زۆرترین خوێنراو
وتاره‌کانی تری نوسه‌ر
12/04/2015
له‌ نزیكه‌وه‌ حه‌زم لێیه‌تی
خه‌ڵه‌ف غه‌فور

كۆبوونه‌وه‌كانی‌ سه‌رۆكایه‌تی‌ په‌رله‌مانی‌ كوردستان و لایه‌نه‌ سیاسییه‌كان چه‌ند رۆژێكه‌ ده‌ستیپێكردووه‌ به‌مه‌به‌ستی‌ وه‌رگرتنی‌ بیروبۆچوونی‌ لایه‌نه‌ سیاییه‌كان سه‌باره‌ت به‌ پرسی‌ سه‌رۆكایه‌تی‌ هه‌رێم و گۆڕینی‌ ده‌ستوور، پێش هه‌موو شتێك لام وایه‌ ئه‌و كۆبوونه‌وانه‌ زیاده‌یه‌، ته‌نیا به‌فیڕۆدانی‌ كات و سه‌روه‌ت و سامانی‌ گشتییه‌ و بۆ ئه‌وه‌ش خودی سه‌رۆكی‌ په‌رله‌مان لێی‌ به‌رپرسیاره‌.

زیاده‌بوونی ئه‌و كۆبوونه‌وانه‌ ته‌نیا له‌به‌رئه‌وه‌یه‌ كه‌ هه‌موو لایه‌ك هه‌ڵوێستی‌ لایه‌نه‌ سیاسییه‌كان ده‌زانن، پارتی‌ دیموكراتی‌ كوردستان سیستمی‌ سه‌رۆكایه‌تی‌ پێ باشه‌، ئه‌وانیتریش په‌رله‌مانی‌، سه‌رۆكی‌ په‌رله‌مان و ده‌سته‌ی‌ سه‌رۆكایه‌تیش ئه‌مه‌ ده‌زانن، ئیتر بۆچی‌ ئه‌و هاتوچۆیه‌ ده‌كه‌ن؟

كات كوشتن بووه‌ته‌ مۆدێل، ئه‌م نه‌خۆشییه‌ سه‌رۆكی‌ په‌رله‌مانیشی‌ گرتووه‌ته‌وه‌، ده‌نا چه‌ند مانگێك پێش ئێستا هه‌مواركردنه‌وه‌ی‌ ده‌ستوور یه‌كلایی ده‌كرایه‌وه‌ و ئه‌م په‌له‌پروزه‌ی‌ نه‌ده‌ویست.

ئه‌و له‌ نزیكه‌وه‌ ده‌یانبینێت، چوار لایه‌ن یه‌ژن په‌رله‌مانی‌، به‌پێی‌ عورف و عاده‌تیش جه‌نابی سه‌رۆكی‌ په‌رله‌مان ده‌بێت بێلایه‌ن بێت ئه‌گینا ئه‌و ده‌نگه‌ش زیاد ده‌بوو بۆیان، به‌ڵام لێره‌ نهێنی‌ هه‌یه‌ و كه‌س نایه‌وێت پێمان بێژێت؟
من دوای‌ مانگێك داواكاری‌ بۆ چاوپێكه‌وتنی‌ جه‌نابی‌ سه‌رۆكی‌ په‌رله‌مان ئینجا له‌ڕێگای‌ نووسینه‌وه‌ به‌ وه‌ڵامه‌كانی‌ ئاشنابووم، به‌ڵام ئه‌مجاره‌ ئه‌گه‌ر لوتف بفه‌رمووێت ده‌مه‌وێت، روونتریش له‌ نزیكه‌وه‌ حه‌زم لێیه‌ چه‌ند پرسیارێك له‌ جه‌ناب و عالی‌ مه‌قامیان بكه‌م.

ده‌مه‌وێت بپرسم جه‌نابت باش ده‌زانیت هه‌موو لایه‌ك چییان ده‌وێت، ئتر بۆ سه‌ردانیان ده‌كه‌یت؟
ده‌زانیت پارتی‌ كاك مه‌سعودی‌ ده‌وێت بۆ چه‌ند ساڵی‌ تریش سه‌رۆك بێت، ئیتر بۆ ده‌چیته‌ لایان؟
جه‌نابت لات روونه‌ كه‌ ئیسلامییه‌كان خاوه‌ن هه‌ڵوێستی‌ روون نین ئیتر بۆ سه‌ردانیان ده‌كه‌یت؟

ئێ‌ خۆ هه‌فتانه‌ش ئه‌زبه‌نی‌ نه‌وشیروان مسته‌فا ده‌بینیت و بۆچوونه‌كانی ده‌زانیت، ئه‌وه‌ش ده‌زانین له‌ بزووتنه‌وه‌ی‌ گۆڕان كاك نه‌وشیروان یه‌كه‌م و دوا قسه‌ ده‌كات ئیتر بۆ ده‌چیت بۆچوونی‌ وه‌رده‌گریت؟
ده‌مه‌وێت له‌ سه‌رۆكی‌ په‌رله‌مان بپرسم، جاران كه‌ تۆ ئۆپۆزسیۆن بوویت ده‌توت ده‌بێت په‌رله‌مان مه‌رجه‌ع بێت، هه‌موو رێگاكان بچنه‌وه‌ په‌رله‌مان، ده‌توت كه‌ نابێت په‌رله‌مان حزبی بێت، ده‌توت ده‌بێت په‌رله‌مانتار نوێنه‌ری گه‌ل بێت، كه‌چی‌ تۆ له‌ ته‌نیشت كاك نه‌وشیروانه‌وه‌ به‌ شه‌رمه‌وه‌ به‌لادا هاتی‌؟

حه‌زه‌كه‌م له‌ نزیكه‌وه‌ سه‌دان پرسیارت لێ بكه‌م، چونكه‌ هه‌موو ئه‌م پرسیارانه‌ جه‌نابت پێشووتر له‌ به‌رنامه‌ ته‌له‌فزیۆنییه‌كانه‌وه‌ له‌ به‌رپرسان و خه‌ڵكت ده‌كرد، ئێستا ده‌بێت وه‌ڵامه‌كانیمان بده‌یته‌وه‌.

ئاخر به‌و حسابه‌ی‌ جارانت بێت ئێستا پۆسته‌كه‌ی‌ تۆ له‌هه‌موو عالییه‌كان عالی تره‌، به‌ڵام رێگاكه‌ی‌ تۆش هه‌ر ده‌چێته‌وه‌ سه‌ر ره‌ش جه‌نابی سه‌رۆكی‌ په‌رله‌مان.

حه‌زم لێیه‌ له‌ نزیكه‌وه‌ له‌ سه‌رۆكی‌ هه‌رێمیش بپرسم، بۆ هه‌ڵوێستت روون نییه‌ سه‌باره‌ت به‌ پۆسته‌كه‌ت؟ بۆ خۆت حه‌زت له‌ مانه‌وه‌یه‌ یان حزبه‌ سیاسییه‌كانی‌ كوردستانیش له‌ بنه‌وه‌ موجامه‌له‌ت ده‌كه‌ن و یه‌ژن به‌ڵێ‌ بۆ سه‌رۆك؟





ئه‌م بابه‌ته 599 جار خوێنراوه‌ته‌وه‌‌

هەواڵ

وەرزش

خزمەتگوزاری

سەبارەت

رێکلام

Copyright 2015. Xendan for Publishing and Broadcasting. All Rights Reserved.