ھۆشیار عومەر عەلی لە دیداری خەندان: ئێستا گۆڕان بوەتە خواستێکی نێودەوڵەتی

10:09 - 27/07/2021

5244جار خوێندراوەتەوە

خەندان-

هۆشیار عومەر عەلی، ئەندامی جڤاتی نیشتیمانی بزوتنەوەی گۆڕان لە دیداری خەندان باسی دۆخی ناوخۆی گۆڕان و رۆڵی کوڕانی نەوشیروان مستەفا دەکات و رایدەگەیەنێت، بەشێکی گەورە لەو رەمزیەتەی نەوشیروان مستەفا ئەمین "هی کاک چیا و کاک نمایە و رۆڵیشیان هەیە، هەرکەسێک ئینکاری ئەوە بکات پێموایە لەگەڵ خۆی و خەڵک و خواشدا درۆ دەکات، بەڵام هەتا ئێستا نە لە گۆڕان و نە لە حکومەتدا هیچیان نەویستوە و داوای هیچیان نەکردوە، بەڵام گومانمان نیە بۆ ئێستا و داهاتوی گۆڕان گرنگن و رۆڵی گرنگیشیان دەبێت".

هۆشیار عومەر عەلی، ئەندامی جڤاتی نیشتیمانی بزوتنەوەی گۆڕان لە ساڵیادی یەکەمین بەشداری گۆڕان لە هەڵبژاردنی پەرلەمانی کورستان، لە بەرنامەی دیداری خەندان کە بەرنامەیەکی هەفتانەیە و لەلایەن رۆژنامەنوس هەڤاڵ محەمەدەوە پێشکەش دەکرێت، رایگەیاند، "دامەزراندنی بزوتنەوەی گۆڕان شتێکی لەناکاو و لە خۆوە نەبوە و ریشەیەکی مێژویی هەبوە، ئەوەی تایبەت بو بە خەڵکی کوردستان هەمیشە لە دوای یەکەم پەرلەمانی کوردستان لە 1992ەوە خواست هەبوە بۆ حوکمڕانییەکی دیموکرات، شەفاف و دادپەروەر و دەوڵەتی قانون و خودی نەوشیروان مستەفا ئەمین یەکەم کەس بو دوای راپەڕین وەکو ئەندازیاری راپەڕین کە کاریکرد بۆ ئەوەی دەوڵەتی قانون دروستبێت و لە بەڵگە ڤیدۆییەکەی ساڵی 1991 هەیە و جێگەی مشتومڕ نیە، بەهۆی شەڕی ناوخۆ و شەڕی روخانی سەدامەوە بەشێک لەو گۆڕانکاریانە دواخران، بەڵام گۆڕانکاری و گۆڕانی ریشەیی خواستی خەڵکی کوردستان بو، لە ساڵی 2000 بەدواوە بو بە خواستێکی گشتی و رۆشنبیران و راگەیاندنی ئەهلی و ناو خودی حزبە سیاسیەکانیش.

