‌وه‌ی ئایا ئه‌وه‌ی له‌و وڵاته‌ رویدا سیاسه‌تی ئه‌مریكا بو یاخود شكستیهێنا، رایگەیاند، "هه‌ردوكی بو، فۆڕمێك بو له‌ شكستی ئه‌مریكا، له‌به‌رئه‌وه‌ی كه‌ جۆبایدن خۆی وتی كه‌ ئه‌فغانستان گۆڕستانی ئیمپڕاتۆریه‌ته‌كانه‌، ئه‌وه‌ش ئاماژه‌ بو بۆ ئه‌وه‌ی كه‌ له‌دوای تێكشكاندنی بریتانییه‌كان له‌كاتی خۆی و دواتر سۆڤیه‌تییه‌كان و ئه‌مریكایه‌كانیش تێكشكاون، له‌به‌رئه‌وه‌ی رونه‌ ئه‌مریكا ئه‌و حكومه‌ته‌ی كه‌ دروستی كردبو و پشتیوانی لێده‌كردن حكومه‌ته‌كه‌ی تێكشكا، ئه‌مریكا نه‌یتوانی به‌ شه‌ڕ مه‌سه‌له‌ی ئه‌فغانستان یه‌كلایی بكاته‌وه‌ و سه‌ربكه‌وێت به‌سه‌ر تاڵیباندا، بۆیه‌ ناچاربو له‌چوارچێوه‌ی رێككه‌وتننامه‌یه‌كدا له‌گه‌ڵ تاڵیبان بڕیاری كشانه‌وه‌ی هێزه‌كانی خۆی بدات له‌ چوارچێوه‌ی ئه‌و به‌ڵێنانه‌ی كه‌ سه‌رۆكی ئه‌مریكا به‌ گه‌لی ئه‌مریكای دابو، وه‌ ئه‌و تێگه‌یشتنانه‌ی هه‌یانه‌ بۆ جۆری ئیداره‌كردنی ململانێكان له‌ناوچه‌ی رۆژهه‌لاتی ناوه‌ڕاست و ده‌ریای چین، كه‌واتا ئه‌مریكا شكستیخوارد له‌چوارچێوه‌ی رێككه‌وتننامه‌یه‌كدا شكسته‌كه‌ی شارده‌وه‌ و فۆڕمێكی تری پێبه‌خشی".

ئەمریکا دەیەوێت ئه‌فغانستان جارێكی تر نه‌بێته‌وه‌ به‌ مۆڵگه‌ی ئه‌لقاعیده‌، پێموایه‌ له‌ داهاتودا تاڵیبان ئه‌و ئه‌ركه‌ له‌ ئه‌مریكا جوانتر به‌ڕێوه‌ده‌بات
ئاماژه‌ی به‌وه‌شكرد، "ئەمریکا ئێستاش سیاسه‌ت ده‌كات به‌ڵێ ئه‌مه‌ كاریگه‌ری هه‌یه‌ به‌سه‌ر جۆری هاتنه‌وه‌ی تاڵیباندا، وه‌ ئه‌و ئامانجانه‌ی ئه‌مریكا هه‌یبوه‌ له‌ ئه‌فغانستاندا كه‌ ئه‌ویش ئه‌وه‌یه‌ ئه‌فغانستان جارێكی تر نه‌بێته‌وه‌ به‌ مۆڵگه‌ی ئه‌لقاعیده‌ و هێز گه‌لی وه‌كو داعش و نه‌بێت به‌ مه‌ترسی له‌سه‌ر ئه‌مریكا، پێموایه‌ له‌ داهاتودا كه‌ تاڵیبان ئه‌و ئه‌ركه‌ له‌ ئه‌مریكا جوانتر به‌ڕێوه‌ده‌بات و ناهێڵێت ئه‌فغانستان وه‌كو جاران ببێته‌ ئه‌و هێزانه‌ی كه‌ به‌هێزی تیرۆرستی جیهانگه‌را ده‌ناسرێن له‌وێنه‌ی داعش و ئه‌لقاعیده‌".
