وێنە و ڤیدیۆ.. ناسا لەسەر روی مانگ ئاماژەی نوێ بۆ بونی ئاو دەدۆزێتەوە

10:57 - 27/10/2020

8169جار خوێندراوەتەوە

خەندان-

ئاژانسی فڕینناسی و بەڕێوەبەرایەتی بۆشایی ئاسمان (ناسا)، رایگەیاند لەسەر روی مانگ ئاماژەكانی بونی ئاو-یان لەسەر روە روناكەكەی مانگ بەدیكردوە و ئەگەری ئەوە هەیە ببێتە بنیاد بۆ ژیانی مرۆڤ لەسەر ئەو هەسارەیە.

روانگە و سەرچاوەی ستراتۆسڤیر سەر بە ئاژانسی ناسا و تایبەت بە زانستە گەردونناسییەكان جەختیكردەوە، تیشكە ژێرسورەكان بۆ یەكەمینجار ئاماژەكانی بونی ئاویان لەسەر ئەو روەی مانگ دەرخستوە، كە بە تیشكی خۆر روناكە.

بەگوێرەی راگەیەندراوەكە، ئەو ئاماژەیە جەختدەكاتەوە ئەگەری ئەوە هەیە ئاو بە شێوەیەكی فراوانتر لەوەی پێشبینیدەكرێت، لەسەر روی مانگ بڵاوبوەتەوە و تەنها لەو بەشەی هەسارەكە ئاو نییە تاریكە.

ئەو روانگەیە ئاشكراشیكردوە، چەند گەردیلەیەك لە ئاو (H2O) لە ناوچەیەك كە پێیدەوترێت Clavius Crater بەدیكراوە، كە یەكێكە لە گەورەترین چاڵاییەكانی سەر روی مانگ و دەكەوێتە نیوەگۆی باشوری هەسارەكە بەگوێرەی ماڵپەڕی فەرمیی ئاژانسی ناسا.

پێشتر چەند ئاماژەیەك لەسەر روی مانگ بەدیكران كە تێیدا بە شێوەیەك لە شێوەكان ماددەی هایدرۆجین هەبو، بەڵام نەتوانرا جیاوازی بكرێت لەنێوان ئاو و رێژە كیمیاییەكەی، بەڵام زانیارییە نوێیەكان باس لەوەدەكەن ئاو هێندەی پەرداخێكی 12 ئۆنسە لە روبەری یەك مەتر سێجای چاڵاییەك لە خۆڵی مانگ هەیە و لە كۆتا ژمارەی بڵاوكراوەی گۆڤاری زانستیی Natureدا ئەو زانیارییە بڵاوكراوەتەوە.