لە منداڵێکەوە بۆ هەمو تاکێکی ئەم وڵاتە دەزانێت کەموکوڕییەکان چیین و چۆنیش دەبێت چارەسەر بکرێن
ئاماژەی بەوەشکرد، ئەوەی لە 25ی تەموزی 2009دا بینراو بۆ یەکەمجار بەشداری لە هەڵبژاردن کرد و ئەو سەرکەوتنە گەورەیەی بەدەستهێنا "سەرەڕای دژایەتی زۆر و تەزویر" سەلمێنەری ئەو راستیە بو کە هاوڵاتیانی هەرێمی کوردستان دەیانەوێت حکومڕانێکی شەفاف و دیموکرات و دادپەروەر هەبێت لەسەر بنەمای هاوڵاتی بون هەبێت، "بەهۆی گۆڕانەوە ئێستا فرەیی زانیاری هەیە و زیاد لە پێویست زانیاری هەیە لەسەر هەمو روبەرەکان، ئێستا لە منداڵێکەوە بۆ هەمو تاکێکی ئەم وڵاتە دەزانێت کەموکوڕییەکان چیین و چۆنیش دەبێت چارەسەر بکرێن، لایەنێکی دیکەش کە باسی پڕۆسەی دیموکراسی دەکرێت واتا ئۆپۆزسین، کە ئۆپۆزسیۆن نەبو کەواتا ناتوانرێت بوترێت سیستمەکە دیموکراسیە، بۆیە دروستبونی گۆڕان چەند خزمەت بو بە خەڵک هێندەش خزمەت بو بە پڕۆسەی سیاسی.
بەجۆرێک ئەگەر کەسێک لێرە نەبوبێت و نەهاتبێتنە ئەم وڵاتە وا دەزانێت ئەمانە هەرگیز حوکمیان نەکردوە، یاخود بەمانایەکی دیکە لە ئەشکەوتدا بون
هۆشیار عومەر عەلی باسی لەوەشکرد، "ئەمڕۆ هەمو پارتە سیاسیەکان، تەنانەت یەکێتی و پارتی و بەرپرسانی ئەو حزبانە کە بۆ خۆیان بەربەستن لەوەی کە گەندەڵی چارەسەر بکرێت، بەربەستن لەوەی دادگاکان سەربەخۆ بێت، بەربەستن لەوەی هێزی پێشمەرگە نیشتیمانی بێت، بەربەستن لەوەی جۆرێک لە دادپەروەری هەبێت و حزب جیابکرێتەوە لە بازاڕ و پەروەردە و بوارەکانی دیکە ئێستا هاتون بەرنامەکانی گۆڕانیان کۆپی کردوە و دەیڵێنەوە، بەجۆرێک ئەگەر کەسێک لێرە نەبوبێت و نەهاتبێتنە ئەم وڵاتە وا دەزانێت ئەمانە هەرگیز حوکمیان نەکردوە، یاخود بەمانایەکی دیکە لە ئەشکەوتدا بون، ئەوە خواستێکی خەڵک و گۆڕان بوە کە ئێستا ئەوان دوبارەی دەکەنەوە".
گۆڕان ئێستا بوەتە خواستێکی نێودەوڵەتی
ئەوەشی خستەڕو، "گۆڕان ئێستا بوەتە خواستێکی نێودەوڵەتی، ئێستا ئەمریکا و بریتانیا و فڕەنسا کە بەپێی ئەوەی من بەرپرسی ژوری دیپلۆماسیم ئەو بەرنامەو پڕۆژانەی کە خستومانەتەڕو بۆ نمونە بۆ پێشمەرگە کە ستراتیژێکی چوار ساڵییە لە 2021 بۆ 2024 کتومت ئەو پڕۆژەیەیە کە کاک نەوشیروان پێشکەشی کرد، ئەمانە هەموی سەلمێنەری ئەوەیە کە ئەو پڕۆژەیەی گۆڕان پڕۆژەیەکی دروستە".
ئەوەی دەوترێت ئابوری، ئابوری نیە، تەنانەت کە دەوترێت وەزارەتی دارایی، ئەو وەزارەتە ئەوەندەی موچە دابەشدەکات ئەوەندە سیاسەتی ئابوری دانانێت