ئەمریکا ستراتیژێكی تری گرتوه‌ته‌به‌ر ئه‌ویش ئه‌وه‌یه‌ كه‌مترین هێز له‌ سه‌ر زه‌وی بخاته‌گه‌ڕ ته‌نها له‌رێگه‌ی هێزی ئاسمانییه‌وه‌ پشتیوانی له‌و گروپانه‌ بكات كه‌ لایه‌نگری ئه‌ون و توانای به‌رگریكردن له‌ خۆیان هه‌یه‌
ئه‌بوبه‌كر كاروانی باسی له‌وه‌شكرد، عێراق و ئه‌فغانستان هه‌ردوكیان لانیكه‌م له‌ یه‌ك شتی زۆر سه‌ره‌كیدا هاوبه‌شن ئه‌ویش ئه‌وه‌یه‌ هه‌ردوكیان له‌ چوارچێوه‌ی شه‌ڕی ئه‌مریكا دژ به‌ تیرۆر كه‌ له‌ ساڵی 2001ه‌وه‌ راگه‌یه‌ندراوه‌ له‌دوای هێرشه‌كانی سێپته‌مبه‌ره‌وه‌، رژێمه‌كانیان روخاوه‌، واتا له‌چوارچێوه‌ی یه‌ك ستراتیژی هاوبه‌شدا به‌ یه‌ك پاساوی هاوبه‌ش رژێمی به‌عس له‌ عێراق و رژێمی تاڵیبان له‌ ئه‌فغانستان له‌ عێراقدا روخاون،  ئه‌وه‌ی روده‌دات ته‌نها په‌یوه‌ندی به‌ ئه‌فغانستانه‌وه‌ نیه‌، په‌یوه‌ندی به‌ قۆناغی كۆتاییهاتنی ئه‌و شه‌ڕه‌ هه‌یه‌ به‌شێوه‌ی كۆنه‌كه‌ی، له‌ هه‌مو جیهاندا كه‌ ئه‌مریكا هێز به‌رێت و وڵاتێك داگیر بكات به‌ناوی دژایه‌تیكردنی تیرۆر و سه‌ركوتكردن و ده‌ستگیركردنی سه‌ركرده‌كانی، ئێستا ستراتیژێكی تری گرتوه‌ته‌به‌ر ئه‌ویش ئه‌وه‌یه‌ كه‌مترین هێز له‌ سه‌ر زه‌وی بخاته‌گه‌ڕ ته‌نها له‌رێگه‌ی هێزی ئاسمانییه‌وه‌ پشتیوانی له‌و گروپانه‌ بكات كه‌ لایه‌نگری ئه‌ون و توانای به‌رگریكردن له‌ خۆیان هه‌یه‌، تاڕاده‌یه‌كیش له‌ قۆناغی دوه‌می شه‌ڕی داعشدا ئه‌م ستراتیژیه‌ی گرته‌به‌ر، ستراتیژییه‌كه‌ عێراقیش ده‌گرێته‌وه‌ به‌ڵام مه‌رج نیه‌ هه‌مان سیناریۆی ئه‌فغانستان له‌ عێراق دوباره‌ ببێته‌وه‌.
