چالاكی‌ و به یعه ت

سەلام عەبدوڵا
 هەموومان دەزانین بە هاتنی داعش بۆ سەر سنوورەكانی هەرێمی كوردستان چ مەترسییەكی هێنایە ئاراوە بۆ سەر هەرێم، گەر خۆڕاگری و ورەبەرزی پێشمەرگە و یارمەتی بەپەلەی ئەمریكا و هاوپەیمانانی نەبوایە دوور نەبوو زیانێكی گەلێك گەورە لە گەلەكەمان و لە هەرێم بدات.

ئەوەی بەرامبەر خۆشك و برا ئێزدییەكانیش كردیان ئەو پەڵەیە كە بە تەوێڵی ئەم رێكخراوە تیرۆریستییەوە كە تەنها بە نەمان و لەناوبردنی خۆیان و بیری رەش و رزیویان مەگەر نەمێنێت، دەنا ئەو كۆمەڵكوژی و رەفتارە دژە بەشەرییەی ئەمانە هەرگیز لە بیری گەلەكەمان ناچێتەوە. ئەم رێكخراوە بەناو دەوڵەتە، هەڵوێستی خۆی بەرامبەر بە گەلی كورد نەشاردۆتەوە و گەلەكەمان بە دوژمنێكی سەرسەختی خۆی دەزانێ و بە دوژمنی پلەیەكمان دادەنێت و بە كافر و " مورتەد"یشی لە قەڵەم دەدات.

 هەمووش ئەو راستییە دەبینین كە تا ئێستا هێزی پێشمەرگەی كوردستان زیاد لە 12000 شەهیدی لە پێناو پاراستنی هەرێمی كوردستاندا داوە و پتر لە 5 هەزار برینداریشمان هەیە، كەچی تا ئێستا خەڵكانێك لەنێو خۆماندا هەن كە هەموو ئەو راستییانەش رۆژانە دەبینن ، كەچی سەرەڕای ئەوەش لە بری ئەوەی غیرەتیان هەڵبستێ و دەست بەنە چەك و داكۆكی لە وڵات و گەلەكەیان بكەن، دێن پەیوەندی بەم رێكخراوە تیرۆریستییەوە دەكەن و وەك خۆیان دەڵێن " بەیعەت" بە سەرۆكی ئەو رێكخراوە دڕندەیە، ئەبوبەكر بەغدادی دەدەن و وەك خەلیفە دەیناسێنن و ئامادەگی خۆیان دەردەبڕن كە " چالاكی" لە هەرێمدا ، دژی هەرێم، بنوێنن.

ئەوەی مایەی سەرنج بوو ، لە كاتی نیشاندانی ئەم جاشە تیرۆریستانەدا لە تەلەفزیۆن وەك ئەوەی بەیعەت بە عومەری كوڕی خەتاب بدەن، بە ئاشكرا یەك لەدوای یەك دەیانوت بەیعەتمان بە ئەبوبەكر بەغدادی داوە !! و بە تەمای "چالاكی" بووین كە بۆ ئەو رێكخراوەی ئەنجام بدەین. سەیر ئەوە بوو لە تەواوی ئەو دانپێدانەیاندا هەردەم بەیعەت و چالاكییان لە جیاتی جاشێتی و خەیانەت بەكاردەهێنا و پۆلیسەكەش ئەو خەیانەتەی بۆ راستنەدەكردنەوە و پێی نەدەوتن ئەوەی ئێوە كردووتانە جاشێتی و خۆفرۆشی و خەیانەتە. لەوە سەیرتریش رۆژنامە كوردییەكانی رۆژی داهاتوو، ئەوانیش لەسەر لاپەڕەی رۆژنامەكانیان هەمان قسەی تیرۆریستانیان دووپات دەكردەوە و دەیانوت، ئەمانە بەتەمای چەند "چالاكی!!"یەك بوون كە لە هەرێمدا ئەنجامی بدەن!.

 دەبوو هەر نەبێت راگەیاندنەكانمان چ بینراو و چ بیستراو ئەو دەستەواژانەی وەكوو "بەیعەت" و " چالاكی"یان ریسوا بكردایە و بە كاری خەیانەت و خۆفرۆشی لە قەڵەم بدایە. دەبوو ئەم تاوانبارانە كە بەداخەوە هەمووش كورد بوون، زۆر بە راشكاوی باسی خەیانەت و جاشێتی و بێ نمەكی و خوێڕێتی خۆیان بكردایە ، بۆ ئەوەی لاوان و گەنجانمان نەكەونە ئەو زەلكاوی خەیانەتەوە و دەبوو بڵێن ئەمانە لە مزگەوتەكاندا لەباتی خواپەرستی و لێبوردەیی و خزمەتی نیشتمان فێری تیرۆر و خەیانەتیان كردین. هەر لێرەدا دەستخۆشی لە بەئاگایی و كارامەیی هێزی ئاسایش و پۆلیس و خەمخۆریی هاووڵاتیانمان دەكەین.


ئه‌م بابه‌ته 352 جار خوێنراوه‌ته‌وه‌‌

نیشانە کردن

, , , ,
Copyright © 2015 Xendan.org all rights reserved
Design by AVESTA GROUP , programming and database by KURDSKY.COM