لەبارەی ئەوەی بۆچی خەڵکی کوردستان دوای 12 ساڵ، بەرهەمی داواکاریەکانی گۆڕانیان بۆ چاکسازی نەچنیوەتەوە، هۆشیار عومەر عەلی وتی، "ئێمە لە هەرێمی کوردستان لەڕوی سیاسیەوە سیستمان نیە، ئەوەی دەوترێت ئابوری، ئابوری نیە، تەنانەت کە دەوترێت وەزارەتی دارایی، ئەو وەزارەتە ئەوەندەی موچە دابەشدەکات ئەوەندە سیاسەتی ئابوری دانانێت، ئابوری ئێمە ئابوریەکی موڵکانە ستێنە هاوشێوەی عێراق و زۆربەی وڵاتانی ناوچەکە کە پشتی بە نەوت بەستوە، بۆیە دەبینیت کە نرخی نەوت هەڵبەز و دابەز دەکات قەیران دروست دەبێت، لە 2005 بەدواوە هەرکاتێک لە بەغداوە بودجە هاتوە لە هەرێم ئیستقرارێکی دارایی هەبوە بەتایبەت بۆ موچە و گوزەرانی خەڵک، هەرکاتێک لە بەغداوە بڕاوە ئەو قەیرانە دروستبوەتەوە، یەکێک لەو پڕۆژانەی گۆڕان هەیبو ئەوەبو، کە ئابوریەکەمان بکەین بە ئابوریەکی فرەچەشن، وەک کشتوکاڵ و پیشەسازی و گەشتوگوزار".
 فراکسیۆنی گۆڕان و پەرلەمانتارانی گۆڕان ئەوەی لەم دو ساڵەدا لەسەر گەندەڵی و قاچاغچێتی باسیان کردوە لایەنەکانی دیکە خۆیان دەیڵێنەوە
رونیشیکردەوە، "ئێستا ئێمە لە حکومەتین بەڵام فراکسیۆنی گۆڕان و پەرلەمانتارانی گۆڕان ئەوەی لەم دو ساڵەدا لەسەر گەندەڵی و قاچاغچێتی باسیان کردوە لایەنەکانی دیکە خۆیان دەیڵێنەوە، بزوتنەوەی گۆڕان تەواوی هەوڵی ئەوەبو کە هەرێم بەرەو دیموکراتیزەبون و شەفافیەت بڕوات، بەڵام کە وەکو خۆی ئامانجەکەی نەپێکاوە ناکرێت لەمەدا گۆڕان بە تاوانبار بزانرێت، گرنگ ئەوەیە گۆڕان بەشێک نیە لە گەندەڵی و خراپییەکان و پێشێلکردنی ئازادییەکان و هێزی چەکداری خۆی هەبێت و چی ویست بیکات، بەڵکو بەشێکە لە چارەسەر".
لەناو گۆڕان کەس دەرنەکراوە، کەسیش ئەگەر خۆی نەڕوات دەرناکرێت چونکە کارکردن لەگۆڕاندا پێچەوانەی حزبەکانی دیکە خۆبەخشانەیە
لەبارەی وەڵامی ئەو پرسیارەی کە هەندێک لە سەرکردە و هەڵسوڕاوەکانی گۆڕان کە زۆرجار دەڵێن، بەهۆی رەخنەکانیانەوە ناچارکراون گۆڕان بەجێبهێڵن، هۆشیار عومەر عەلی وتی، "لەناو گۆڕان کەس دەرنەکراوە، کەسیش ئەگەر خۆی نەڕوات دەرناکرێت چونکە کارکردن لەگۆڕاندا پێچەوانەی حزبەکانی دیکە خۆبەخشانەیە، هەریەکێک لە ئێمە کە هاتوین بەشداری کردوە کەس دەستی نەگرتوین و کەس داوای لێنەکردوین و کەس ناچاری نەکردوین، خۆمان خۆبەشخانە هاتوین و باوەڕمان بەوەیە کە ئەم پڕۆژەیە کە نەوشیروان مستەفا دایمەزراندوە و سەرکردایەتی دەکات و ئێستاش بەردەوامە شا رێگای ئەوەیە کە ئێمە بتوانین ژیانی ئەم جیلە و جیلەکانی داهاتو و وڵاتەکەمان بەرەو وڵاتێکی دیموکراتێکی سەقامگیر ببەین، "ئەوەی کە دەوترێت کەسێک لەسەر رەخنە دەرکرابێت راست نیە، هەندێک لە هاوڕێیانی ئێمە دەڵێن تائەوکاتە لەناو گۆڕانداین رێزمان دەگرن و وەسفمان دەکەن، بەڵام کە گۆڕان جێدەهێڵین پەلامارمان دەدەن، لە بنەمادا ئەمە راست نیە و پێچەوانەکەی راستە، زۆر لە هاوڕێیانی ئێمە لە گۆڕاندا کاریان کردوە و ئێستاش دەتوانن کاربکەن ئەوان تا لە گۆڕانن بەرگری دەکەن و کە دەچنە دەرەوە کەموکوڕییەکانی ئەم وڵاتە هەموی دەخەنە ئەستۆی گۆڕان، پێموایە ئەمە جۆرێک لە بێویژانی تیایە". 