رۆژهه‌ڵاتی ناوه‌ڕاست بایه‌خی جارانی بۆ ئه‌مریكا نه‌ماوه‌ و هاوپه‌یمانییه‌تیه‌كی نوێ له‌ناوچه‌كه‌دا هاتوه‌ته‌ كایه‌وه‌، كه‌ ئه‌ویش هاوپه‌یمانی ئیسرائیل و عه‌ره‌به‌كانه‌
رونیشیكرده‌وه‌، "رۆژهه‌ڵاتی ناوه‌ڕاست بایه‌خی جارانی بۆ ئه‌مریكا نه‌ماوه‌ و هاوپه‌یمانییه‌تیه‌كی نوێ له‌ناوچه‌كه‌دا هاتوه‌ته‌ كایه‌وه‌، كه‌ ئه‌ویش هاوپه‌یمانی ئیسرائیل و عه‌ره‌به‌كانه‌، به‌جۆرێك له‌ جۆره‌كان ده‌یه‌وێت له‌ رێگه‌ی ئه‌مه‌وه‌ و به‌شێكیشی له‌ رێگه‌ی توركیاوه‌ ئه‌و بۆشاییه‌ پڕبكاته‌وه‌ كه‌ ئه‌مریكا له‌م ناوچه‌یه‌دا به‌جێی ده‌هێڵێت، ئه‌مریكا ناوچه‌كه‌ به‌جێناهێڵی، به‌ڵام فۆڕمی ئاماده‌بونی له‌ ناوچه‌كه‌دا ره‌نگه‌ به‌شێوه‌یه‌كی تر بێت، وه‌ ئه‌وه‌ی ئایا له‌ عێراق ده‌كشێته‌وه‌؟ به‌بڕوای من ئه‌گه‌رێكه‌ له‌ به‌رده‌مماندا و ده‌بێت له‌ كوردستان و عێراقیشدا حساب بۆ ئه‌و ئه‌گه‌ره‌ بكرێت به‌تایبه‌ت ئێران رۆڵ ده‌بینێت له‌وه‌ی كه‌ ئه‌مریكا بڕیاری چۆن ده‌بێت، ته‌نها ئه‌مریكییه‌كان سه‌ربه‌خۆ بڕیار ناده‌ن".
 تاڵیبان نوێنه‌رایه‌تی كولتور و ئه‌فغانستان ده‌كات له‌روانگه‌ی خۆیه‌وه‌ له‌چوارچێوه‌ی جوگرافیا و سنوری ئه‌فغانستاندا، واتا كارێكی به‌سه‌ر ده‌ره‌وه‌ی ئه‌فغانستان نیه‌
له‌باره‌ی جیاوازییه‌كانی تاڵیبان له‌گه‌ڵ گروپه‌ چه‌كداره‌ توندڕه‌وه‌كانی دیكه‌ی وەک داعش و قاعیدە، ئه‌بوبه‌كر كاروانی وتی، "به‌دڵنیایی تاڵیبان جیاوازی هه‌یه‌، جیاوازی زۆر گرنگیشی هه‌یه‌ بۆ نمونه‌ ئایدۆلۆژیای تاڵیبان جیایه‌ له‌ ئایدۆلۆژیای قاعیده‌ و داعش، تاڵیبان به‌ پله‌ی یه‌كه‌م هێزێكی نه‌ریتی، ئیسلامی، خۆماڵی، خێڵه‌كی ئه‌فغانییه‌، ئایدۆلۆژیایه‌كی توندڕه‌وانه‌ی سه‌له‌فی جیهادی نیه‌ له‌ ڕوانگه‌ی داعش و ئه‌لقاعیده‌وه‌، هێزی وه‌كو تاڵیبان هێزێكی (موپته‌دیعن) واتا ئه‌وانه‌ن كه‌ خاوه‌نی عه‌قیده‌یه‌كی پاك نین، له‌رویه‌كی دیكه‌وه‌ جیاوازییه‌كی زۆر سه‌ره‌كی ئه‌وه‌یه‌ كه‌ تاڵیبان نوێنه‌رایه‌تی كولتور و ئه‌فغانستان ده‌كات له‌روانگه‌ی خۆیه‌وه‌ له‌چوارچێوه‌ی جوگرافیا و سنوری ئه‌فغانستاندا، واتا كارێكی به‌سه‌ر ده‌ره‌وه‌ی ئه‌فغانستان نیه‌، ئه‌وپه‌ڕی ئه‌گه‌ر كارێكی هه‌بێت به‌سه‌ر پشتونه‌كانی پاكسانه‌وه‌، هێزێكی به‌جیانیكراوی جیهادی نیه‌، به‌ڵكو تایبه‌ته‌ به‌ جوگرافیا و خاك و گه‌لی ئه‌فغانستانه‌وه‌، ئه‌و به‌ربه‌ره‌كانیه‌ی كردوشییه‌تی نوێنه‌رایه‌تی رۆح و كلتوری ئه‌فغانستانی كردوه‌ له‌ مێژودا كه‌ به‌رده‌وام به‌رگریان له‌خۆیان به‌رامبه‌ر به‌ داگیركاری رۆژئاوا كردوه‌، به‌ڵام خاڵی هاوبه‌شیان ئه‌وه‌یه‌ كه‌ هه‌ردوكیان چه‌كیان پێیه‌".