 کاک نەوشیروان خۆی روانینی وابو هەتا ئەو لە ژیاندا بێت نابێت بەهۆی ئەوەوە کوڕەکانی پێگەی سیاسیان هەبێت و بەڵێنەکەی خۆشی بردەسەر، ئەیگوت دەبێت بەپێی توانای خۆیان ئەوان رۆڵیان هەبێت
لەبارەی بابەتی "تەوریسی سیاسی" لەناو بزوتنەوەی گۆڕان و رۆڵی کوڕەکانی نەوشیروان مستەفا کە ئەوانەی وازیان لە گۆڕان هێناوە دەڵێن نما و چیای نەوشیروان مستەفا "دەسەڵاتی سێبەریان هەیە"، هۆشیار عومەر عەلی وتی، "ئەوە تێنەگەیشتنە لەوەی خودی تەوریسی سیاسی چیە، تەوریسی سیاسی زۆر وازحە دەسەڵات لە باوکەوە بۆ کوڕ دەمێنێتەوە، بەشێک لەو هاوڕێیانەی ئێمە ئەو بیانوە دەهێننەوە کە دەسەڵاتی سێبەریان هەیە، کاک نەوشیروان خۆی روانینی وابو هەتا ئەو لە ژیاندا بێت نابێت بەهۆی ئەوەوە کوڕەکانی پێگەی سیاسیان هەبێت و بەڵێنەکەی خۆشی بردەسەر، ئەیگوت دەبێت بەپێی توانای خۆیان ئەوان رۆڵیان هەبێت، لەو چەند ساڵەی کە کاک نەوشیروان لەناو ئێمەدا نائامادەیە نە هەوڵیانداوە بۆ هیچ پێگەیەکی حزبی و حکومی لەکاتێکدا دەیان پێشنیار هەبوە، زۆر پۆست کە دراوە بە یەکێتی پێشنیار کراوە بۆ ئەوان، ئەوان رەتیانکردوەتەوە لەدوای کۆچی دوایی کاک نەوشیرانەوە هێرشێکی رێکخراو هەیە، لەکاتێکدا زۆربەی هاوڵاتیانی کوردستان ئاشنا نین بە روانین و بیرکردنەوەی ئەوان، نەوشیروان مستەفا هەتا ئەوکاتەی مرد کۆمەڵێک پڕوپاگەندەی لەسەربو کۆمەڵێک هەر دەیانوتەوە بەڵام هەرگیز پاکانەی نەدەکرد و رێگەیدا بە تەجروبە دەربکەوێت، پێموایە بەپێی کات دەردەکەوێت کوڕانی نەوشیروان مستەفا ئەمین جیاوازن لە هەمو ئەو کەسانەی دیکە، بەڵام بێگومان مافی خۆشیانە هەر پێگەیەکی سیاسیان هەبێت و پێش من و پێش زۆر کەس لە گۆڕاندا کاریان کردوە".
بەشێکی گەورە لەو رەمزیەتەی نەوشیروان مستەفا ئەمین هی کاک چیا و کاک نمایە و رۆڵیشیان هەیە، هەرکەسێک ئینکاری ئەوە بکات پێموایە لەگەڵ خۆی و خەڵک و خواشدا درۆ دەکات
لەبارەی ئەوەی ئایا ئێستا رۆڵی کوڕەکانی نەوشیروان مستەفا لە گۆڕاندا چیە؟، هۆشیار عومەر عەلی دەڵێت، "بەڵگەیەک نیە، ئێستا تۆ داوای شتێکم لێدەکەیت کە قابیلی سەلماندن نیە، تۆ ئەتەوێت بیسەلمێنم بۆتۆ کە ئەم کوڕانە رۆڵیان چیە، ئێستا بۆ نمونە رێکخەری گشتی گۆڕان ناتوانێت دەستتێوەردان لەکاروباری حکومەتدا بکات، چونکە پێگەکەی پێگەیەکی حزبیە، من کە رێکخەری ژوری دیپلۆماسیم ناتوانم دەستبخەمە ناو کاروباری ژوری رۆژنامەوانی یان ژورێکی دیکە، ئەوان کە هیچ پێگەیەکی فەرمیان نەبێت چۆن دەتوانن ئەوە بکەن، بەڵام بێگومان بەشێکی گەورە لەو رەمزیەتەی نەوشیروان مستەفا ئەمین هی کاک چیا و کاک نمایە و رۆڵیشیان هەیە، هەرکەسێک ئینکاری ئەوە بکات پێموایە لەگەڵ خۆی و خەڵک و خواشدا درۆ دەکات، بەڵام هەتا ئێستا نە لە گۆڕان و نە لە حکومەتدا هیچیان نەویستوە و داوای هیچیان نەکردوە، بەڵام گومانمان نیە بۆ ئێستا و داهاتوی گۆڕان گرنگن و رۆڵی گرنگیشیان دەبێت".

نیشانەکردن

گۆڕان