گه‌نده‌ڵی، ناكۆكی و لاوازی داموده‌زگا نیشتیمانییه‌كان و فشه‌ڵبونیان ئه‌وه‌ی له‌ ئه‌فغانستان هه‌بوه‌ له‌ عێراق و هه‌رێمی كوردستانیش هه‌یه‌
له‌باره‌ی لێكچونه‌كانی نێوانی ئه‌فغانستان، عێراق و هه‌رێمی كوردستان، كه‌ له‌ هه‌رسێكیان گه‌نده‌ڵی، خزمخزمێنه‌ و رێكنه‌خستنی هێزه‌كان هه‌یه‌، ئه‌بوبه‌كر كاروانی ده‌ڵێت، "له‌م ئاسته‌دا به‌راودكردنه‌كان راسته‌، ئه‌گه‌ر یه‌كێك له‌ هۆكاره‌ گرنگه‌كانی هه‌ره‌سهێنانی سوپای ئه‌فغانستان ئه‌وه‌بوبێت كه‌ ئه‌م سوپایه‌ ده‌ركه‌وت ئینتیمای نیه‌ بۆ ئه‌فغانستان و ئینتیمای نیه‌ بۆ گه‌لی ئه‌فغانستان و عه‌قیده‌یه‌كی سه‌ربازی دیاریكراوی نیه‌ له‌سه‌ری په‌روه‌رده‌ كراو بێت و متمانه‌ی نیه‌ به‌ سه‌ركرده‌ سیاسیه‌كان و سه‌ربازییه‌كانی خۆی و گه‌نده‌ڵیه‌كی زۆری تیاكراوه‌ له‌ناو ئه‌و سوپایه‌دا، له‌كاتێكدا سه‌ربازی ئاسایی بێبه‌شكراوه‌ و سه‌ركرده‌ سه‌ربارزیه‌كان و سیاسییه‌كان سه‌روه‌ت و سامانێكی زۆریان كه‌ڵه‌كه‌ كردوه‌ و له‌ كۆشكه‌ به‌رزه‌كاندا ژیاون، ئه‌وه‌ش مه‌ودای خستوه‌ته‌ نێوان به‌رپرسی سه‌ربازی و سیاسی و خه‌ڵكی هه‌ژار و هاوڵاتی ئاسایی له‌ ئه‌فغانستاندا به‌دڵنیایی ئه‌مه‌ش له‌ عێراق و هه‌رێمی كوردستان به‌ ئاستی جیاواز هه‌یه‌، سوپا له‌ عێراقدا ئینتیمای بۆ عێراق زۆر زۆر كه‌مه‌ و سوپایه‌كه‌ نیشتیمانی نیه‌ با به‌ناوی عێراقییشه‌وه‌ قسه‌ بكات، 60 میلیشا له‌ عێراقدا هه‌یه‌ و ناكۆكییه‌كی زۆر هه‌یه‌ كه‌ له‌ ئه‌فغانستانیشدا هه‌بو، كه‌واته‌ گه‌نده‌ڵی، ناكۆكی و لاوازی داموده‌زگا نیشتیمانییه‌كان و فشه‌ڵبونیان ئه‌وه‌ی له‌ ئه‌فغانستان هه‌بوه‌ له‌ عێراق و هه‌رێمی كوردستانیش هه‌یه‌.
 
وتیشی، "ئێمه‌ له‌ هه‌رێمی كوردستاندا ئه‌كته‌رێكی ناده‌وڵه‌تین، ئه‌كته‌ری ناده‌وڵه‌تی جگه‌ له‌و پشتیوانیه‌ ده‌ستورییه‌ی كه‌ هه‌مانه‌ پێویستی به‌ هێزێكی جیهانی هه‌یه‌ بۆ ئه‌وه‌ی پشتیوانی له‌ مانه‌وه‌ی بكات، چه‌ند ساڵه‌ ئێمه‌ ئیراده‌مان نه‌بوه‌ كه‌ هێزێكی نیشتیمانی له‌ هه‌رێمی كوردستاندا دروست بكه‌ین و زۆرنه‌ حزبییه‌كان تێبپه‌ڕێنین و مانا بگێڕینه‌وه‌ بۆ نیشتیمان و سه‌ربكه‌وین له‌ پڕۆسه‌ی نیشتیمانسازی و ده‌وڵه‌تسازی و نه‌ته‌وه‌ سازیدا، ئه‌مه‌ هه‌مان ئه‌وه‌یه‌ كه‌ له‌ ئه‌فغانستان نوخبه‌ی نوێی ئه‌فغانستان دوای 2001 و ئه‌مریكاش له‌ناویاندا شكستی خوارد كه‌ نه‌یانتوانی پڕۆسه‌ی نه‌ته‌وه‌سازی و ده‌وڵه‌تسازی له‌وێ سه‌ربخه‌ن، ئه‌وه‌ له‌ عێراق و هه‌رێمی كوردستان هه‌یه‌، بۆیه‌ ده‌بێت بترسین له‌وه‌ی به‌رئه‌نجامێكی هاوشێوه‌مان هه‌بێت، مه‌رج نیه‌ به‌وجۆره‌، به‌ڵام ئایا ئه‌مریكا له‌ عێراق كشایه‌وه‌ عێراق هه‌ر به‌مجۆره‌ی ئێستا ده‌مێنێته‌وه‌؟ هه‌رێمی كوردستان هه‌ر به‌مجۆره‌ی ئێستا ده‌مێنێته‌وه‌ ئه‌وه‌ پرسیارێكه‌ ده‌بێت هه‌مو سیاسه‌تمه‌دارێك و بیرمه‌ندێكی عاقڵ له‌ خۆی بكات له‌ عێراق و كوردستاندا".
مه‌ترسییه‌كه‌ی ئێمه‌ گه‌وره‌تره‌ له‌ ئه‌فغانستان به‌تایبه‌تی له‌ هه‌رێمی كوردستاندا، ئێمه‌ یه‌كه‌م ده‌وڵه‌ت نین و گه‌ره‌نتی نێوده‌وڵه‌تیمان نیه‌ و زۆر شتمان بۆ ناچێته‌ سه‌ر له‌ جیهاندا و ناتوانین هه‌ندێك مامه‌ڵه‌ هه‌یه‌ بیكه‌ین
له‌وه‌ڵامی ئه‌و پرسیاره‌ی ئایا چی هێزێك ده‌بێته‌ هه‌ڕه‌شه‌ بۆ سه‌ر هه‌رێمی كوردستان، له‌كاتێكدا ئێستا هه‌رێمی كوردستان هیچ هێزێكی ئۆپۆزسیۆنی نیه‌، له‌كاتێكدا تاڵیبان له‌ چیاكانی ئه‌فغانستان بون و ساڵانێك له‌گه‌ڵ حكومه‌تی كابوڵ له‌ جه‌نگدابون، ئه‌بوبه‌كر كاروانی وتی، "به‌ بڕوای من مه‌ترسییه‌كه‌ی ئێمه‌ گه‌وره‌تره‌ له‌ ئه‌فغانستان به‌تایبه‌تی له‌ هه‌رێمی كوردستاندا، ئێمه‌ یه‌كه‌م ده‌وڵه‌ت نین و گه‌ره‌نتی نێوده‌وڵه‌تیمان نیه‌ و زۆر شتمان بۆ ناچێته‌ سه‌ر له‌ جیهاندا و ناتوانین هه‌ندێك مامه‌ڵه‌ هه‌یه‌ بیكه‌ین و هه‌ندێك ره‌وایه‌تی هه‌یه‌ نیمانه‌، له‌به‌رئه‌وه‌ی كۆمه‌ڵگه‌ی نێوده‌وڵه‌تی و نه‌ته‌وه‌ یه‌كگرتوه‌كان نێوده‌وڵه‌ته‌ یه‌كگرتوه‌كانه‌، ده‌وڵه‌ت یه‌كه‌ی مامه‌ڵه‌كردنی نێوده‌وڵه‌تییه‌، له‌لایه‌كی دیكه‌وه‌ له‌ ئه‌فغانستان كه‌ تاڵیبان هه‌یه‌ و ده‌توانێت جێگره‌وه‌ی حكومه‌تێك بێت كه‌ ده‌ڕوخێت به‌جۆرێك له‌ جۆره‌كان شتێكی ئیجابیه‌، خوانه‌خواسته‌ ئه‌گه‌ر هه‌رێمی كوردستان به‌ر په‌لامار بكه‌وێت ئێمه‌ هێزێكمان نیه‌ جێگه‌ی حكومه‌تی هه‌رێمی كوردستان بگرێته‌وه‌، واتا ئه‌گه‌ر روخانێك روبدات به‌سه‌ر هه‌مویدا ده‌ڕوخێت و هێزی جێگره‌وه‌مان نامێنێت".
زۆر قورسه‌ توانامان هه‌بێت به‌رگری له‌ هیچ شارێكی كوردستان بكه‌ین و ناچارین جارێكی تر بچینه‌وه‌ شاخه‌كان، ئه‌مه‌ مه‌ترسی گه‌وره‌یه‌
هه‌روه‌ها باسی له‌وه‌كرد، "كێشه‌ی ئێمه‌ ئه‌وه‌یه‌ ئه‌گه‌ر هه‌رێمی كوردستان له‌ ده‌ره‌وه‌ په‌لامار درا و له‌ناوخۆدا خه‌ڵكه‌كه‌ی به‌مجۆره‌ نائومێدیه‌ مایه‌وه‌ و ئه‌م هه‌مو ناڕه‌زایه‌تی و ناكۆكی و دابه‌شبونه‌ی له‌ هه‌رێمی كوردستاندایه‌ به‌مجۆره‌ بو و نه‌یتوانی به‌رگری له‌ خۆی بكات ئه‌وكاته‌ چاره‌نوسی كورد و هه‌رێمی كوردستان چی لێدێت، ئه‌وكاته‌ ئه‌گه‌ر هێزێكمان هه‌بوایه‌ جێگره‌وه‌ی یه‌كێتی و پارتی و توانای به‌رگریكردن له‌ هه‌رێمی كوردستانی ببوایه‌ ئێمه‌ خۆشبه‌خت ده‌بوین، به‌ڵام ئێمه‌ ئه‌و هێزه‌مان نیه‌، ئێمه‌ ناتوانین به‌مجۆره‌وه‌ به‌رگری له‌ هیچ شارێكی كوردستان بكه‌ین، هێزی پێشمه‌رگه‌ی ئێمه‌، خه‌ڵكی ئێمه‌ به‌مجۆره‌ی ئێستا به‌داخه‌وه‌ ئه‌گه‌ر كوردستان بكه‌وێته‌ به‌رده‌می په‌لامار به‌تایبه‌تی ئه‌گه‌ر فڕۆكه‌ی تیا به‌كاربهێنێت و پشتیوانی ده‌ره‌كیمان نه‌بێت زۆر قورسه‌ توانامان هه‌بێت به‌رگری له‌ هیچ شارێكی كوردستان بكه‌ین و ناچارین جارێكی تر بچینه‌وه‌ شاخه‌كان، ئه‌مه‌ مه‌ترسی گه‌وره‌یه‌ ئه‌مه‌ش به‌هۆی ئه‌و دۆخه‌وه‌یه‌ كه‌ له‌ هه‌رێمی كوردستان هه‌یه‌ به‌تایبه‌تی دۆخی یه‌كنه‌گرتن، دابه‌شبون و ناكۆكی و نائومێدی خه‌ڵك و مه‌ودای نێوان به‌رپرسان و خه‌ڵكی ئاسایی و لاوازی ئه‌و شوناسه‌ی كه‌ خه‌ڵك ده‌به‌ستێته‌وه‌ به‌ پڕۆژه‌ی كوردستانی و هه‌رێمی كوردستان".
داعش ده‌توانرێت له‌چوارچێوه‌ی ستراتیژیه‌تێكی هه‌رێمی یان نێوده‌وڵه‌تی زیندوبكرێته‌وه‌، ئه‌كرێت به‌عسییه‌كان زیندوبكرێته‌وه‌ له‌ پاڵ ئه‌واندا به‌ بڕوای من حه‌شدی شه‌عبی هه‌ڕه‌شه‌یه‌كی راسته‌قینه‌یه‌
له‌باره‌ی ئه‌وه‌یه‌ ئایا مه‌ترسییه‌كه‌ چ لایه‌نێكه‌ بۆ سه‌ر هه‌رێمی كوردستان، به‌تایبه‌ت كه‌ ئێستا داعش نه‌ماوه‌ كه‌ ساڵانی رابردو پێشمه‌رگه‌ ئه‌و هه‌ژمونه‌ی داعشی تێكشكاند، ئه‌و سیاسه‌تمه‌داره‌ی كوردستان وتی، "پێش هه‌مو شتێكی ئێمه‌ خۆمان هه‌ڕه‌شه‌ین له‌سه‌ر خۆمان، ناكۆكی ناوخۆمان، ئه‌و كێشانه‌ی هه‌مانه‌ و تا ئێستا چاره‌سه‌رمان نه‌كردون، نا داموده‌زگایی وڵاته‌كه‌مان و نادامه‌زراوه‌یی هێزه‌ سه‌ربازییه‌كان و نائومێدی و ناڕه‌زایه‌تی خه‌ڵك ئه‌مه‌ گه‌وره‌ترین سه‌رچاوه‌ی هه‌ڕه‌شه‌یه‌، دوه‌میان داعش نه‌ماوه‌، به‌ڵام ده‌توانرێت له‌چوارچێوه‌ی ستراتیژیه‌تێكی هه‌رێمی یان نێوده‌وڵه‌تی زیندوبكرێته‌وه‌، ئه‌كرێت به‌عسییه‌كان زیندوبكرێته‌وه‌ له‌ پاڵ ئه‌واندا به‌ بڕوای من حه‌شدی شه‌عبی هه‌ڕه‌شه‌یه‌كی راسته‌قینه‌یه‌ له‌سه‌ر هه‌رێمی كوردستان و ئامڕازی فشاركردنی وڵاتێكی دراوسێشه‌، بمانه‌وێت و نه‌مانه‌وێت وڵاته‌ هه‌رێمییه‌كانی به‌جۆرێك له‌ جۆره‌كان له‌گه‌ڵ هه‌رێمێكی كوردستانی به‌هێزدا نین له‌به‌رئه‌وه‌ی خۆیان كێشه‌ی كوردیان هه‌یه‌ و ناخوازن ئه‌م هه‌رێمی كوردستانه‌ گه‌شاوه‌ بێت و سه‌رچاوه‌ی ئیلهام بێت بۆ كوردی پارچه‌كانی تر، راسته‌ ئێستا وه‌كو ساغكردنه‌وه‌ی كاڵاكانیان سودی لێده‌بینرێت و هه‌رێمێكی لاواز زۆر مه‌ترسی نیه‌ بۆ سه‌ر ئه‌وان، كه‌واتا داعش، به‌عسییه‌كان، حه‌شدی شه‌عبی و خۆمان له‌ كات و له‌ ئاستی جۆراوجۆردا ده‌بن به‌ سه‌رچاوه‌ی هه‌ڕه‌شه‌ بۆ ئێمه‌".